Read LAYIDUKURA EBURUW 2 Bible Online

EBURUW 2 - LAYIDUKURA bible

EBURUW 2

¹O le kɔsɔn, n'an t'a fɛ ka halaki sira kan, an ye tinyɛkuma min mɛn, fɔɔ an k'o minɛ ni sɛbɛ ye.

²Mɛlɛkɛw tun ye kuma min fɔ, o jatira fɛnba ye. Minw tun m'o labato, tɔɔrɔ min tun ka kan n'u ye, o y'o sɔrɔ.

³Matigi kɔnna ka kisili min koo fɔ, n'o mɛnbagaw nana o gwɛya an ye, o min ye koba ye, n'an m'o jati, an bɛna se ka kisi cogo di?

⁴Ala yɛrɛ y'a yira k'o mɔgɔ nunu ka kuma ye tinyɛ ye taamasinyɛw ni kabako sifa bɛɛ fɛ, ani seko dɔw fɛ a ye minw di mɔgɔw ma Nii Senuman barika la, ka kɛnyɛ n'a yɛrɛ sago ye.

⁵An bɛ sini min koo fɔra, Ala m'o kuntigiya di mɛlɛkɛw ma do.

⁶Nga a fɔra Ala ka kuma yɔrɔ dɔ la ko: “Ala, mɔgɔ ye mun ye n'i b'i hakili to a la? Adamaden ye mun ye n'i b'i janto a la?

⁷I y'a majigi mɛlɛkɛw ye waati kunkurunnin dɔrɔn kɔnɔ. I ye kunkɔrɔta ni nɔɔrɔ d'a ma,

⁸k'a sigi fɛɛn bɛɛ kunna.” O kɔrɔ k'o fɛɛn tɛ yen min t'a ka kuntigiya kɔrɔ. K'a sɔrɔ an b'a ye bii ko a ka kuntigiya ma se fɛɛnw bɛɛ ma fɔlɔ.

⁹An y'a kɔlɔsi k'a ye ko Ala ye Yezu majigi mɛlɛkɛw ye waati kunkurunnin kɔnɔ. A sɔnna ka tɔɔrɔ ka sa mɔgɔw bɛɛ kɔsɔn, Ala ka nɛɛma barika la. Sisan a ye kunkɔrɔta ni nɔɔrɔ sɔrɔ.

¹⁰Ala min ye fɛɛn bɛɛ dan a yɛrɛ ye, a tun ka kan ka Kisibaga ka nakun dafa tɔɔrɔ barika la ka mɔgɔ caaman sama ka se a ka nɔɔrɔ yɔrɔ la.

¹¹Yezu min bɛ mɔgɔw saniya Ala faan fɛ, a tɛ siga k'o mɔgɔsaniyaninw wele ko a badenw, bari u bɛɛ bɔra yɔrɔ kelen na.

¹²O la, a tun y'a fɔ ko: “Ala, ne bɛna i koo fɔ ne badenw ye, ne bɛna i tando jama cɛma.”

¹³Ko: “Ne bɛna n jigi la i kan.” A y'a fɔ fana ko: “Ala ye deen minw di ne ma, ne n'olu bɛ yan nyɔgɔn fɛ.”

¹⁴O la, Yezu ye farisogo ta, ka na wolo i n'a fɔ mɔgɔ tɔw bari deen nunu ye adamadenw ye. A y'o kɛ janko a ka saya sababu la, a ka se ka Sutana ka koo nagasi o min ye saya bɔyɔrɔ ye,

¹⁵ani minw tun kɛra i n'a fɔ jɔɔnw saya ka nyasiran kɔsɔn, a k'olu kunmabɔ.

¹⁶A ma kɛ ko a bɛ mɛlɛkɛw dɛmɛna, a bɛ Ibrayima deenw le dɛmɛna.

¹⁷O kama, a tun ka kan ka kɛ a badenw bɔnyɔgɔnko ye koo bɛɛ la, janko a ka kɛ sarakalasebaga kuntigiba tilennin ye min bɛ makari mɔgɔw la, ka baara kɛ Ala ye, ani ka kɛ sababu ye mɔgɔw ka kojuguw ka yafa.

¹⁸Yezu yɛrɛ ye tɔɔrɔ sɔrɔ, o la, minw bɛ tɔɔrɔla, a bɛ se k'u dɛmɛ.