Read LAYIDUKURA EBURUW 11 Bible Online

EBURUW 11 - LAYIDUKURA bible

EBURUW 11

¹Jigiko ye min ye, o ye nin ye: i bɛ la fɛɛn dɔ la, k'i jigi la a kan k'a sɔrɔ i m'a ye ka ye.

²Fɔlɔfɔlɔ mɔgɔw ye tɔgɔnyuman sɔrɔ Ala fɛ u jigi kɔsɔn.

³An jigi bɛ Ala kan minkɛ, o sababu la, an y'a lɔn ko dinyɛ danna Ala ka kuma seen fɛ. O la, an bɛ fɛɛn minw yera, an b'a lɔn k'olu juu bɔra fɛɛn wɛrɛ la an tɛ se k'o min ye.

⁴Abɛli jigi tun bɛ Ala kan minkɛ, o le y'a to a ye saraka bɔ o min diyara Ala ye ka tɛmɛ a kɔrɔcɛ Kayɛn ta kan. A y'a jigi la Ala kan minkɛ, o le y'a to, Ala y'a jati mɔgɔtilennin ye ka sɔn a ka saraka ma. Abɛli ka jigi kɔsɔn, a ka kuma bɛ seen kan halibi k'a sɔrɔ a yɛrɛ tɛ sii la.

⁵Enɔki y'a jigi la Ala kan, o le y'a to Ala y'a ta ka bɔ dinyɛ na, waasa a kana sa. Mɔgɔ si nyaa ma la Enɔki kan tugu, bari Ala tun y'a ta. A fɔra Ala ka kuma na ko sanni Ala k'a ta, a koo tun ka di Ala ye.

⁶Mɔgɔ koo tɛ se ka diya Ala ye n'o tigi ma l'a la. Bari mɔgɔ min b'a fɛ ka gwɛrɛ Ala la, fɔɔ a ka l'a la ko a bɛ yen, ani ko a b'a yɔrɔ nyinibagaw wasa.

⁷Nuhun jigi tun bɛ Ala kan minkɛ, o le y'a to koo min ma kɛ ka ye, Ala y'a lasɔmi o koo la tuma min na, a siranna Ala nya ka kurunba dilan k'a ka soo kisi, dinyɛ halakira. A jigi sababu la, Ala y'a jati mɔgɔtilennin ye.

⁸Ala y'a fɔ Ibrayima ye ko a ka bɔ ka taa jamana dɔ la, ko ale bɛna o tigiya d'a ma. Ibrayima y'a jigi la a kan minkɛ ka sɔn a ta ma, a wilila ka taa k'a sɔrɔ a tun t'a taayɔrɔ lɔn.

⁹O jigi nin barika la, a nana sigi lonanya la o jamana nin kɔnɔ, Ala tun ye layidu ta a ye o min koo la. A tora faniso kɔnɔ yen, ani Isiyaka ni Yakuba. Ala tun y'a daa di olu fana ma o koo kelen nin na.

¹⁰Bari Ibrayima tun b'a fɛ ka dugu sɔrɔ, min lɔra ka nya, Ala yɛrɛ bɛ kɛ o min konya nyanabɔbaga n'a lɔbaga ye.

¹¹O jigi kelen kɔsɔn, Sara fana sera ka deen sɔrɔ a n'a ka musokɔrɔninya bɛɛ. Bari a lar'a la ko Ala y'a daa di koo min na, ko a b'o kɛ.

¹²O cogo la, cɛɛ kelen min tun sera saya ma ka ban yɛrɛ, ale sababu la, jamaba sɔrɔla, minw ka ca i n'a fɔ lolow, u daa tɛ lɔn i n'a fɔ bada la cɛncɛn.

¹³Ala y'a daa di koo min na, u bɛɛ jigi tora o kan fɔɔ ka taa sa n'u ma o sɔrɔ. U nyaa y'a ye yɔrɔjan ka nisɔndiya o koo la. U y'a yira ten k'olu ye lonanw ye, k'u tɛmɛtɔ lo dinyɛ na.

¹⁴Mɔgɔ minw bɛ kuma ten, a bɛ lɔn ko u b'u faso nyinina.

¹⁵U bɔra yɔrɔ min na ka kɔrɔ, n'u hakili tun jigira o yɔrɔ koo la, u tun bɛ se ka segi yen.

¹⁶Nga u ka miiri bɛ fasonyuman kan, n'o ye arijana ye. O kama, n'u bɛ Ala wele k'u ka Ala, o t'a maloya. Bari a ye yɔrɔ labɛn u ye.

¹⁷Ala ye Isiyaka nyini Ibrayima fɛ saraka ye waasa k'a kɔrɔbɔ. Jigi kɔsɔn, a ma ban k'a deen kelenpe nin kɛ saraka ye. K'a sɔrɔ Ala tun y'a daa di a ma

¹⁸k'a fɔ a ye ko a kɔmɔgɔw bɛna jati k'a ta Isiyaka le ma.

