Read LAYIDUKURA EBURUW 13 Bible Online

EBURUW 13 - LAYIDUKURA bible

EBURUW 13

¹Nyɔgɔnkanuya ka barika sɔrɔ aw cɛma.

²Aw hakili ka to a la ko aw ka kan ka lonanw ladon. Lonanladon sababu la, dɔw ye mɛlɛkɛw ladon k'a sɔrɔ u m'a lɔn ko mɛlɛkɛw lo.

³Aw k'aw hakili to kasodenw na, k'a kɛ i n'a fɔ aw fana bɛ kaso la n'u ye. U bɛ minw tɔɔrɔla aw k'aw hakili to u la, i n'a fɔ aw yɛrɛ tun bɛ tɔɔrɔla.

⁴Mɔgɔ bɛɛ ka furu bonya, kakalaya kana kɛ furu kɔnɔ. Bari Ala bɛna nyamɔgɔyakɛlaw ni kakalaw kiti.

⁵Wari nyiniko kana finyɛ don aw si taamacogo la. Min b'aw bolo, o k'aw wasa. Bari Matigi yɛrɛ le ko: “Ne tɛna i to i kelen, n tɛna i bila abada.”

⁶Anw b'an jigi la a kan o tuma na k'a fɔ ko: “Matigi ye ne dɛmɛbaga ye, ne tɛna siran foyi nya. Adamaden bɛ se ka mun kɛ ne la?”

⁷Aw k'aw hakili jigi aw ka nyamɔgɔw la. Olu minw ye Ala ka kuma fɔ aw ye. U sii labanna cogo min na, aw k'o jati k'u taamacogo ladege.

⁸Yezu Krista tun bɛ cogo min na kunun, a b'o cogo kelen le la bii, a bɛna kɛ ten fana tuma bɛɛ.

⁹Aw kan'a to mɔgɔ si k'aw kuun nyagami ni kalan wɛrɛ ye. Ayiwa, a ka nyi an ka jagwɛlɛya sɔrɔ Ala ka nɛɛma barika la. O kana kɛ landa dumuni dɔw barika la, o min ma deli ka nafa di o dumubagaw ma ka ye.

¹⁰Mɔgɔ minw tun bɛ baara kɛ Alabatoyɔrɔ la fɔlɔfɔlɔ, olu tɛ se k'u niyɔrɔ sɔrɔ an ka sisan Alabatoyɔrɔ dumuni na.

¹¹Sarakalasebagaw kuntigiba bɛ don ni begɛn min joli ye Yɔrɔ Senuman Senuman na, kojuguw yafali kama, o sogo nin bɛ jɛni dugu kɔfɛ le.

¹²O kama, Yezu bɔra dugu kɔfɛ k'a yɛrɛ saraka ka mɔgɔw saniya k'u bɔ u ka kojuguw la n'a yɛrɛ joli ye.

¹³O tuma na, n'an b'a fɛ ka ta'a kunbɛn, an ka sɔn dɔgɔya ma ka bɔ dugu kɔfɛ i n'a fɔ ale.

¹⁴Bari dinyɛ tɛ an ka soo ye. Nga an bɛ sini soo le nyinina.

¹⁵O la, an ka Ala fo Yezu sababu la tuma o tuma, o min ye an ka saraka ye. O kɔrɔ ko an k'a tɔgɔ tando n'an daa ye.

¹⁶Aw kana nyinɛ ka nyumanya kɛ, ani ka nyɔgɔn dɛmɛ. O saraka nunu nyɔgɔn le ka di Ala ye.

¹⁷Aw ka mɛnni kɛ aw ka nyamɔgɔw fɛ, aw k'aw yɛrɛ majigi u ye. Bari olu le bɛ janto aw la Alasira la, aw kɛra u ka doni ye Matigi nyakɔrɔ. Aw ka sɔn u ta ma waasa u dusu ka diya u ka baara la. N'u dusu ma diya, o y'aw ka bɔnɛ ye.

¹⁸Aw ka Ala dali anw ye. Anw kɔni lanin b'a la ko an kɔnɔ gwɛnin lo, ko an b'a fɛ an taamacogo ka nya tuma bɛɛ.

¹⁹N b'a nyini aw fɛ kosɛbɛ ko aw ka Ala dali waasa ne ka se ka segi aw fɛ joona.

²⁰Hɛrɛ masa, Ala min ye jɛnnyɔgɔnya cɛnbali sigi n'an Matigi Yezu joli ye, ale min y'a sanin kunun k'a kɛ a ka jama kɔlɔsibaga ye,

²¹a yɛrɛ ka barika don aw la, aw ka se ka konyuman sifa bɛɛ kɛ, k'a sago kɛ. Koo min ka di a yɛrɛ ye, a k'o kɛ an ye Yezu Krista barika la. Bonya ka la ale kan tuma bɛɛ. Amiina.

²²N badenw, ne b'aw dali, aw ka ladilikuma nunu lamɛn kosɛbɛ, bari a man ca.

²³Ayiwa, n b'a fɔ aw ye ko u y'an badencɛ Timote labila. N'a sera n fɛ yan joona, an bɛna na nyɔgɔn fɛ aw fɛ yen.

²⁴Ne b'aw ka nyamɔgɔw bɛɛ fo, ka Ala ka jama bɛɛ fo. Italikaw b'aw fo.

²⁵Ala k'a ka nɛɛma kɛ aw bɛɛ ye.