Read LAYIDUKURA EBURUW 1 Bible Online

EBURUW 1 - LAYIDUKURA bible

EBURUW 1

¹Fɔlɔfɔlɔ, Ala kumana an faaw fɛ kiraw barika la sinyɛ caaman ni cogo caaman na.

²Nga a kumana an fɛ laban waati nin na a Dencɛ barika la, a y'ale min kɛ fɛɛn bɛɛ kuntigi ye, ani a ye dinyɛ dan ale min barika la.

³Ala ka dawula n'a jaa tigitigi yɛrɛ lo. Dinyɛ bɛ seen kan ale ka kuma barikaman sababu la. A y'a yɛrɛ saraka mɔgɔw ka kojuguw yafa kɔsɔn ka ban tuma min na, a yɛlɛla ka taa sigi Masaba kinibolo la arijana na.

⁴Ala Dencɛ lɔyɔrɔ ka bon ni mɛlɛkɛw ta ye, fɔɔ a ye tɔgɔ d'a ma min ka bon n'u ta ye pewu.

⁵Ala delila k'a fɔ a ka mɛlɛkɛw jumɛn ye ko: “I ye ne Deen ye, ne le y'i wolo bii.” Ala ma deli k'a fɔ mɛlɛkɛ si ye fana ko: “Ne bɛna kɛ a Faa ye, a bɛna kɛ n Deen ye.”

⁶Nga, a Dencɛ min kɔnna danfɛnw bɛɛ nya, ale wolola tuma min na dinyɛ na, a y'a fɔ ko: “Mɛlɛkɛw bɛɛ k'u kunbiri gwan a nyakɔrɔ.”

⁷A fɔra mɛlɛkɛw koo la ko: “A bɛ mɛlɛkɛw kɛ fɔnyɔ ye, a b'a ka baarakɛlaw kɛ tasuma ye.”

⁸Nga a y'a fɔ a Deen koo la ko: “Ala! E ka masaya tɛna ban abada! E b'i ka jama mara ni tilenninya ye.

⁹Tilenninya koo ka d'i ye, kojugu man d'i ye. O le y'a to, e ka Ala y'e woloma ka bonya ni nisɔndiya d'i ma ka tɛmɛ i tɔnyɔgɔnw kan.”

¹⁰Ala y'a fɔ tugu ko: “Ele Matigi le ye dugukolo dan kabini fɔlɔfɔlɔ, sankolo ye i bolonɔ ye.

¹¹Olu bɛɛ bɛna ban. Nga e tɛ ban. Tinyɛ na, u bɛɛ bɛna kɔrɔ i n'a fɔ fani.

¹²Mɔgɔ bɛ duloki kuru cogo min na, i bɛna u kɛ ten. Fani donta bɛ yɛlɛma cogo min na, i bɛna u yɛlɛma ten. Nga e kɔni bɛ to i cogo la, i tɛ kɔrɔ.”

¹³Ala delila k'a fɔ mɛlɛkɛw jumɛn ye ko: “Sigi ne kinibolo la fɔɔ ne k'i juguw bila i seen kɔrɔ?”

¹⁴Mɛlɛkɛ bɛɛ tɛ baara kɛra Ala le ye wa? Mɔgɔ minw bɛna kisi, a tɛ to k'u ci ka olu dɛmɛ wa?