Read LAYIDUKURA PIYƐRI FƆLƆ 5 Bible Online

PIYƐRI FƆLƆ 5 - LAYIDUKURA bible

PIYƐRI FƆLƆ 5

¹Minw ye Ala ka jama nyamɔgɔw ye aw cɛma, n kaan bɛ olu le ma sisan. Ne fana ye nyamɔgɔ dɔ ye, Krista ye tɔɔrɔ min sɔrɔ, ne y'o seere ye. A bɛna na ni nɔɔrɔ min ye, n bɛna dɔ sɔrɔ o la. Ne b'a nyini aw fɛ ko

²Ala y'a ka sagakulu min kalifa aw ma, aw k'o kɔlɔsi ka nya ni dusunyuman ye ka kɛnyɛ ni Ala sago ye. Nga o kana kɛ jagoyako ye. Aw k'o baara nin kɛ ni timinadiya ye, tɔnɔnyini kana sɔrɔ a la.

³Minw kalifara aw ma, aw kana kuntigiya digi u la dɛ! Nga aw ka siranyuman yira u la.

⁴O la, n'aw ka Kuntigiba nana, a bɛna masafugulan cɛnbali d'aw ma, nɔɔrɔ bɛ min na.

⁵Ayiwa, denmisɛnw, aw k'aw yɛrɛ majigi mɔgɔkɔrɔbaw ye. Aw bɛɛ k'aw yɛrɛ majigi nyɔgɔn ye. Bari a fɔra Ala ka kuma na ko: “Yɛrɛbonyala ka koo man di Ala ye. Nga a bɛ mɔgɔmajigininw dɛmɛ.”

⁶Aw k'aw yɛrɛ majigi Setigi Ala ye waasa n'aw kɔrɔtatuma sera a fɛ, a k'aw kɔrɔ ta.

⁷Aw k'aw ka haminakow bɛɛ to a bolo, bari a bɛ janto aw la.

⁸Aw k'aw yɛrɛ kɔlɔsi dɛ! Aw labɛnnin ka to. Bari aw jugu Sutana b'a la ka munumunu i n'a fɔ jara, a b'a fɛ ka dɔ le minɛ k'a nyimi.

⁹Aw ka jija k'aw jigi to Matigi kan kosɛbɛ, waasa a kana se aw kɔrɔ. Aw k'a lɔn k'o tɔɔrɔ nin nyɔgɔn b'aw baden tɔw kan yɔrɔ wɛrɛw la.

¹⁰Nga tɔɔrɔ dɔɔni tɛmɛnin kɔ, Nyumanyatigi Ala o min y'aw wele waasa aw k'ale ka nɔɔrɔ banbali nyɔgɔn sɔrɔ Krista barika la, ale le bɛna barika don aw la, k'aw ka koo sabati, bagabagali kana se aw kɔrɔ.

¹¹Sebagaya ka kɛ ale ta ye tuma bɛɛ. Amiina!

¹²Silivɛn le ye n ka kuma damani nunu sɛbɛn ni n b'a ci aw ma. N b'a jati n badensɛbɛ ye. N b'a fɛ k'aw ladi, k'a yira aw la ko Ala ka dɛmɛ tigitigi lo ne y'o min koo fɔ aw ye, aw bolo lanin bɛ o min kan.

¹³Ala ye minw woloma n'u bɛ Babilɔni, u b'aw fo. N dencɛ Mariki fana b'aw fo.

¹⁴Aw ka nyɔgɔn fo kosɛbɛ. Aw minw bɛɛ kɛra Krista taw ye, a ka hɛrɛ kɛ aw bɛɛ ye.