¹⁹Ibrayima lanin tun b'a la ko Ala bɛ se ka suu kunun. O cogo la, an bɛ se k'a fɔ ko Ala ye Isiyaka bɔsi saya la k'a di Ibrayima ma.

²⁰Isiyaka fana ka jigi kɔsɔn, a ye duba kɛ a deen Yakuba ni Ezawu ye, u ka sininyasigi kama.

²¹Yakuba ka jigi kɔsɔn, a tun bɛ nyini ka sa tuma min na, a ye duba kɛ Yusufu deenw kelen kelen bɛɛ ye, k'a sɔrɔ ka tintin a ka bere kan ka Ala fo.

²²Yusufu ka jigi kɔsɔn, a satuma surunyana tuma min na, a y'a fɔ ko Isirayɛlidenw bɛna na bɔ Ezipiti jamana kɔnɔ loon dɔ. O la, a ye kangari la u ye a kolow koo la.

²³Jigi kɔsɔn, Musa wolobagaw ma siran masacɛ ka sariya nya. U ye Musa dennyɛninman dogo fɔɔ kalo saba, bari a tun cɛɛ ka nyi kosɛbɛ.

²⁴Musa kɔgɔra tuma min na, a ka jigi kɔsɔn, a banna k'u kana ale wele ko Fara;nɔn denmuso ka deen.

²⁵A sɔnna ka tɔɔrɔ ni Ala ka mɔgɔw ye sanni a ka to lafiya la waati dɔɔni kojugu la.

²⁶A banna Ezipiti nafolo la ka sɔn dɔgɔya ma i n'a fɔ Krista, bari a nyaa tun bɛ tɔnɔ nata la min ka fisa.

²⁷Musa ka jigi kɔsɔn, a ma siran masacɛ nya ka bɔ Ezipiti jamana na. A jijara kosɛbɛ i n'a fɔ a nyaa bɛ Ala la, mɔgɔ nyaa tɛ o min na.

²⁸A ka jigi kɔsɔn, a ye Hɔrɔnya nyanagwɛ labɛn ka joli seriseri bondaw la waasa deen fɔlɔ fagabaga kana se Isirayɛlidenw ma.

²⁹Isirayɛlidenw ye Kɔgɔjiwulen tigɛ u seen na, u ka jigi barika la. Nga Ezipitikaw k'u b'a tigɛ, olu tununa jii la.

³⁰Isirayɛlidenw ka jigi kɔsɔn, u taamana ka Zeriko lamini tile wolonwula dɔrɔn, a laminikogo benna.

³¹Kakalamuso Araabu ka jigi kɔsɔn, a ye Isirayɛlidenw ka cidenw sutura. O la, minw banna Ala la, ale ma sɔrɔ ka sa ni olu ye.

³²N ka mun fɔ tugu? N tɛna se ka Zedeyɔn ni Baraki ni Samusɔn ni Zefite ni Dawuda ni Samuyɛli ani kiraw ka koow bɛɛ nyafɔ kelen kelen.

³³U ka jigi kɔsɔn, u sera jamana wɛrɛw kɔrɔ k'u mara, ka tilenninya sigi. Ala y'a daa di min na, u y'o sɔrɔ. U ye jaraw daaw siri,

³⁴tasuma dɛsɛra u kɔrɔ, u kisira murujan ma, u ye barika sɔrɔ bana sɔrɔnin kɔ. U kɛra kɛlɛden;nanaw ye, u y'u juguw gwɛn.

³⁵Muso dɔw ka jigi kɔsɔn, u ka mɔgɔ saninw kununna. Dɔw fana sɔnna tɔɔrɔ ma waasa Ala k'u kunun sini.

³⁶Dɔw fana sɔnna dɔgɔya ni bugɔri ma. U ye dɔw siri ni jɔrɔkɔw ye k'u don kaso la.

³⁷U ye dɔw bonbon ni bɛrɛ ye, ka dɔw cɛtigɛ ni kakanan ye, ka dɔw faga ni murujan ye. Dɔw tun bɛ munumunu ni sagagolo, walima bagolo ye u kaan na. U dɛsɛra, u tɔɔrɔla kosɛbɛ.

³⁸Dinyɛ tun tɛ se ka bɛn n'u ye, bari u tun man kan n'u ye. O la, u tora ka yaalayaala kongokolon kɔnɔ ni kuluw kan, ka la farawow la, ani dingɛw kɔnɔ.

³⁹Ala y'u bɛɛ tɔgɔnyuman fɔ u ka jigi barika la. Nga Ala y'a daa di min na, u si m'o sɔrɔ.

⁴⁰Bari Ala ye fɛnnyuman labɛn an ye min ka fisa. A tun t'a fɛ o bɛɛ ka kɛ an kɔ.