Read LAYIDUKURA ZAKI 5 Bible Online

ZAKI 5 - LAYIDUKURA bible

ZAKI 5

¹Sisan, n kaan bɛ aw nafolotigiw le ma. Aw ka kasi kosɛbɛ, bari bɔnɛ bɛna kɛ aw ta ye.

²Aw k'a lɔn ko aw ka nafolo tolinin lo, bagabagaw y'aw ka faniw nyiminyimi.

³Aw ka sanu n'aw ka wari bɛɛ sonnin lo. O soon nin bɛna aw ka tigɛgwɛlɛya yira, a bɛna aw halaki i n'a fɔ tasuma. Aw ye nafolo lajɛn aw yɛrɛw ye waati laban nin na.

⁴Baaraden minw ye baara kɛ aw ka foro kɔnɔ, aw ma olu ka saraw di u ma. Matigi, Setigi y'o baaraden nunu kasikan mɛn.

⁵Dinyɛ na, aw ye faamadumuni kɛ k'aw diyanakow kɛ, ka tulɔ i n'a fɔ begɛn fagata, k'aw salon kɔnɔ.

⁶Aw ye mɔgɔtilenninw jalaki k'u faga. U ma aw sɔsɔ.

⁷N badenw, aw ye munyu fɔɔ ka se Matigi kɔsegilon ma i n'a fɔ sɛnɛkɛla bɛ munyu cogo min na. Ni sanji fɔlɔ benna, a bɛ munyu fɔɔ ka se sanji laban ka ben ma, a bɛ sɔrɔ k'a ka baara nafa sɔrɔ.

⁸O cogo la, aw fana ka munyu, ka jija bari Matigi ka kɔsegituma surunyana.

⁹N badenw, aw kana dimi mara ka to ka nyɔgɔn kɔrɔfɔ janko Ala kana aw kiti. A labɛnnin lo kiti kama dɛ.

¹⁰Matigi ye kira minw ci, olu ye tɔɔrɔ munyu cogo min na, aw ka olu ladege, n balimaw.

¹¹Mɔgɔ minw bɛ munyu fɔɔ ka se a daan ma, anw k'olu ye dubadenw ye. Zɔbu munyuna cogo min na, n ko aw y'o mɛn kɛ. Matigi nana min kɛ a ye laban na, aw b'o lɔn. Matigi ye nyumanya ni makaritigi ye.

¹²N badenw, aw kana kali abada. Aw kana kali sankolo la, walima dugukolo la. Aw kana kali cogo si la. Aw k'a fɔ ko ɔnhɔn ni ɔnhɔn lo, k'a fɔ ayi ni ayi lo, waasa Ala ka kiti kana ben aw kan.

¹³N'aw dɔ bɛ tɔɔrɔ la, a ka Ala dali. Min nisɔn ka di, o ka Ala tando ni dɔnkiliw ye.

¹⁴N'aw dɔ man kɛnɛ, o tigi ka Ala ka jama nyamɔgɔw wele, u ka dalili kɛ a ye ka tulu mɔ a la Matigi tɔgɔ la.

¹⁵O dalili min bɛ kɛ k'u jigi to Matigi kan, o bɛna banabagatɔ kisi, Matigi bɛn'a kɛnɛya. N'o y'a sɔrɔ a ye kojugu dɔ kɛ, a bɛna o yafa sɔrɔ.

¹⁶O la sa, aw ye kojugu minw kɛ, aw ka olu fɔ nyɔgɔn ye ka Ala dali nyɔgɔn ye waasa aw bɛ kɛnɛya. Barika bɛ mɔgɔtilennin ka dalili la kosɛbɛ.

¹⁷Kira Eli tun ye anw bɔnyɔgɔnko adamaden ye. A y'a jigi la Ala kan k'a dali ko sanji kana na. Sanji fana ma na fɔɔ saan saba ni kalo wɔɔrɔ.

¹⁸O kɔ, a ye dalili kɛ tugu, sanji nana, sumanw nyana.

¹⁹N badenw, n'aw dɔ filila ka tinyɛ sira bila, ni min kɛra sababu ye k'a kɔsegi

²⁰k'a bɔ o sirajugu nin kan, o tigi bɛ kɛ sababu ye k'a tɔnyɔgɔn kisi, kojugu caaman bɛ yafa.