Read LAYIDUKURA TITI 2 Bible Online

TITI 2 - LAYIDUKURA bible

TITI 2

¹Ele kɔni, i ka mɔgɔw ladi ka kɛnyɛ ni kalannyuman ye.

²I k'a fɔ cɛkɔrɔbaw ye k'u ka kɛ mɔgɔsɛbɛw ye, minw ka miiriya ka nyi, jigi bɛ minw fɛ kosɛbɛ, ni kanuya ni munyuli.

³O cogo la fana, i k'a fɔ musokɔrɔbaw ye ko olu taamacogo ka bɛn ni mɔgɔsɛbɛya ye Ala faan fɛ. U kana kɛ mɔgɔ tɔgɔcɛnlaw ye, ani u fana kana kɛ dɔrɔtɔw ye. Olu ka mɔgɔw dege konyuman kɛli la.

⁴O cogo la, muso minw ma kɛ musokɔrɔbaw ye fɔlɔ, u b'u dɛmɛ u ka u cɛɛ n'u deenw kanu.

⁵U ka kɛ muso hakilitigiw ye minw ka kɛwaliw ka nyi, minw jijanin bɛ u ka sokɔnɔbaaraw la, ani minw sɔɔn ka nyi, ani u b'u yɛrɛ majigi u cɛɛw ye, waasa mɔgɔw kana se ka Ala ka kuma lɔgɔbɔ.

⁶O cogo la fana, i ka kanbelenw ladi ko olu ka kɛ mɔgɔsɛbɛw ye

⁷fɛɛn bɛɛ la. I ka cogonyuman yira u la, k'i ka kalan minɛ ka nya.

⁸I ka kuma ka kɛ kuma ye, mɔgɔ tɛ se ka min sɔsɔ waasa an juguw kana fɔta sɔrɔ an kama, u ka to maloya la.

⁹I ka jɔɔnw ladi ko olu ka kan ka u yɛrɛ majigi k'u koo diya u kuntigiw ye koo bɛɛ la, u kana u sɔsɔ,

¹⁰ani u kana u sonya cogo si la. U k'u ka mɔgɔsɛbɛya dafanin yira u la tuma bɛɛ. O cogo la, u bɛna an kisibaga Ala ka koo bonya.

¹¹Bari Ala y'a ka nyumanya yira kɛnɛ kan adamaden bɛɛ bɛ se ka kisi min barika la.

¹²Ale min b'a yira an na ko an ka siran Ala nya ani ka ban nin dinyɛ nigɛjuguw la, waasa k'an to bii dinyɛ na, an ka se k'an yɛrɛ minɛ ka taama tilenninya la Ala nyakɔrɔ.

¹³K'an to nisɔndiya loon makɔnɔni na, o min ye masaba Ala an kisibaga Yezu Krista ka nɔɔrɔ loon ye.

¹⁴Ale lo y'a yɛrɛ di an kɔsɔn, waasa k'an kunmabɔ tilenbaliya koow bɛɛ la, ani k'an saniya k'an kɛ a yɛrɛ ka jama ye, k'a kɛ mɔgɔw ye minw labɛnnin bɛ konyuman kɛli kama.

¹⁵O cogo la, i ka kan ka mɔgɔw kalan, k'u ladi, k'u filiyɔrɔ fɔ u ye ni kuntigiya ye. I kana to mɔgɔ si k'i dɔgɔya fana.