Read LAYIDUKURA FILEMƆN 1 Bible Online

FILEMƆN 1 - LAYIDUKURA bible

FILEMƆN 1

¹Ne Pɔli min kɛra kasoden ye Yezu Krista ka baara kɔsɔn, ne, ani an balimacɛ Timote, bɛ bataki nin ci an tericɛnyuman, n'an baarakɛnyɔgɔn Filemɔn ma,

²ani an balimamuso Afiya ma, n'an tɔnyɔgɔn Arisipi ma, ani Krista kɔmɔgɔ minw bɛ lajɛn i ka soo kɔnɔ.

³An Faa Ala ni an Matigi Yezu Krista ka nɛɛma ni hɛrɛ kɛ aw ye.

⁴Ne ka Ala daliwaatiw la ne bɛ to ka barika la Ala ye i kɔsɔn

⁵bari, i bɛ Krista kɔmɔgɔw kanu cogo min na, ani i jigi bɛ Matigi Yezu kan cogo min na, ne y'o mɛn.

⁶Ne bɛ Ala dali janko balimaya min bɛ an ni nyɔgɔn cɛ Krista barika la, o ka se ka taa nya kosɛbɛ. An ka kan ka nyumanya min bɛɛ kɛ Krista kɔsɔn, i k'o yira mɔgɔw la.[1]

⁷Ne balimacɛ, i ka kanuya ye ne dusu diya kosɛbɛ, ka jagwɛlɛya di ne ma, bari i ye Krista kɔmɔgɔw jigi tugu.

⁸Krista barika la, ne bɛ se k'i karaba ka koo dɔ kɛ.

⁹Nga kanuya kɔsɔn, ne Pɔli b'i dali, ne min kɛra cɛkɔrɔba ye, ni kasoden ye, Yezu Krista ka baara kɔsɔn.

¹⁰Ne b'i dali ne ka deen Onezimu koo la, ne ye ale min sɔrɔ Krista ye ka ne to kaso la.

¹¹Waati tɛmɛnin a tun tɛ se k'i mako nya, nga sisan a bɛ se k'i mako nya ani ka ne fana ta nya.

¹²Ne b'a kɔsegi k'a ci i ma, ale min kɛra i n'a fɔ ne yɛrɛ faan kelen.

¹³A tun ka di ne ye k'a to ne gɛrɛfɛ, a ka to ka ne dɛmɛ i nɔɔ na kaso la, ne b'o min kɔnɔ kibaru diman kɔsɔn.

¹⁴Nga ne t'a fɛ k'o kɛ n'i ma sɔn, waasa konyuman nin kana kɛ i karabako ye, ne b'a fɛ i k'o kɛ ni dusudiya ye.

¹⁵N'a sɔrɔ Onezimu tun faranna i la yan ni waati dɔɔni dɔrɔn waasa i ka se k'a sɔrɔ ka to n'a ye fɔɔ tuma bɛɛ.

¹⁶A tɛ i n'a fɔ jɔɔn dama ye tugu, nga a tɛmɛna jɔɔn kan, balima lo min koo ka gwɛlɛ ne ma. A koo fana ka kan ka gwɛlɛya e ma ka tɛmɛ ne kan a ka jɔnya la, ani balimaya la Matigi barika la.

¹⁷N'i bɛ ne jati i balima ye Krista kɔsɔn, i k'a minɛ i n'a fɔ i bɛ ne le minɛna.

¹⁸N'a ye koo dɔ kɛ i la min ma daga walima n'a ka kan ka fɛɛn dɔ kɔsegi i ma, i b'o bɛɛ to ne kunna.

¹⁹Ne Pɔli yɛrɛ le bɛ koo nin sɛbɛnna n yɛrɛ ma, ko ne bɛna juru nin sara, nga e k'a lɔn ko e yɛrɛ ye ne ta ye.

²⁰O la, ne b'i dali sɛbɛ la ne balimacɛ, ko i ka ne wasa Matigi kɔsɔn koo nin na, i ka ne dusu diya i n'a fɔ i balima Krista barika la.

²¹Ne jigi b'a la ko i kɛra mɔgɔsɛbɛ ye. O la, ne bɛ koo nin sɛbɛn k'a ci i ma, ka la a la ko i bɛna o kɛ fɔɔ ka tɛmɛ ne ka fɔta kan.

²²Ani ka fara o kan, i ka jigiyɔrɔ dɔ labɛn ne ye, bari ne lanin b'a la ko aw ka Ala dali barika la, ne bɛna sira sɔrɔ ka taa aw fɛ.

²³Epafarasi, min bɛ kaso la ni ne ye Yezu Krista ka baara kɔsɔn, ale b'i fo.

²⁴Mariki b'i fo fana ni Arisitaaki ani Demasi ni Luka, olu minw kɛra ne baarakɛnyɔgɔnw ye.

²⁵An Matigi Yezu Krista ka nɛɛma kɛ aw ye.