Read LAYIDUKURA EBURUW 10 Bible Online

EBURUW 10 - LAYIDUKURA bible

EBURUW 10

¹Zuwifuw tun bɛ hɛrɛ nata min kɔnɔna, sariya tun ma kɛ o yɛrɛ yɛrɛ ye, a kɛra o jaa ye. A tɛ se k'u labatobagaw kɛ mɔgɔdafaninw ye Ala nyakɔrɔ saraka bɔtaw barika la, u b'o minw kɛ tuma o tuma ni saan o saan, daan t'a la.

²N'o tun bɛ fɛɛn nya, u tun tɛna to k'o kɛ tugu. Bari n'a kuun ye u saniyako ye, n'u tun y'o bɔ ka ban, minw tun b'o kɛ ka Ala bato, olu hakili tun tɛna jigi u ka kojugu la tugu do.

³Nga, saan o saan, saraka nunu bɛ to k'u hakili jigi u ka kojuguw koo la.

⁴Bari turaw ni bakɔrɔninw joli tɛ se ka mɔgɔ ka kojuguw yafa abada.

⁵O kama, sanni Krista ka na dinyɛ na, a y'a fɔ Ala ye ko: “E ko i tɛ saraka ni sɔnnifɛn fɛ, nga i ye ne kɛ mɔgɔ ye.

⁶Ka begɛn faga k'a jɛni, walima k'a joli bɔn kojugu yafa kɔsɔn, o si ma i nyaa fa.

⁷O la, ne y'a fɔ ko n filɛ nin ye n ka Ala, ne nana i sago kɛ kama ka kɛnyɛ ni min fɔra kitabu kɔnɔ ne koo la.”

⁸Krista kɔnna k'a fɔ ko: “Saraka, ni sɔnnifɛn, ni begɛn jɛnita, ani kojugu yafa saraka, i tun t'o si fɛ, o si ma diya i ye.” K'a sɔrɔ o koo nunu tun bɛ kɛ ka kɛnyɛ ni sariya ye.

⁹O kɔ, a y'a fɔ ko: “Ne filɛ, ne nana i sago kɛ kama.” O cogo la, Krista bɛ landakɔrɔ bɔ yen ka landakura sigi.

¹⁰A ye Ala sago kɛ k'a yɛrɛ saraka sinyɛ kelenpe minkɛ, o min nyɔgɔn tɛna kɛ tugu, anw saniyara o le barika la.

¹¹Sarakalasebagaw bɛ to u seen kan loon o loon k'u ka baara kɛ ka to k'o saraka kelen nunu bɔ. O min tɛ se cogo si la ka kojuguw yafa.

¹²Nga Krista kɔni, ale y'a yɛrɛ di sinyɛ kelenpe kojuguw yafa kɔsɔn, ka sɔrɔ ka taa sigi Ala kinibolo la kudayi,

¹³yan ni Ala k'a juguw majigi a kɔrɔ.

¹⁴A bɛ mɔgɔ minw saniya, a y'olu kɛ mɔgɔdafaninw ye a ka saraka kelen barika la, u fana bɛ to ten tuma bɛɛ.

¹⁵Nii Senuman fana b'o le fɔ ka gwɛ an ye ko:

¹⁶“Ne bɛna jɛnnyɔgɔnya min sigi n'u ye o loonw tɛmɛnin kɔ, o filɛ nin ye, ne Matigi le ko ten. Ne bɛna n ka sariya koo don u dusu la, n koo ka to u kɔnɔ.

¹⁷Ne tɛna u ka kojugu kɛninw n'u ka filikow to n dusu la tugu.”

¹⁸O la do, ni yafa sɔrɔla koo min na ka ban, saraka bɔkun t'o koo la tugu.

¹⁹O kɔsɔn, n badenw, sira dinin b'an ma ka don Yɔrɔ Senuman Senuman na Yezu joli bɔnin sababu la.

²⁰A ye sirakura nyanaman dayɛlɛ an ye, fɛɛn min tun bɛ mɔgɔ bali ka don yen, a y'o bɔ yen a ka saya[3] barika la.

