Read LAYIDUKURA ZAKI 4 Bible Online

ZAKI 4 - LAYIDUKURA bible

ZAKI 4

¹Kɛlɛ ni sɔsɔli minw bɛ wili aw cɛma wo, olu bɛ bɔ min le? O bɛ bɔ nigɛjuguw la minw b'aw nyɔntinyɔntira.

²Fɛɛn dɔw nigɛ b'aw la, nga aw t'o sɔrɔ, aw bɛ mɔgɔ faga ka kɔnɔnajuguya kɛ, nga aw bɛ min fɛ, aw tɛ se k'o sɔrɔ. Kɛlɛ ni sɔsɔliw bɛ wili aw cɛma. Aw tɛ foyi sɔrɔ bari aw t'a dali Ala fɛ.

³Aw man'a dali fana, aw tɛ foyi sɔrɔ bari aw ka miiriya man nyi. Aw b'a dali aw yɛrɛ ka nigɛla dama kɔsɔn.

⁴Kakala nunu! Aw m'a lɔn ko ni mɔgɔ min ye dinyɛ koo diya a yɛrɛ ye, k'o tigi ni Ala tɛ bɛn wa? Ayiwa, ni mɔgɔ min bɛ dinyɛ koo diya a yɛrɛ ye, o tigi b'a yɛrɛ kɛ Ala jugu ye.

⁵A fɔra Ala ka kuma na ko: “A ye nii min don aw la, a bɛ keliya o koo la.” Aw ka miiri la k'o ye kuma fu ye wa?

⁶A bɛ koo bɛɛ kɛ k'a ka nyumanya yira. O la, a fɔra Ala ka kuma na ko: “A bɛ nyumanya kɛ mɔgɔmajigininw na, ka fariya yɛrɛbonyalaw ma.”

⁷Aw k'aw yɛrɛ majigi Ala ye ka ban Sutana ma. O la, a bɛna aw ye k'aw to yen.

⁸Aw ye gwɛrɛ Ala la, ale fana bɛna gwɛrɛ aw la. Kojugukɛla nunu! Aw y'aw bolo n'aw dusu saniya. Kɔnɔ fila tigi nunu!

⁹Aw ye nimisa ka kasi kosɛbɛ, aw k'aw ka yɛlɛko kɛ kasi ye, k'aw ka nisɔndiya yɛlɛma ka kɛ dusukasi ye.

¹⁰Aw k'aw yɛrɛ majigi Matigi ye, a bɛna kunkɔrɔta di aw ma.

¹¹N balimaw, aw kana nyɔgɔn tɔgɔjugu fɔ, ni min y'a tɔnyɔgɔn tɔgɔjugu fɔ, walima k'a jalaki, o tigi bɛ kumajugu fɔ Ala ka sariya koo la, k'a dɔgɔya. K'a sɔrɔ mɔgɔ min bɛ sariya dɔgɔya, o tigi tɛ sariya labatobaga ye, nga a b'a dɔgɔya le.

¹²Sariyasigibaga ni kititigɛbaga ye Ala kelenpe ye, ale min bɛ se ka mɔgɔ kisi walima k'a halaki. E min b'i tɔnyɔgɔn jalaki, e ye jon ye?

¹³Ayiwa, aw minw b'a fɔ ko: “Bii, walima sini, an bɛna taa dugu nin na ka jago kɛ saan kelen ka wari sɔrɔ.”

¹⁴K'a sɔrɔ aw m'a lɔn ni sini bɛna kɛ cogo min na aw fɛ, bari aw kɛra i n'a fɔ kɔmiji.

¹⁵Nga aw ka kan k'a fɔ ko ni Matigi sɔnna, ko aw bɛna nin ni nin kɛ.

¹⁶Aw b'aw yɛrɛ bonya n'aw ka kuma fufafu ye. K'a sɔrɔ o nyɔgɔn ma nyi.

¹⁷Ayiwa, mɔgɔ min bɛ konyuman lɔn n'a t'a kɛ, o tigi ye kojugu kɛ.