Read LAYIDUKURA TIMOTE FILANAN 1 Bible Online

TIMOTE FILANAN 1 - LAYIDUKURA bible

TIMOTE FILANAN 1

¹Ne Pɔli min kɛra Yezu Krista ka ciden ye Ala sago la, a ye ne ci ka sini hɛrɛ koo fɔ o min bɛ sɔrɔ Yezu Krista barika la, Ala ye o min layidu ta.

²Ne bɛ nin bataki ci Timote ma, ele min kɛra ne ka deen ye ne bɛ min kanu haali. An Faa Ala n'an Matigi Yezu Krista ka makari e la, ka nɛɛma ni hɛrɛ kɛ i ye.

³Ne bɛ barika la Ala ye, ne bɛ baara kɛ ale min ye ni kɔnɔgwɛ ye i n'a fɔ ne y'o sɔrɔ n bɛmaw fɛ cogo min na. Ne bɛ to ka Ala dali i ye suu ni tile.

⁴Ni ne hakili jigira i kasiko la tuma min na, o waati la, ne b'a fɛ k'i ye teliya la waasa ne ka se ka nisɔndiya.

⁵Ne hakili b'i ka jigisɛbɛ koo la. Jigi min tun bɛ i mamamuso Loyisi an'i bamuso Unisi fɛ, ne lanin b'a la k'o nyɔgɔn b'i fɛ fana.

⁶Ne ye n bolo la i kan tuma min na, Ala ye seko min d'i ma, ne b'i hakili jigi o koo la, ko i k'o minɛ ka nya kosɛbɛ.

⁷Bari Ala ye Nii Senuman min d'an ma, o ma d'an ma waasa an ka kɛ siranbagatɔw ye, o bɛ fanga le d'an ma, ka kanuya don an dusu la, k'an kɛ yɛrɛminɛlaw ye.

⁸I kana maloya k'an Matigi koo fɔ, i kana maloya ni ne fana koo ye, ne min bɛ kaso la ale kɔsɔn. Nga i ka sɔn tɔɔrɔ ma i n'a fɔ ne, kibaru diman kɔsɔn, Ala barika la.

⁹Ale min ye an kisi ni ka an wele ka kɛ a ka siya ye, o ma kɛ an ka kɛwalinyuman sababu la, nga ale yɛrɛ ka koo latigɛnin, n'a ka nɛɛma sababu lo. A y'o nɛɛma labɛn an ye Yezu Krista barika la kabini dinyɛ ma dan fɔlɔ.

¹⁰O nɛɛma nin kɛra an ye sisan an Kisibaga Yezu Krista ka nali barika la. An b'a lɔn kibaru diman barika la ko Yezu Krista ye saya mako sa ka hɛrɛ banbali sira yira an na.

¹¹Ala ye ne wele o kibaru diman fɔli kama ka n kɛ ciden ni karamɔgɔ ye.

¹²O le kɔsɔn, ne bɛ tɔɔrɔ nunu munyuna. Nga o ma kɛ maloya koo ye ne fɛ, bari ne ye n jigi la min kan, ne b'ale lɔn, ani ne lanin b'a la ko ne jigi bɛ min kan, see b'a ye k'o mara n ye fɔɔ laban loon na.

¹³Ne ye kumanyuman minw fɔ i ye, i k'i yɛrɛ cogo kɛnyɛ ni olu ye. Jigi ka to i fɛ ani kanuya, an y'o min sɔrɔ Yezu Krista ka jɛnnyɔgɔnya fɛ.

¹⁴I ye konyuman minw sɔrɔ, i ka olu minɛ kosɛbɛ Nii Senuman barika la, ale min bɛ an kɔnɔ.

¹⁵E y'a lɔn ko Krista kɔmɔgɔ minw bɛ Azi mara la, olu bɛɛ banna ne la. Fizɛli ani Ɛmozɛni nii b'o la.

¹⁶Matigi ka barika don Onezifɔri ka somɔgɔw la, bari a ye ne jigi tugu sinyɛ caaman na. Ne kɛra kasoden ye, o bɛɛ n'a ta, a ma maloya ni ne koo ye.

¹⁷O le y'a to a sera Ɔrɔmu tuma min na dɔrɔn, a jijara ka ne yɔrɔ nyini fɔɔ ka ne ye.

¹⁸Matigi ka makari a la laban loon na. A ye dɛmɛ min kɛ ne ye k'an to Efɛzi, ele yɛrɛ bɛ o kala ma ka tɛmɛ bɛɛ kan.