Read LAYIDUKURA ZAKI 3 Bible Online

ZAKI 3 - LAYIDUKURA bible

ZAKI 3

¹N badenw, aw caaman kana kɛ karamɔgɔw ye. Bari an b'a lɔn ko karamɔgɔw ka kiti bɛna gwɛlɛya.

²An bɛɛ bɛ fili cogo caaman na. Mɔgɔ min tɛ fili kuma na, o tigi ye mɔgɔdafanin ye, a bɛ se k'a yɛrɛ minɛ fana.

³An bɛ karafe don soo daa la waasa a ka sɔn an ta ma. N'an ko a ka taa faan min na, a bɛ taa yen.

⁴Walima aw ye kurunbabaw filɛ. Hali n'u dɔ bonyana cogo o cogo hali ni fɔnyɔba b'a nyɔntira cogo o cogo, ni kurunbolila b'a fɛ a ka taa yɔrɔ min na, a bɛ taa yen a nyatilenfɛnfitinin barika la.

⁵O cogo kelen na, mɔgɔ nɛɛn fana y'a fari yɔrɔfitinin dɔ ye min bɛ se k'a yɛrɛ bonya haali. Takamifitinin fana bɛ ten. A bɛ se ka tuu belebeleba bɛɛ halaki.

⁶Mɔgɔ nɛɛn fana bɛ i n'a fɔ tasuma. Fɛnjugu lo. An fari yɔrɔ dɔ lo, ale le bɛ fari yɔrɔ tɔw bɛɛ don koo la. O tasuma min ye jahanama ta ye.

⁷Kongosogow, ni kɔnɔw, saaw, ani jikɔnɔfɛnw sifa bɛɛ, adamaden bɛ se ka olu kolo.

⁸Nga mɔgɔ si tɛ se ka nɛnden mara. Balawufɛn lo min tɛ lafinyɛ. Baga yɛrɛ lo, min bɛ mɔgɔ faga.

⁹An bɛ Matigi, ni an Faa tando n'an nɛɛn ye, ka tila ka mɔgɔ danga n'o le ye. Ala do ye mɔgɔ dan i n'a fɔ a yɛrɛ.

¹⁰Duba ni danga ka bɔ daa kelen na, n badenw, o daganin tɛ!

¹¹Jii diman, ani jii kunaman bɛ se ka bɔ kɔlɔn kelen kɔnɔ wa?

¹²N badenw, toro bɛ se ka tigɛ olivuyiri kan wa? Walima ɛrɛzɛnsun bɛ se ka den toro la wa? Jii diman tɛ se ka bɔ kɔgɔji la.

¹³Jon ye hakilitigi ye aw cɛma? O tigi k'a yira a ka kɛwalinyumanw fɛ a bɛ o minw kɛ ni yɛrɛmajigi ani hakilitigiya ye.

¹⁴Nga ni min kɔnɔ ka jugu, ni keliya bɛ min na, o tigi kan'a yɛrɛ wansun k'a ka galon kɛ ka tinyɛ datugu.

¹⁵O hakilitigiya nyɔgɔn tɛ bɔ Ala fɛ, nga o ye dinyɛ ta ye, adamaden ni Sutana ta.

¹⁶Kɔnɔnajuguya ni keliya bɛ yɔrɔ min na, konyagaminin ni kojugu sifa bɛɛ bɛ sɔrɔ o yɔrɔ la fana.

¹⁷Nga hakilitigiya min bɛ Ala fɛ, o bɛ mɔgɔ kɛ mɔgɔnyuman ye, hɛrɛmɔgɔ, hinɛbaga, min ka koo ka di, a ka kɛwaliw ka nyi kosɛbɛ. A bɛ makari kosɛbɛ. A tɛ wolomani kɛ. A tɛ kuma fila fɔ.

¹⁸Mɔgɔ minw bɛ hɛrɛ nyinina, olu bɛ tilenninya nafa sɔrɔ hɛrɛ kɔnɔ.