²¹Sarakalasebagaw kuntigiba b'an fɛ Ala ka soo kunna.

²²O la sa, an ka miirijuguw bɔ an kɔnɔ, k'an yɛrɛ saniya ni jinyuman ye, ka gwɛrɛ Ala la ni kɔnɔgwɛ ye, ni jigisigi ye.

²³An ko jigi min b'an fɛ, an kana an fari faga o koo la. Bari Ala min y'a daa di, kantigi lo.

²⁴An ka jija ka nyɔgɔn dɛmɛ ka kanuya sira taama, ka konyuman kɛ.

²⁵An kana ban ka taa an ka nyɔgɔnlajɛnyɔrɔ la, i n'a fɔ dɔw bɛ to k'a kɛ cogo min na. Nga an ka nyɔgɔn jaa gwɛlɛya, bari aw yɛrɛ nyaa b'a la ko Matigi ka loon surunyana ka ban.

²⁶An minw bɛ tinyɛ lɔn ka ban, n'an bɛ to ka tugu ka kojugu kɛ, saraka wɛrɛ tɛ yen min bɛ se ka kojugu yafa.

²⁷Siranyako le tora sisan, o ye kiti ni tasumaba ye o minw bɛna Ala juguw halaki.

²⁸Ni mɔgɔ o mɔgɔ ye Musa ka sariya cɛn, ni seere fila, walima saba, sɔrɔla k'a fɔ ko tinyɛ lo, o tigi ka kan ka faga, u man kan ka makari a la yɛrɛ.

²⁹Nga min ka jugu n'o ye, o ye ka Ala Dencɛ dɔgɔya, walima k'a fɔ ko Yezu joli min ye jɛnnyɔgɔnya sigi Ala ni mɔgɔ cɛ, k'o ye fu ye. K'a sɔrɔ o joli nin le y'o tigi saniya. Walima ka Nii Senuman tɔgɔjugu fɔ, o min ye makaritigi ye. O tigi ka sara ka jugu ka tɛmɛ.

³⁰Bari, min y'a fɔ ko: “Ne le ka kan ka kojugu juru sara, ne le bɛna mɔgɔw sara,” an b'o tigi lɔn. A y'a fɔ tugu ko: “Ne Matigi le bɛna n ka mɔgɔw kiti.”

³¹Ala ka mɔgɔ jalaki, o ye jatigɛko ye.

³²Aw k'aw hakili jigi aw ka lanaya daminɛtuma na. Aw ye Ala ka yeelen sɔrɔ dɔrɔn, tɔɔrɔ jugumanw daminɛna nga aw jijara.

³³Yɔrɔ dɔ, u tun b'aw nɛni k'aw tɔɔrɔ jama nyana. Yɔrɔ wɛrɛ, aw le jijanin bɛ ka tɔɔrɔbagaw dɛmɛ.

³⁴Aw sɛgɛnna ni kasodenw ye u ka tɔɔrɔw la. Aw sɔnna k'aw ka bololafɛnw to u bɔsibagaw bolo ni nisɔndiya ye. Bari, aw ko nafolo wɛrɛ b'aw fɛ min ka fisa n'o ye n'a tɛ ban abada.

³⁵Aw jigi kana tigɛ, bari a nafa ka bon.

³⁶O la, fɔɔ aw ka jija janko n'aw ye Ala sago kɛ ka ban tuma min na, a y'a daa di min na, aw k'o sɔrɔ.

³⁷Tinyɛ na, a fɔra Ala ka kuma na ko: “A tora dɔɔni dɔrɔn, min ka kan ka na, a bɛna na. A tɛna mɛn ka na.

³⁸Mɔgɔ min y'a jigi la ne kan, ne ka sɔrɔ k'a jati mɔgɔtilennin ye, o tigi bɛna kisi.” Nga n'a segira kɔ, a nigɛ bɛ bɔ n na.

³⁹Minw bɛna segi kɔ ka halaki, anw tɛ olu dɔw ye. Anw ye jigitigiw ye minw bɛna kisi.