Read LAYIDUKURA TIMOTE FILANAN 2 Bible Online

TIMOTE FILANAN 2 - LAYIDUKURA bible

TIMOTE FILANAN 2

¹Ele kɔni, ne deen, e ka barika don i yɛrɛ la Yezu Krista ka nɛɛma barika la.

²I ye fɛɛn min mɛn ne fɛ seere caaman nyana, i k'o kalifa mɔgɔsɛbɛw ma minw bɛ se ka mɔgɔ wɛrɛw kalan n'o ye.

³E ka sɔn tɔɔrɔ ma i n'a fɔ Yezu Krista ka sɔlidasinyuman.

⁴Ni mɔgɔ min donna sɔlidasiya la, n'a b'a fɛ k'a kuntigi sago kɛ, a bɛ jija o baara la, a t'a niin don baara wɛrɛ la.

⁵Farikolo tolonkɛla fana tɛ jala sɔrɔ abada, n'a ma sariya bɛɛ labato.

⁶Sɛnɛkɛla min bɛ sɔn ka baara kɛ, ale le bɛ kɔn ka suman tigɛ.

⁷Ne bɛ koo minw fɔra i ye, i ka miiri olu la k'u faamu, bari Matigi bɛna hakili d'i ma o koo bɛɛ la.

⁸I k'i hakili jigi Yezu Krista koo la, ale min sara ka kunun, ale min kɛra Dawuda deen ye, ne b'ale kibaru le fɔ.

⁹O kibaru diman fɔli kɔsɔn, ne bɛ sɛgɛn na, u ye ne siri ni jɔrɔkɔ ye, i n'a fɔ kojugukɛla. Nga mɔgɔ si tɛ se ka Ala ka kuma ka fɔli bali.

¹⁰O le y'a to ne bɛ koo bɛɛ munyu Ala ka mɔgɔwolomaninw kɔsɔn, waasa olu fana ka kisi Yezu Krista barika la, ani ka bonya sɔrɔ daan tɛ min na.

¹¹Nin kuma kɛra tinyɛ yɛrɛ ye: N'an sɔnna ka sa Matigi kɔsɔn, an fana bɛna kunun ka to n'a ye.

¹²N'an jijara ka tɔɔrɔ munyu a kɔsɔn, an bɛna kuntigiya kɛ n'a ye. N'an banna ale ka koo ma, ale fana bɛna ban an na.

¹³N'an kɛra janfatiw ye, ale bɛ to a ka kantigiya la, bari ale tɛ se ka ban a yɛrɛ la.

¹⁴I ka mɔgɔw hakili jigi o koow la Ala nyakɔrɔ k'a gwɛlɛya u ma k'u ka u yɛrɛ kɔlɔsi sɔsɔli gwansan ma. O tɛ foyi nya fɔɔ k'u lamɛnbagaw nigɛ dɔrɔn.

¹⁵I jija ka kɛ mɔgɔsɛbɛ ye Ala nyakɔrɔ, baarakɛlasɛbɛ min tɛ maloya fewu, min bɛ tilen ka tinyɛ fɔ.

¹⁶I yɛrɛ kɔlɔsi kuma caaman ma, o ma nyi. Bari mɔgɔ minw b'o kɛ, o tigiw bɛ don tilenbaliya la.

¹⁷O tigiw ka kuma bɛ cɛnni kɛ i n'a fɔ jolijugu bɛ farisogo cɛn cogo min na. Imene ni Filɛtɔsi y'o mɔgɔ nunu dɔw ye.

¹⁸Olu minw ye tinyɛ to yen, n'u b'a fɔ ko suuw kununna ka ban, o cogo la u ye mɔgɔ dɔw jigi tigɛ, u tɛ la Ala la tugu.

¹⁹O bɛɛ n'a ta, Ala ye koo min dabɔ, o bɛ to a nɔɔ na, kuma nin le kɛra o taamasinyɛ ye, ko: “Minw kɛra Matigi ta ye, a b'olu lɔn,” ani “Mɔgɔ minw bɛɛ bɛ Matigi bato, olu ka faran tilenbaliya koo la.”

²⁰A ma kɛ ko minan minw dilanna ni sanu ye, walima ni warigwɛ ye, k'olu dama le bɛ soo kɔnɔ, nga minw dilanna ni yiri ye, ani bɔgɔ ye, olu fana bɛ yen. Dɔw kɛra baarasaniyanin kama, dɔw fana kɛra nyamanyamacɛ ta ye.

²¹Ni mɔgɔ min ye a yɛrɛ saniya, k'a yɛrɛ tanga koo nunu ma, ne y'o minw fɔ, o tigi bɛna kɛ daganyuman ye min saniyanin bɛ. A b'a Kuntigi mako nya, a labɛnnin bɛ konyuman sifa bɛɛ kɛli kama.

²²I k'i yɛrɛ kɔlɔsi nigɛjugu ma, min bɛ sɔrɔ kanbelenya la, i ka to ka tilenninyakow kɛ, k'i jigi la Matigi kan, k'a kanu, ani ka hɛrɛ nyini ni mɔgɔw ye, minw y'u jigi la Matigi kan ni kɔnɔgwɛ ye.

²³I ka ban sɔsɔli gwansanw ma, i b'a lɔn k'olu bɛ kɛlɛw wili dɔrɔn.

²⁴Bari Matigi ka baarakɛla man kan ka kɛlɛ kɛ, a ka kan ka mɔgɔ bɛɛ koo diya a yɛrɛ ye, ani ka kɛ mɔgɔ ye, min bɛ se mɔgɔw kalan na ni munyuli ye.

²⁵Mɔgɔ minw tɛ sɔn a ka kalan ma, a ka kan k'olu minɛ ni dususuma ye, n'a sɔrɔ Ala bɛna u dɛmɛ u ka nimisa waasa u ka tinyɛ lɔn.

²⁶O cogo la, u bɛna u yɛrɛ sɔrɔ ka bɔ Sutana ka jɔɔ la, min tun ye u minɛ janko a ka to k'a sago kɛ n'u ye.