Read LAYIDUKURA ZAKI 1 Bible Online

ZAKI 1 - LAYIDUKURA bible

ZAKI 1

¹Ne Zaki bɛ bataki nin ci aw Isirayɛlidenw ma minw jɛnsɛnnin bɛ dinyɛ faan bɛɛ la. Ne min ye Ala ni Matigi Yezu Krista ka baarakɛla ye, ne b'aw fo.

²N badenw, kɔrɔbɔli sifa o sifa mana se aw ma, aw k'aw yɛrɛ jati mɔgɔdagamuninw ye.

³Bari aw b'a lɔn ko tɔɔrɔ minw bɛ sɔrɔ Yezu kɔsɔn, k'o bɛ kɛ sababu ye aw bɛ kɛ munyubagaw ye.

⁴Nga o munyuli nin ka dafa, waasa aw ka kɛ mɔgɔdafaninw ye, ani finyɛ kana sɔrɔ aw la fewu.

⁵N'o y'a sɔrɔ n'aw dɔ dɛsɛnin lo hakilitigiya la, o tigi k'a dali Ala fɛ, a bɛn'a d'a ma. A tigɛ man gwɛlɛ, a bɛ mɔgɔ bɛɛ sɔn ka nya. A t'an sɔngɔ ka sɔrɔ k'an sɔn.

⁶Nga o tigi k'a jigi la Ala kan k'a dali, a kana sigasiga hali fitini. Bari mɔgɔ min bɛ sigasiga, o tigi bɔnin bɛ baji fɛ, fɔnyɔ b'o min lamaga ka taa n'a ye faan bɛɛ.

⁷O tigilamɔgɔ kan'a miiri ko a bɛna fɛɛn dɔ sɔrɔ Matigi fɛ.

⁸Bari a hakili tɛ kelen kan, a bɛ siga a ka koo kɛtaw bɛɛ la.

⁹Aw minw ye faantanw ye, aw ye nisɔndiya, bari Ala b'aw kɔrɔ ta.

¹⁰Minw wasanin bɛ, ni olu dɔ nagasira, a ka nisɔndiya o koo la, bari a bɛna sa i n'a fɔ biin feeren.

¹¹Tile bɛ fariya ka biin ja, a feeren ka cɛnya bɛ ban ka tila ka ben cogo min na, o cogo kelen na, mɔgɔwasaninw bɛna ben u ka baara la.

¹²Mɔgɔ min bɛ jija ka sɛgɛn munyu, o tigi ye dubaden ye. Bari n'a sera ka sɛgɛn nunu munyu, a bɛna sini sɔrɔ a ka tɔnɔ ye. Ala tun y'a daa di a kanubagaw ma, ko u bɛna o min sɔrɔ.

¹³Ni kojugu kɛ nigɛ donna min na, o tigi kan'a fɔ ko Ala nɔɔ lo. Bari kojugu nigɛ tɛ Ala minɛ fewu. A fana tɛ mɔgɔ si nigɛ ka don kojugu la.

¹⁴Nga mɔgɔ kelen kelen bɛɛ kɔnɔnako le bɛ kojugu kɛ nigɛ don a la.

¹⁵Ayiwa, ni kojugu nigɛ jiidira mɔgɔ kɔnɔ, a bɛ kojugu kɛ. Ni kojugu ye fanga sɔrɔ a kan, a bɛ na ni saya ye.

¹⁶N badenw, aw minw koo ka di ne ye, aw kana aw yɛrɛ nigɛ dɛ!

¹⁷An bɛ fɛnnyuman minw bɛɛ sɔrɔ n'o dafanin lo, o bɛ bɔ Ala le fɛ min ye tile ni kalo ani lolow dan. A tɛ yɛlɛma, dibidibi tɛ a ka koo si la.

¹⁸A diyara Ala ye, a y'an dan a ka tinyɛ kuma barika la, waasa an ka kɛ a ka danfɛnw bɛɛ nyamɔgɔ ye.

¹⁹N badenw, aw minw koo ka di ne ye, aw k'a lɔn kosɛbɛ ko mɔgɔ kelen kelen bɛɛ ka kan ka lamɛnni kɛ ka nya, nga a kana teliya ka kuma, a kana dimi joona.

²⁰Bari mɔgɔ min dusu gwannin lo, o tigi ka kɛwali tɛ tilen Ala nyakɔrɔ.

²¹O kama, koo o koo bɛ mɔgɔ nɔgɔ Ala nyana, ani juguya bɛɛ, aw k'o bɛɛ dabila. Ala ka kuma min b'aw kɔnɔ, aw ka sɔn o ma ni yɛrɛmajigi ye. O kuma nin, o bɛ se k'aw kisi.

²²Aw kana aw yɛrɛ nigɛ fana ko aw bɛ to ka Ala ka kuma lamɛn. Nga aw k'o lamɛn, k'a labato.

²³Mɔgɔ min bɛ Ala ka kuma lamɛn n'a t'a labato, o tigi bɔnin bɛ mɔgɔ fɛ min b'a yɛrɛ filɛ dubalen kɔnɔ.

²⁴A b'a yɛrɛ filɛ, n'a bɔra yen, a bɛ nyinɛ a yɛrɛ cogo kɔ.

²⁵Nga, mɔgɔ min bɛ sariya sɛbɛsɛbɛ kɔnɔnakuma lamɛn ka nya k'a janto a la, n'a tɛ nyinɛ a kɔ, ani ka to k'a labato, o tigi kɔni bɛna hɛrɛ sɔrɔ a ka kɛwaliw la. O kuma nin le bɛ mɔgɔ kɛ hɔrɔnw ye.

²⁶Ni min y'a miiri ko ale bɛ Alasira taama k'a sɔrɔ a t'a kumacogo kɔlɔsi, o tigi b'a yɛrɛ nigɛ, kuun tɛ o tigi ka Alasira koo la.

²⁷Alasira taamacogo min tilennin bɛ, ni finyɛ t'a la an Faa Ala nyakɔrɔ, o filɛ: e k'i janto falatɔw ni firiyamusow la u ka tɔɔrɔ tuma na. Ani e k'i yɛrɛ tanga dinyɛ ka koo nɔgɔninw bɛɛ ma.