Read LAYIDUKURA EBURUW 9 Bible Online

EBURUW 9 - LAYIDUKURA bible

EBURUW 9

¹Batoli kɛyɔrɔ ni Ala batocogo tun bɛ yen jɛnnyɔgɔnya fɔlɔ waati la.

²Ayiwa, batoyɔrɔ tun lɔra ni fani ye. O batoyɔrɔ nin tilannin tun lo, a yɔrɔ fɔlɔ tɔgɔ ko Yɔrɔ Senuman. Fitinɛ tun bɛ bila o yɔrɔ la, ani tabali, Ala ka buru bɛ bila o min kan.

³A yɔrɔ filanan daan bɔnin tun bɛ ni fani ye. O yɔrɔ tɔgɔ ko Yɔrɔ Senuman Senuman.

⁴Wusulandaga[1] sanulaman, ani Ala ka layidu taamasinyɛ kɛsu tun bɛ ale kɔnɔ, o kɛsu nin yɔrɔ bɛɛ tun ye sanu ye. Daga sanulaman tun b'a kɔnɔ maanɛ b'o min na, ani Arɔn ka bere, o min feerenna, ani walaka kabakurulamanw, Ala ka sariya tun bɛ o minw kan.

⁵Jaa dɔw minw bɛ wele serubɛn, olu tun lɔnin bɛ kɛsu sanfɛ minw b'a yira ko Ala bɛ yen. Olu gamanw tun kɛnin bɛ ka suma kɛ kojuguw yafa saraka bɔyɔrɔ kan. O koo nunu bɛɛ nyafɔtuma tɛ sisan ye.

⁶Ayiwa, o bɛɛ labɛnna ka ban tuma min na, sarakalasebagaw tun bɛ don batoli yɔrɔ nin yɔrɔ fɔlɔ la tuma o tuma k'u ka baara kɛ.

⁷Nga sarakalasebagaw kuntigiba kelenpe le tun bɛ don batoli yɔrɔ faan filanan nin kɔnɔ sinyɛ kelenpe saan kɔnɔ. A bɛ don yen ni begɛn joli le ye k'o di Ala ma ale ni jama ka fili kɔsɔn.

⁸Nii Senuman y'a yira o cogo la ko ni Alabatoyɔrɔ kɔrɔman nin bɛ yen, ko Yɔrɔ Senuman Senuman sira ma dayɛlɛ.

⁹U tun bɛ sɔnnifɛn ni saraka minw dira Ala ma, o do tun tɛ se ka Alabatobagaw dusu saniya. O ye taamasinyɛ dama le ye k'an ka bii koo yira.

¹⁰A dumuniko, minnifɛnko, yɛrɛsaniyako sifa dɔw, olu bɛɛ tun kɛra landaw le ye fɔɔ ka n'a bila yɛlɛmani waati ma.

¹¹Ayiwa, Krista nana ka kɛ sarakalasebagaw kuntigiba nyanaman ye, sini hɛrɛ kama. Ale donna k'a ka baara kɛ batoli kɛyɔrɔ min na, o ka bon, a dafanin lo, o ni adamadenw ye min lɔ, o tɛ kelen ye. O kɔrɔ ko dinyɛ nin ta tɛ.

¹²Krista ma don o Yɔrɔ Senuman Senuman na ka bakɔrɔnin joli, walima misiden joli di Ala ma dɛ. Nga a y'a yɛrɛ joli le di Ala ma sinyɛ kelenpe k'anw hɔrɔnya pewu!

¹³Sarakalasebagaw bɛ bakɔrɔninw, ni turaw joli, ani misimuso bugurigwɛ kɛ ka mɔgɔnɔgɔninw saniya.

¹⁴Nii Senuman barika la, Krista y'a yɛrɛ kɛ saraka dafanin ye ka di Ala ma. An ka kɛwaliw minw tɛ foyi nya, a joli b'an dusu saniya ka bɔ o la janko ka se ka Ala bato. Krista joli ka fisa ni begɛn joli ye kosɛbɛ!

¹⁵Krista kɛra Ala ni mɔgɔw cɛ, ka jɛnnyɔgɔnyakura sigi janko Ala y'a daa di sini koo min na, a ka mɔgɔ weleninw ka se k'o sɔrɔ Krista ka saya kɔsɔn. A y'o min kɛ k'u tila u ka kojuguw la, u y'o minw kɛ jɛnnyɔgɔnyakɔrɔ tile la.

¹⁶Cɛntigi ka sayako bɛ gwɛ fɔlɔ, u bɛ sɔrɔ ka kuma cɛntasɛbɛ koo la.

¹⁷Cɛntasɛbɛ tɛ se ka jati ni cɛntigi bɛ nii na, bari a bɛ sa fɔlɔ u bɛ sɔrɔ ka cɛntasɛbɛ jati.

¹⁸O le y'a to, hali jɛnnyɔgɔnyakɔrɔ fana sigira ni joli ye.

¹⁹Musa ye Ala ka sariya kelen kelen bɛɛ fɔ jama ye ka ban tuma min na, a ye misidenw ni bakɔrɔninw joli ni jii ta, ka sagasi wuleman siri kala dɔ[2] la k'o kɛ ka joli ni jii nin seriseri sariya sɛbɛ kan, ani jama bɛɛ kan

²⁰k'a fɔ ko: “Nin ye jɛnnyɔgɔnya joli ye Ala ko aw k'o min labato.”

²¹O kɔ, a y'a seriseri fana batoli yɔrɔ nin kan, ani a kɔnɔna baarakɛminanw bɛɛ kan.

²²A fɔra sariya sɛbɛ kɔnɔ k'u tun bɛ joli le kɛ ka fɛɛn caaman saniya. Ni joli ma bɔn, kojugu tɛ yafa.

²³Fɛɛn minw bɛ arijana na, n'olu jaaw ka kan ka saniya ni kɛwali nunu ye, o tuma na, o fɛɛn nunu yɛrɛ yɛrɛ ka saniyako ka kan ni saraka wɛrɛw ye minw ka fisa ni fɔlɔtaw ye.

²⁴Tinyɛ na, mɔgɔw bolo ye Alabatoso min lɔ k'a kɛ i n'a fɔ sankolo ta, a ma kɛ i ko Krista donna o le kɔnɔ dɛ! Krista donna arijana yɛrɛ le la, ka lɔ Ala nyafɛ anw ka hɛrɛ kɔsɔn.

²⁵Sarakalasebagaw kuntigiba bɛ to ka don Yɔrɔ Senuman Senuman na cogo min na saan o saan ni begɛn joli ye, Krista m'a kɛ ten. A m'a yɛrɛ saraka sinyɛ caaman.

²⁶N'a tun bɛ ten, a tun bɛna tɔɔrɔ sinyɛ caaman kabini dinyɛ dantuma. Nga a nana laban tuma na sisan le ka tɔɔrɔ sinyɛ kelenpe k'a yɛrɛ kɛ saraka ye ka kojugu fanga cɛn.

²⁷Adamadenw bɛ sa sinyɛ kelenpe cogo min na, Ala bɛ sɔrɔ k'u kiti,

²⁸o cogo kelen na, Krista y'a yɛrɛ saraka sinyɛ kelen, ka mɔgɔ bɛɛ ka kojuguw yafa. O kɔ, a bɛna segi ka na, o tɛna kɛ kojuguw yafako kama tugu, nga mɔgɔ minw b'a makɔnɔna, olu kisili kɔsɔn lo.