Read LAYIDUKURA TITI 3 Bible Online

TITI 3 - LAYIDUKURA bible

TITI 3

¹I k'a fɔ bɛɛ ye ko u k'u yɛrɛ majigi kuntigiw ni faamaw ye, k'u bonya, ani u labɛnnin ka to konyuman sifa bɛɛ kɛli kama.

²U kana mɔgɔ si tɔgɔ cɛn, u kana kɛlɛ kɛ, u k'u yɛrɛ kɛ mɔgɔsɛbɛw ye, ka munyu bɛɛ kɔrɔ tuma bɛɛ.

³Bari fɔlɔfɔlɔ an fana tun ye hakilitanw ye, mɔgɔ murutininw, an tun filila, nigɛjugu sifa bɛɛ, ni yɛrɛsagokɛ tun y'an kɛ jɔɔnw ye, an tun bɛ juguya, ni sɔnjuguya la. An koo fana tun man di nyɔgɔn ye.

⁴Nga an kisibaga Ala y'a ka nyumanya n'a ka kanuya yira mɔgɔw la tuma min na,

⁵a y'an kisi. O ma kɛ ko an ka kɛwalinyuman kɛli kɔsɔn, nga a ka makari le kɔsɔn a y'o kɛ, an dusu yɛlɛmana jii kɔnɔ koli fɛ Nii Senuman barika la, sisan an nyanaman lo Ala faan fɛ.

⁶A ye o Nii Senuman d'an ma fɔɔ ka nya an kisibaga Yezu Krista barika la,

⁷janko Ala ye an minw kɛ mɔgɔtilenninw ye a ka nɛɛma barika la, an ka hɛrɛ banbali sɔrɔ an jigi bɛ o min kan.

⁸Kuma nin ye tinyɛ ye i bɛ se k'i jigi la o min kan. Ne b'a fɛ i ka to o kan k'a fɔ ka gwɛlɛya, waasa mɔgɔ minw ye u jigi la Ala kan, olu ka u yɛrɛ bila konyuman kɛli la, o le ka nyi ani nafa b'o la mɔgɔw fɛ.

⁹Nga i k'i yɛrɛ kɔlɔsi kumakolon, ni mɔgɔ buruju fɔko, ani sɔsɔli ni sariya koo mankan ma. U tɛ foyi nya, o ye gwansan ye.

¹⁰Mɔgɔ min bɛ farali kɛ, i k'o tigi lasɔmi fɔɔ sinyɛ fila. O kɔ, i k'o tigi niin bɔ aw fɛ.

¹¹I k'a lɔn k'o mɔgɔ sifa nin ye sira tilennin bila ka ban ani a ka kojugu ye jalaki ben a kan.

¹²Ni ne ye Aritimasi, walima Tisiki ci i fɛ tuma min na, i ka banba ka na ne kunbɛn Nikopolisi, bari ne y'a latigɛ ka saminya kɛ o yɔrɔ la.

¹³I ka koo bɛɛ kɛ waasa Zenasi ale min ye mɔgɔ dɛmɛbaga ye kiti la, ani Apolɔsi nunu ka taamako bɛ nya, u kana fɔn foyi la.

¹⁴An ka mɔgɔw fana ka kan ka konyuman kɛli dege, waasa u bɛna se ka koo gwanninmanw nyanabɔ, o cogo la, u tɛna to gwansan.

¹⁵Mɔgɔ minw bɛ ni ne ye, olu bɛɛ b'i fora, i k'an teriw fo, minw kɛra Krista taw ye. Ala ka nɛɛma kɛ aw bɛɛ ye.