Read LAYIDUKURA EBURUW 12 Bible Online

EBURUW 12 - LAYIDUKURA bible

EBURUW 12

¹Ayiwa, an lamininin bɛ ni seere caaman ye minkɛ, koo o koo b'an ka boli nin nagasi, an k'o bɛɛ dabila. Kojugu min ka teli ka see sɔrɔ an kan, an k'o dabila. Boli min b'an seen kɔrɔ, an kana sɛgɛn o la.

²An k'an nyaa lɔnin to Yezu kan ale min ye an jigi bɔyɔrɔ ye, n'a laban ye. A sɔnna ka tɔɔrɔ gwengwen lɔgɔ kan, a m'o maloya yɛrɛ jati, bari nisɔndiya min tun b'a kɔnɔna, a nyaa tun b'o la. Sisan, a siginin bɛ Ala kinibolo la.

³O la do, ale min ye tɔɔrɔ caaman munyu kojugukɛlaw bolo, aw k'aw hakili to ale la janko aw kana sɛgɛn, aw fari bɛ faga.

⁴Aw bɛ bondori min kɛ kojugu koo la, o ma se jolibɔn ma fɔlɔ do.

⁵Aw nyinɛna denfaw ka ladili nin na wa? O min ko: “N deen, i kana ban Matigi ka ladili ma. N'a b'i ladira, i kana i fari faga.

⁶Bari mɔgɔ min koo ka di Matigi ye, a b'o le ladi. A sɔnna ka min kɛ a deen ye, a b'o le nyaa gwan.”

⁷Aw ka hɛrɛ kɔsɔn lo aw bɛ tɔɔrɔla. Ala b'aw minɛ i n'a fɔ a deenw. Deen jumɛn bɛ yen n'a faa t'a ladi?

⁸Ala b'a ka deenw bɛɛ ladi. N'a t'aw ladi, o tuma na aw tɛ a deenw ye, aw ye nyamɔgɔdenw le ye.

⁹An wolofaw y'an ladi, an sɔnna u ta ma. An Faa Ala min ye nii tigi ye, mun na an tɛna sɔn o ta ma ka to hɛrɛ la?

¹⁰An wolofaw ka ladili ye waati dɔɔni koo ye, u tun b'an ladi ka kɛnyɛ n'u ka miiriya ye. Nga Ala b'an ladi an ka nya kɔsɔn waasa an ka kɛ mɔgɔnyumanw ye i n'a fɔ ale.

¹¹N'u b'i ladi tuma min na, a man di dɛ! O bɛ digi i la. Nga kɔfɛ, ladili nafa ye hɛrɛ ni tilenninya ye, a tigi b'o min sɔrɔ.

¹²O kama, aw k'aw bolo faganin nunu kɔrɔ ta, aw seen minw bɛ yɛrɛyɛrɛ, k'o lɔ ka nya,

¹³ka siratilennin taama, o la, minw seen kelen ma nyi, u seen kana mugu, nga a ka suma.

¹⁴Aw ka banba ka bɛn ni mɔgɔw bɛɛ ye. Aw taamacogo fana ka nya, n'o tɛ mɔgɔ si tɛna Matigi ye.

¹⁵Aw k'aw yɛrɛ minɛ waasa mɔgɔ si kana muruti ka ban Ala ka nɛɛma na. Mɔgɔ si kana kɛ yirijugu ye ka wili aw cɛma ka nyagami don ka mɔgɔ caaman halaki.

¹⁶Mɔgɔ si kana kɛ kakala ye, walima Alanyasiranbali ye, i n'a fɔ Ezawu, ale min y'a ka kɔrɔya falen dumuni na.

¹⁷Aw b'a lɔn k'o kɔfɛ, a tun b'a fɛ u faa bɛ duba nin kɛ ale ye, nga o banna. A ye dalili kɛ ka kasi nga o m'a nya.

¹⁸Fɔlɔfɔlɔ mɔgɔw gwɛrɛla Ala ka kulu la cogo min na, mɔgɔ bɛ se ka maga o min na, aw ma gwɛrɛ o la ten. Olu ye tasuma ye, ni kabafin, ni dibiba, ni sanfɔnyɔjugu,

¹⁹ka buru fiyɛkan ni kumakanba mɛn. O mɛnbagaw ma se, u ko Ala yɛrɛ kana kuma olu fɛ tugu.

²⁰Bari sariya min tun sigira, u tun tɛ se o kɔrɔ. A tun fɔra ko: “Mɔgɔ si man kan ka yɛlɛ kulu nin kan, hali begɛn. Ni fɛɛn o fɛɛn yɛlɛla, o ka kan ka bon ka faga.”

²¹Koo nin siranya tun ka bon haali, fɔɔ Musa y'a fɔ ko: “Ebe! Ne bɛ yɛrɛyɛrɛla siranyakojugu fɛ.”

²²Nga aw kɔni, aw gwɛrɛla Siyɔn kulu ni Ala ka dugu la, n'o ye sankolo Zeruzalɛmu ye, ka gwɛrɛ mɛlɛkɛ caaman caaman na n'u bɛ nyanagwɛ la.

²³Mɔgɔ fɔlɔ minw tɔgɔ sɛbɛnnin bɛ arijana na, aw gwɛrɛla olu la, ka gwɛrɛ Ala la, adamadenw bɛɛ kitibaga. Mɔgɔtilennin minw y'u nakun dafa, aw gwɛrɛla olu la.

²⁴Yezu min ye jɛnnyɔgɔnyakura sindibaga ye, aw gwɛrɛla ale la, a joli min bɔnna, aw gwɛrɛla o la. O joli nin bɛ fɛnnyuman d'an ma ka tɛmɛ Abɛli kan.

²⁵Min bɛ kumana aw fɛ, aw ye jija, aw kana ban a ka kuma na. Bari fɔlɔ mɔgɔw banna Ala ka kuma fɔbaga ma, o min tun b'u cɛma dugukolo kan. O la, u ma kisi nyagwan ma. Min bɛ to arijana na ka kuma an fɛ, n'an banna ale la, an ka nyagwan tɛna tɛmɛ fɔlɔ mɔgɔw ta kan wa?

²⁶Min kumakan tun ye dugukolo yɛrɛyɛrɛ, sisan ale ko: “Ne bɛn'a to dugukolo bɛ yɛrɛyɛrɛ sinyɛ kelen tugu, nga a tɛna dan o ma, sankolo fana niin bɛna sɔrɔ a la.”

²⁷N'a fɔra ko “sinyɛ kelen tugu,” o kɔrɔ ko fɛɛn minw bɛna yɛrɛyɛrɛ, olu bɛna tunu. Minw tɛ yɛrɛyɛrɛ, olu bɛ to yen.

²⁸Ayiwa, Ala bɛna sigiyɔrɔ d'an ma min tɛ se ka yɛrɛyɛrɛ minkɛ, o la, an k'a fo k'a bato, ka kɛnyɛ n'a yɛrɛ sago ye, ni yɛrɛmajigi ni siranya ye.

²⁹Bari, an ka Ala ka fari i n'a fɔ tasuma.