Read LAYIDUKURA EBURUW 6 Bible Online

EBURUW 6 - LAYIDUKURA bible

EBURUW 6

¹O la do, Krista ka koo minw faamu man gwɛlɛ, an kana to o kalan na halibele, nga an ka jija ka taa nya. An kana segi kalan kɔrɔman nunu kan o minw ye: an ka nimisa ka faran kojuguw la o minw tɛ foyi nya mɔgɔ ye, ani jigilako Ala kan,

²ni batizeliko, ani ka bolo la mɔgɔ kan ka Ala dali, ni suuw kununko, ani laban kitiko. An kana segi olu kan tugu.

³An bɛn'a kɛ ten le sisan, ni Ala sɔnna.

⁴Mɔgɔ minw ye Ala ka yeelen sɔrɔ, ka Ala ka nɛɛma sɔrɔ, ka kɛ Nii Senuman jɛnnyɔgɔnw ye,

⁵olu minw y'a ye ko Ala ka kuma ka nyi, ani ka sini fangatigiya nɛnɛ,

⁶nga o bɛɛ n'a ta, u murutira. Olu kɔni, ka nimisa ka segi ka faran u ka kojugu la, o tɛ se ka kɛ. Bari u ka kɛwali b'a yira k'u bɛ Ala Dencɛ gwengwenna lɔgɔ kan tugu, ani k'a di a nɛnibagaw ma.

⁷Ni sanji benna dugukolo kan ka nya, ni sɛnɛkɛla ye suman sɔrɔ yen, o dugukolo nin bɛ Ala ka nɛɛma sɔrɔ.

⁸Nga, n'o dugukolo ye ;nɔni, ani sigɛn dama le falen, a tɛ foyi nya, a yɔrɔ man jan danga la. A laban bɛ jɛni.

⁹Ayiwa, ne terinyumanw, an ye kuma minw fɔ ten, a ma kɛ ko aw koo lo, bari an lanin b'a la ko aw bɛ siranyuman kan, min ye kisili sira ye.

¹⁰Aw ye baara min kɛ, ka konyuman minw kɛ ka tɛmɛ, ani aw bɛ minw kɛra sisan ka Ala ka mɔgɔw dɛmɛ, k'a yira Ala la ko a koo ka di aw ye, Ala ka nyi, a tɛna nyinɛ o si kɔ.

¹¹Ayiwa, anw b'a fɛ, aw kelen kelen bɛɛ ka banba ka to timinadiya la fɔɔ ka taa se a laban ma, janko aw jigi bɛ min kan, aw ka se k'o sɔrɔ.

¹²O cogo la, aw fari tɛna faga. Ala ye layidu ta min koo la, minw bɛ la Ala la, ka munyu fɔɔ k'o sɔrɔ, aw ka olu ladege.

¹³Ala y'a daa di Ibrayima ma tuma min na, a kalila n'a yɛrɛ tɔgɔ ye bari fɛɛn wɛrɛ tɛ yen min ka bon n'ale yɛrɛ ye n'a bɛ se ka kali ni min ye.

¹⁴A tun ko: “Ne bɛna i ta nya, k'i ka deenw caya kosɛbɛ.”

¹⁵Ayiwa, Ibrayima munyuna ka kɔnɔni kɛ. Ala y'a daa d'a ma koo min na, a y'o sɔrɔ.

¹⁶Ni adamadenw k'u bɛ kali, fɛɛn min ka bon n'u yɛrɛ ye, u b'o le tɔgɔ wele ka kɛ u seere ye, waasa u y'u daa di koo min na, sigasiga kana sɔrɔ o la.

¹⁷O cogo la, Ala kalila a ka dadili nin na, k'a yira ka gwɛ o sɔrɔbagaw la ko siga t'a la, o bɛna kɛ.

¹⁸O kobaba fila nunu na, Ala tɛ se ka galon tigɛ an ye cogo si la. O kama, an minw jigi b'o kan, o ka kan ka barika don an na kosɛbɛ k'o koo minɛ ka nya.

¹⁹O jigi min b'an fɛ, barika b'o la. O b'a kɛ an bɛ lɔ ka nya, a b'an dɛmɛ fɔɔ ka taa se Ala fɛ.

²⁰Yezu kɔnna an nya o yɔrɔ la an kɔsɔn. Ale kɛra waati bɛɛ sarakalasebagaw kuntigiba ye Mɛlikisedɛki cogo la.