Read LAYIDUKURA PIYƐRI FƆLƆ 4 Bible Online

PIYƐRI FƆLƆ 4 - LAYIDUKURA bible

PIYƐRI FƆLƆ 4

¹Krista tɔɔrɔla minkɛ, aw fana ka kɛ n'o miiriya ye. Bari mɔgɔ min tɔɔrɔla, o tigi ye see sɔrɔ kojugu kan.

²O la, k'a to dinyɛ na, a bɛna Ala sago dama kɛ, a tɛna to nigɛjuguw la.

³Aw y'aw yɛrɛ nigɛlako minw kɛ ka tɛmɛ, o b'aw bɔ, i n'a fɔ kakalaya, nigɛjuguw, dɔrɔtɔya, nugubatɔya, dɔrɔminkojugu, ani subagaya i n'a fɔ Alalɔnbaliw b'a kɛ cogo min na.

⁴Alalɔnbaliw bɛ kabakoya, bari aw tɛ jɛn n'u ye u ka koo fufafu nunu na tugu, o la, u b'aw tɔgɔ cɛn.

⁵U bɛna na o bɛɛ nyafɔ Ala ye, ale min labɛnnin lo ka suuw ni nyanamanw bɛɛ kiti.

⁶O kama, kibaru diman tun fɔra suuw yɛrɛ ye, janko u ka kiti i n'a fɔ mɔgɔ tɔw. U ye kibaru diman nin mɛn waasa u ka to Ala sago la Nii Senuman barika la.

⁷Fɛɛnw bɛɛ banwaati surunyana. O la, aw ka kɛ hakilitigiw ye, aw labɛnnin ka to waati bɛɛ, waasa ka se ka Ala dali.

⁸Ayiwa, a fɔlɔ, aw ka nyɔgɔn kanu kosɛbɛ. Bari kojugu caaman bɛ yafa nyɔgɔnkanuya sababu la.

⁹Aw ka nyɔgɔn ladon ka nya, ;nunu;nunu kana sɔrɔ a la.

¹⁰Aw kelen kelen bɛɛ ye seko min sɔrɔ Ala fɛ, o minw bɛ danna danna nyɔgɔn na, aw k'o kɛ ka tɔw mako nya. O cogo la, aw bɛna kɛ Ala ka baarakɛlanyumanw ye.

¹¹Ni mɔgɔ min bɛ waajuli kɛ, o tigi ka kuma ka kɛ Ala ka kuma ye. Min bɛ baara dɔ kɛ tɔw ye, o tigi k'o kɛ ni Ala ka barika ye, waasa Yezu Krista sababu la bonya ka la Ala kan koo bɛɛ la. Bonya ni sebagaya ye ale min ta ye tuma bɛɛ. Amiina!

¹²Ne terisɛbɛw, gwɛlɛya min b'aw kan i n'a fɔ tasuma, o kana aw kabakoya. O ma kɛ koo bɛnbali ye aw kan.

¹³Nga aw ka nisɔndiya bari aw y'aw niyɔrɔ sɔrɔ Krista ka tɔɔrɔ la. O la, ni Krista nana n'a ka nɔɔrɔ ye tuma min na, aw ka se ka nisɔndiya kosɛbɛ.

¹⁴Ni mɔgɔw b'aw nɛni bari aw ye Krista taw ye, duba bɛ aw ye. Bari Ala Nii b'aw fɛ, o min ye Nii Senuman[1] ye.

¹⁵Aw si tɔɔrɔkun kana kɛ mɔgɔfagako ye, walima sonyali, walima juguya, walima ka daa don mɔgɔ wɛrɛ ka koo la.

¹⁶Nga n'aw dɔ bɛ tɔɔrɔla bari a ye Krista ta ye, o kana kɛ maloya ye a fɛ, a ka barika la Ala ye o tɔgɔ nin koo la.

¹⁷Kiti tigɛtuma sera. A do bɛna daminɛ Ala ka mɔgɔw ma. Ni kiti bɛ daminɛ anw le ma, minw bɛ ban ka la Ala ka kibaru diman na, olu ta bɛna kɛ cogo di sa?

¹⁸Ala ka kuma b'a fɔ ko: “Ni mɔgɔnyumanw kisiko ye baara ye, o tuma na, Alanyasiranbali ni kojugukɛla ta bɛna kɛ cogo di sa?”

¹⁹Ayiwa, Ala sago ye minw ka tɔɔrɔko ye, olu k'u yɛrɛ kalifa Danbaga Ala ma, min ye kantigi ye, ka taa n'u ka konyuman kɛli ye nya.