Read LAYIDUKURA ZAKI 2 Bible Online

ZAKI 2 - LAYIDUKURA bible

ZAKI 2

¹N badenw, aw minw lanin bɛ an Matigi Yezu Krista nɔɔrɔtigi la, aw kana mɔgɔw woloma k'u fisaya nyɔgɔn ye.

²Ni mɔgɔ fila nana don aw cɛma aw ka lajɛnyɔrɔ la, ni dakamana fani bɛ kelen kaan na, ni sanu donnin b'a bolo, k'a sɔrɔ dɔ nin ka faniw faranfarannin lo,

³n'aw y'aw janto dakamana fanitigi la k'a fɔ a ye ko a ka na sigi yɔrɔnyuman na, k'a fɔ faantan nin ye ko a ka lɔ sanfɛ walima ko a ka sigi duguma aw seen kɔrɔ,

⁴n'aw y'o kɛ, aw ma wolomani kɛ wa? Aw bɛ mɔgɔw bɔ nyɔgɔn na ni ;naniyajugu ye.

⁵N badenw, aw minw koo ka di ne ye, aw ye mɛnni kɛ, minw bɛ jati faantanw ye dinyɛ kɔnɔ, Ala m'u woloma k'u kɛ fɛntigiw ye lanaya koo la, ani k'u ladon a ka mara la wa? A tun y'a daa di a kanubagaw ma o min koo la.

⁶Nga aw kɔni, aw bɛ faantanw le dɔgɔya. Nafolotigiw le t'aw tɔɔrɔ k'aw minɛ ka taa n'aw ye faamaso wa?

⁷U b'aw wele ni tɔgɔnyuman min ye, olu le tɛ o cɛnbagaw ye wa?

⁸Sariya min fɔra Masa Ala ka kuma na ko: “E k'i mɔgɔnyɔgɔn kanu i n'a fɔ i b'i yɛrɛ kanu cogo min na.” N'aw b'o labato, o tuma na aw ka kɛwali ka nyi.

⁹Nga n'aw bɛ wolomani kɛ ka mɔgɔw fisaya ni nyɔgɔn ye, aw bɛ kojugu kɛ, Ala ka sariya b'aw minɛ bari aw m'a labato.

¹⁰Ni min ye sariya kelen cɛn, o tigi ye sariya bɛɛ le cɛn, hali n'a ye tɔ nunu bɛɛ labato.

¹¹Bari min y'a fɔ ko: “I kana nyamɔgɔya kɛ,” ale le y'a fɔ fana ko: “I kana mɔgɔ faga.” Ayiwa, e tɛ nyamɔgɔya kɛ, nga i bɛ mɔgɔ faga, sariya y'i minɛ.

¹²Sariya min b'aw hɔrɔnya, aw bɛna kiti ka kɛnyɛ n'o le ye. O kama, aw kumacogo n'aw ka kɛwaliw ka bɛn o ma.

¹³Bari mɔgɔ min tɛ makari tɔw la, kiti tigɛlon na, Ala fana tɛna makari o tigi la. Nga minw bɛ makari, olu tɛ siran kiti nya.

¹⁴N badenw, ni mɔgɔ dɔ y'a fɔ ko ale jigi bɛ Ala kan, k'a sɔrɔ o tɛ ye a ka kɛwaliw la, a bɛ mun nya sa? O jigi nin bɛ se k'a kisi wa?

¹⁵N'aw balimacɛ dɔ, walima aw balimamuso dɔ fari lakolon lo, ni bii ka dumuni fana t'a fɛ,

¹⁶n'aw dɔ y'a fɔ a ye ko: “Taa hɛrɛ la, Ala k'i dɛmɛ,” k'a sɔrɔ a mako bɛ fɛɛn min na, aw m'o d'a ma, aw ye duba min kɛ, o bɛ mun nya sa?

¹⁷Ayiwa, ni min ko ale jigi bɛ Ala kan, k'a sɔrɔ o tɛ ye a ka kɛwaliw la, o jigi nin ma kɛ jigi nyanaman ye.

¹⁸O la, dɔ bɛ se k'a fɔ ko: “I ko i jigi bɛ Ala kan, ne kɔni bɛ kɛwalinyumanw le kɛ. E k'i ta jigi yira ni kɛwali niin t'a la, ne bɛna n ta yira ni kɛwali ye.”

¹⁹I lanin b'a la ko Ala ye kelenpe ye kɛ! O ka nyi. Jinaw fana lanin b'o la, u bɛ siran fɔɔ ka yɛrɛyɛrɛ.

²⁰Naloman! K'a fɔ ko i jigi bɛ Ala kan k'a sɔrɔ o tɛ ye i ka kɛwaliw la, i b'a fɛ k'a lɔn k'o ye fu ye wa?

²¹An bɛma Ibrayima ta filɛ kɛ. A y'a dencɛ Isiyaka di Ala ma saraka ye minkɛ, o la Ala y'a jati mɔgɔtilennin ye a ka kɛwali kɔsɔn.

²²I y'a ye wa? A jigi tun bɛ Ala kan, a fana tun ye kɛwaliw kɛ. A ka kɛwaliw y'a yira ko a jigi dafanin lo.[1]

²³O cogo la, min fɔra Ala ka kuma na, o kɛra tinyɛ na ko: “Ibrayima y'a jigi la Ala kan, o kɔsɔn Ala y'a jati mɔgɔtilennin ye,” k'a wele ko a teri.

²⁴Aw m'a ye wa? Mɔgɔ ka kɛwalinyumanw le b'a to Ala b'a jati mɔgɔtilennin ye. Jigi koo dama tɛ.

²⁵O cogo kelen na, Ala ye kakalamuso Araabu jati mɔgɔtilennin ye a ka kɛwali kɔsɔn. Bari a ye Isirayɛli ka cidenw ladon ka sɔrɔ ka sira wɛrɛ don u seen kɔrɔ.

²⁶Ayiwa, ni mɔgɔ nii bɔra a bɛ kɛ suu ye cogo min na, o cogo kelen na, n'i ko i lanin bɛ Ala la k'a sɔrɔ o tɛ ye i ka kɛwaliw la, o fana ma kɛ jigi nyanaman ye.