Read LAYIDUKURA PIYƐRI FƆLƆ 2 Bible Online

PIYƐRI FƆLƆ 2 - LAYIDUKURA bible

PIYƐRI FƆLƆ 2

¹O la, aw ka nanbarankow bɛɛ dabila, ni kɔnɔ fila fila koo, ni nyagoya, ani kumajugu, ni kojugu sifa bɛɛ. Aw ka faran o bɛɛ la.

²Siin ka di dennyɛnin ye cogo min na, Ala ka kuma fana ka kɛ aw fɛ ten janko aw ka kɔgɔ ka kisi,

³“bari aw y'a ye ko Matigi ka koo ka di.”

⁴Aw ye gwɛrɛ Matigi la ale min ye Kabakuru nyanaman ye. Mɔgɔw banna ale min na i n'a fɔ bonlɔbagaw bɛ ban kabakuru dɔ la cogo min na. Nga Ala y'a woloma, a koo ka gwɛlɛ a ma.

⁵O cogo la, aw bɛ kɛ a bɔnyɔgɔnko kabakuru nyanamanw ye, minw bɛna kɛ ka Ala ka soo lɔ, batolisɛbɛ bɛna kɛ min kɔnɔ, ani ka kɛ sarakalasebagaw ye, k'aw yɛrɛ di Ala ma Yezu Krista barika la. O ka d'a ye.

⁶Bari a fɔra Ala ka kuma yɔrɔ dɔ la ko: “Ne Ala yɛrɛ ye kabakuru nyanaman min woloma, n b'o bila Siyɔn. Ni mɔgɔ o mɔgɔ y'a jigi la o kan, o tigi tɛna malo abada!”

⁷Ayiwa, aw minw y'aw jigi la o kabakuru nin kan, a kɛra fɛɛn nafaman ye aw fɛ. Nga Alalɔnbaliw fɛ, “bonlɔlaw tun banna kabakuru min na, o le nana kɛ boon kabakuruw bɛɛ la nyuman ye,”

⁸ani “o kɛra u talon kabakuru ye, ani u benta.” U bɛ talon a la, bari u ma la a ka kuma na. O le tun ka kan n'u ye.

⁹Nga aw kɔni, Ala ye aw woloma k'aw kɛ ale Masaba ka sarakalasebagaw, n'a ka jama ye. A y'aw sama ka bɔ dibi la k'aw bila a ka kɛnɛba la janko aw k'a ka nyumanya koo fɔ.

¹⁰Fɔlɔ la, aw tun ma kɛ Ala ka jama ye, nga sisan, aw kɛra a ka jama ye. A tun tɛ makari aw la ka kɔrɔ, nga sisan, a makarila aw la.

¹¹Ne terinyumanw, aw minw ye tɛmɛbagaw ye dinyɛ na, n b'a nyini aw fɛ, ko aw k'aw yɛrɛ kɔlɔsi nigɛjuguw ma o minw ni Ala ka koo tɛ bɛn dɛ!

¹²O la, aw taamacogo ka nya Alalɔnbaliw cɛma, waasa hali n'u ko u bɛna aw tɔgɔ cɛn, aw ka kɛwalinyumanw ka kɛ sababu ye u bɛ Ala tando a nalon na.

¹³Aw k'aw yɛrɛ majigi faamaw ye Matigi kɔsɔn. Aw k'aw yɛrɛ majigi jamanatigi ye bari jamana ka koo bɛ ale le bolo.

¹⁴An'a ka lasigidenw ye, bari olu ye see sɔrɔ a fɛ ka kojugukɛlaw nyaa gwan, ka konyumankɛlaw kunnawolon.

¹⁵Ala sago ye nin ye: Aw ka konyuman kɛ, o cogo la, koo faamubaliw tɛna kumayɔrɔ sɔrɔ.

¹⁶Aw ka taama hɔrɔn taamacogo la, aw kana aw ka juguya dogo o hɔrɔnya nin jukɔrɔ. Nga aw ka kɛ Ala ka baarakɛlaw ye.

¹⁷Aw ka mɔgɔ bɛɛ bonya, k'aw balimaw kanu, ka siran Ala nya, ka masa bonya.

¹⁸Ayiwa baaradenw, aw k'aw yɛrɛ majigi sɛbɛ la aw ka kuntigiw ye. Kuntigi minw ye mɔgɔnyumanw ye ni minw sabalinin lo, aw kana aw yɛrɛ majigi olu dama ye, nga minw ka fari, aw k'aw yɛrɛ majigi olu fana ye.

¹⁹Mɔgɔ man kan ni tɔɔrɔ min ye, n'a b'o munyu Ala kɔsɔn, o ka nyi kosɛbɛ.

²⁰N'u b'i bugɔra bari i ye kokolon dɔ le kɛ, kunkɔrɔta jumɛn le b'o tɔɔrɔ munyuli la? Nga n'u b'i tɔɔrɔla k'a sɔrɔ i ye konyuman kɛ, i do bɛ o munyuna, o le ye Ala ka dɛmɛli ye.

²¹Ala y'aw wele o yɛrɛ le kama. Bari Krista fana tɔɔrɔla aw kɔsɔn. A ye wale yira aw la, aw ka kan k'a nɔɔ ta.

²²“A ma kojugu kɛ ka ye, nanbarankuma ma bɔ a daa la ka ye.”

²³U tun y'a nɛni tuma min na, a ma sɔn k'u nɛni. U tun b'a tɔɔrɔla tuma min na, a ma kumajugu fɔ u ye. Nga, a y'a ta to Ala ma dɔrɔn, ale min bɛ kiti tigɛ ka tilen.

²⁴A y'an ka kojuguw bɛɛ ta a yɛrɛ kunna ka tɔɔrɔ lɔgɔ kan, waasa anw ni kojuguw cɛ ka faran, an ka taamacogokura ta min tilennin lo. Bari aw ye hɛrɛ sɔrɔ ale ka tɔɔrɔ sababu la.

²⁵Bari aw tun kɛra i n'a fɔ sagatununinw, nga sisan, aw nyaa yɛlɛmana ka sin aw Dɛndɛbaga ma, o min ye aw Kɔlɔsibaga ye.