Read LAYIDUKURA TIMOTE FILANAN 3 Bible Online

TIMOTE FILANAN 3 - LAYIDUKURA bible

TIMOTE FILANAN 3

¹I hakili ka to a la ko laban tuma na, waati bɛna gwɛlɛya.

²Mɔgɔw bɛna kɛ sɔnjuguw ye, wari koo bɛna diya u ye kosɛbɛ, u bɛna kɛ yɛrɛbonyalaw ye. U bɛna Ala tɔgɔ cɛn ani u tɛna mɛnni kɛ u wolobagaw fɛ, u bɛna kɛ nyumanlɔnbaliw ye, ani u tɛna Ala ka koow jati.

³U bɛna kɛ mɔgɔ kogwɛlɛnw ye, makari tɛna sɔrɔ u la, u bɛna kɛ mɔgɔ tɔgɔcɛnbagaw ye, ni mɔgɔ farimanw, ani mɔgɔjuguw. Konyuman tɛna diya u ye.

⁴U bɛna kɛ janfatiw ni dusutigiw ye. U bɛna kɛ mɔgɔw ye yɛrɛbonya bɛna fanga sɔrɔ minw kan. Dinyɛ koo bɛna diya u ye ka tɛmɛ Ala kan.

⁵U bɛna u yɛrɛ kɛ Ala nyasiranbagaw ye, nga o tɛ sɔn tinyɛ ma o min ye see sɔrɔyɔrɔ ye. E k'i yɛrɛ kɔlɔsi o mɔgɔ sugu nunu na.

⁶O mɔgɔ nunu dɔw bɛ don soow kɔnɔ, ka muso hakilitanw nigɛ ka olu sɔrɔ. O muso nunu kɛra kojugu ka jɔɔnw ye, nigɛjugu b'u sama k'u bali koo sifa bɛɛ la.

⁷O muso nunu bɛ tinyɛ nyini tuma bɛɛ, nga u fana tɛ se k'a lɔn.

⁸Zannɛsi ni Zanbɛrɛsi murutira Musa ma cogo min na, o cogo la mɔgɔ nunu bɛ ban tinyɛ ma. U ka miiriya man nyi, u jigi tɛ Matigi kan sɛbɛ la.

⁹Nga u tɛna se ka taa nya. Zannɛsi ni Zanbɛrɛsi ta kɛra cogo min na, o cogo kelen na, bɛɛ bɛna o mɔgɔ nunu ka nalomanya ye.

¹⁰Ele kɔni, e bɛ ne ka kalan kala ma, ni n ka taamacogo, ani n ka koo latigɛninw, ne lara Matigi la cogo min na, i bɛ o kala ma. Ne munyuna, ka mɔgɔw kanu, ani n jijara cogo min na fana,

¹¹ka tɔɔrɔ ka sɛgɛn Antiyɔsi ni Ikɔniyɔmu ani Lisitɔrɔ, e bɛ o bɛɛ kala ma. O tɔɔrɔ nunu ye ne sɔrɔ, nga Matigi ye ne tila ka bɔ o bɛɛ la.

¹²Mɔgɔ minw bɛɛ b'a fɛ ka jɛn ni Yezu Krista ye ka kɛ Alanyasiranbagaw ye sɛbɛ la, olu bɛna tɔɔrɔ sɔrɔ.

¹³Mɔgɔ minw ka jugu ani nanbaranmɔgɔw, olu bɛna juguya ka taa nya. U bɛna mɔgɔ tɔw kɛ u bɛ fili ani k'u yɛrɛ fili fana.

¹⁴Ele kɔni, e kalanna koo minw na, ani ka sɔn u ma, i ka jija k'o minɛ ka nya, bari i ye o koo kalan mɔgɔ min fɛ, i b'o tigi lɔn.

¹⁵Kabini i denmisɛn tuma, i ye Ala ka kuma lɔn, min bɛ se ka hakilitigiya d'i ma, o min barika la mɔgɔ b'a jigi la Yezu Krista kan ka kisi.

¹⁶Ala ka kuma bɛɛ sɛbɛnna Ala yɛrɛ ka sebagaya barika la. Nafaba b'o la ka mɔgɔw kalan n'a ye, ani ka galon ban, ani ka mɔgɔw bila siranyuman kan, ka u tilen,

¹⁷waasa Ala ka baarakɛla ka kɛ mɔgɔ dafanin ye ka se ka konyuman sifa bɛɛ kɛ.