Read LAYIDUKURA EBURUW 4 Bible Online

EBURUW 4 - LAYIDUKURA bible

EBURUW 4

¹Ala y'a daa di ko an bɛna se ka don ka lafinyɛ a ka yɔrɔ labɛnnin kɔnɔ. O dadili nin bɛ seen kan halibi. O la, an k'an yɛrɛ minɛ waasa mɔgɔ si kana to kɔfɛ.

²Anw ye Ala ka kuma min mɛn, olu fana tun y'o mɛn. Nga o ma foyi nya u ye bari u ma u jigi la a kan.

³An minw y'an jigi la a kan, an bɛna don o lafinyɛyɔrɔ nin na, Ala y'a fɔ o min koo la ko: “Dimikojugu fɛ, ne y'a fɔ ko u tɛna sɔrɔ ka don n ka lafinyɛyɔrɔ la.” Ayiwa, koo bɛɛ tun labɛnna ka ban dinyɛ dantuma na.

⁴A fɔra lɔgɔkun laban loon koo la Ala ka kuma na ko: “Ala tilara a ka baara bɛɛ la, ka lafinyɛ a tile wolonwulanan loon.”

⁵A fɔra ka tɛmɛ ko: “U tɛna sɔrɔ ka don n ka lafinyɛyɔrɔ la.”

⁶Ayiwa, minw tun kɔnna ka Ala ka kuma mɛn, olu ma se ka don o lafinyɛyɔrɔ nin na kuma nin labatobaliya kɔsɔn. O la, dɔ wɛrɛw bɛna don yen.

⁷Ala tun ye waati wɛrɛ latigɛ k'o wele ko Bii, a mɛnna, Dawuda tun y'a fɔ Ala barika la i n'a fɔ a fɔra kɔfɛ cogo min na ko: “N'aw ye Ala kumakan mɛn bii, aw kana tulogwɛlɛya kɛ.”

⁸Ni Isirayɛlidenw tun donna lafinyɛyɔrɔ nin na Zozuwe sababu la, Ala tun tɛna lafinyɛlon wɛrɛ kuma fɔ tugu do.

⁹Ayiwa, lafinyɛlon nyanaman maranin bɛ Ala ka jama ye.

¹⁰Bari, min donna Ala ka lafinyɛyɔrɔ la, o fana bɛ lafinyɛna a ka baara la i n'a fɔ Ala, lafinyɛlon na.

¹¹An ka jija o tuma na ka don o lafinyɛyɔrɔ nin na. An k'an yɛrɛ minɛ waasa mɔgɔ si kana dɛsɛ o yɔrɔ donko la i n'a fɔ Isirayɛliden nunu, Ala ka kuma labatobaliya kɔsɔn.

¹²Ala ka kuma nyanaman lo, fanga b'o la. A ka fari ni muru dadiman faan fila ye. A bɛ don mɔgɔ dusu la fɔɔ ka se ka nii faran ka bɔ adamadenya la, ani ka kolo ni sɛnmɛ bɔ nyɔgɔn na. A bɛ mɔgɔ ka miiri, n'a kɔnɔnako bɛɛ sɛgɛsɛgɛ k'u lɔn.

¹³O danfɛn tɛ yen Ala nyaa tɛ min ye. U bɛɛ b'a nyakɔrɔ, u si dogonin tɛ a nyana. An bɛna an ka koow bɛɛ nyafɔ ale le ye.

¹⁴Ayiwa, sarakalasebagaw kuntigiba nyanaman b'an fɛ minkɛ, n'o ye Ala Dencɛ Yezu ye, ale ye sankolo cɛtigɛ ka se Ala fɛ. O la, an jigi bɛ min kan, an k'a to o kan.

¹⁵Bari, see b'an ka sarakalasebagaw kuntigiba nin ye k'an faamu an ka dɛsɛyɔrɔ la. A ye kɔrɔbɔli sifa bɛɛ sɔrɔ i n'a fɔ anw, nga a ma kojugu le kɛ.

¹⁶O tuma na sa, an k'an jigi la a kan, ka gwɛrɛ a ka masasigilan yɔrɔ la ni hakilisigi ye, a ka nɛɛma kɔsɔn janko a ka makari an na, ka nɛɛma kɛ an ye, k'an dɛmɛ an ka dɛsɛ tuma na.