Read LAYIDUKURA PIYƐRI FƆLƆ 3 Bible Online

PIYƐRI FƆLƆ 3 - LAYIDUKURA bible

PIYƐRI FƆLƆ 3

¹Musow, aw fana k'aw yɛrɛ majigi aw cɛɛw ye waasa hali ni dɔw bɛ ban Ala ka kuma na, u ka sɔn a ma aw taamacogo sababu la, o kana kɛ kuma sababu la.

²Bari u bɛn'a ye ko aw taamacogo ka nyi, ko aw bɛ mɔgɔ bonya.

³Aw kana aw ka cɛnya yira ni masirifɛnw ye, i n'a fɔ k'i kunsigi lalaga nyanaman, ka sanu don ka fani nyanaman don.

⁴Nga, aw ka kɛ sɔnnyumantigiw ye, hakili siginin, minw ka koo ka nɔgɔ. O le ka di Ala ye haali.

⁵Muso minw jigi tun bɛ Ala kan fɔlɔfɔlɔ, olu sɔɔn tun bɛ ten. U majiginin tun bɛ u furucɛw ye,

⁶i n'a fɔ Sara. A y'a yɛrɛ majigi Ibrayima ye fɔɔ ka to k'a wele ko: “N matigi.” N'aw bɛ konyuman kɛ, n'aw tɛ siran fewu, aw bɛ kɛ Sara denmusow ye.

⁷Cɛɛw, aw fana k'aw ka musow minɛ ka nya ni hakilitigiya ye bari aw barika ka bon n'u ta ye. Aw k'u bonya bari aw bɛɛ bɛna niyɔrɔ kelen sɔrɔ Ala fɛ. Aw ka to k'a kɛ ten, waasa aw bɛ dalili minw kɛ, koo si kana na o bali.

⁸Ayiwa, aw bɛɛ ka nyɔgɔn minɛ ka nya ni miiriya kelen ye. Aw ka nyɔgɔn kanu i n'a fɔ balimaw, ka nyɔgɔn dɛmɛ, ka makari nyɔgɔn na, k'aw majigi nyɔgɔn ye.

⁹Aw kana juguya sara ni juguya ye, walima ka dɔ ka nɛnili segi a ma. Nga e ka duba le kɛ. Bari Ala ye aw minw wele, janko aw k'a ka duba sɔrɔ.

¹⁰“Ni mɔgɔ min b'a fɛ ka sii sɔrɔ, ani ka to hɛrɛ la, o tigi ka kan k'a yɛrɛ minɛ kumajugu fɔli, ani galon ma.

¹¹A ka kan ka kojugu dabila ka konyuman kɛ, ka hɛrɛ nyini dɔrɔn.

¹²Bari Matigi hakili bɛ mɔgɔtilenninw na, a tulo malɔnin lo u ka dalilikan na. Nga a t'a fɛ a nyaa bɛ la kojugukɛlaw kan.”

¹³Jon bɛ se ka kojugu kɛ aw la, n'aw ye konyumankɛlaw ye?

¹⁴Hali n'aw bɛ tɔɔrɔ sɔrɔ aw ka konyumankɛ kɔsɔn, dagamu ye aw ta ye. Aw kana siran mɔgɔ si nya, aw hakili kana nyagami.

¹⁵Aw ka Krista bonya aw dusu la, ale min ye aw ka Matigi ye. Aw jigi min lanin b'a kan, ni dɔ kɛra aw nyiningabaga ye, aw labɛnnin ka sɔrɔ tuma bɛɛ k'a tigi jaabi o koo la.

¹⁶Nga o jaabili nin ka kan ka kɛ ni dususuma, ni bonya ye. Aw bɛ kɛwalinyuman minw kɛ Krista barika la, aw k'o kɛ ni kɔnɔgwɛ ye, waasa aw tɔgɔ cɛnbagaw ka maloya.

¹⁷Ka tɔɔrɔ konyuman kɔsɔn, n'o ye Ala sago ye, o ka fisa ka tɔɔrɔ kojugu kɔsɔn.

¹⁸Krista sara adamadenw ka kojuguw kɔsɔn sinyɛ kelenpe, a banna. Ale mɔgɔtilennin sara mɔgɔ tilenbaliw kɔsɔn, waasa k'aw kɛ Ala taw ye. U y'a faga kɔni, nga a kununna Nii Senuman barika la.

¹⁹A taara lahara kɔnɔ mɔgɔw waaju, ale Nii Senuman barika la.

²⁰Olu minw tun murutira Ala ma, a munyuna, Nuhun ye kurunba lalaga, mɔgɔ damani le kisira o kɔnɔ, mɔgɔ seegi dɔrɔn.

²¹O jii nin tun kɛra batizeli taamasinyɛ ye, o min b'aw kisi bii. O ma kɛ fari saniyako ye. Nga ;naniyanyuman lo an bɛ min ta Ala faan fɛ. A b'aw kisi Yezu Krista ka kununni barika la a sanin kɔ,

²²ale min taara arijana na ka to Ala kinibolo la. Mɛlɛkɛw ni setigiw, ani fangatigi minw b'o yɔrɔ la, u bɛɛ majiginin bɛ ale ye.