Read LAYIDUKURA ZAN FƆLƆ 2 Bible Online

ZAN FƆLƆ 2 - LAYIDUKURA bible

ZAN FƆLƆ 2

¹Ne deenw, ne bɛ sɛbɛ nin cira aw ma, waasa aw kana kojugu kɛ. Nga ni min nan'a kɛ, soronadonbaga b'an fɛ Faa Ala kɔrɔ n'o ye Yezu Krista ye, mɔgɔtilennin lo.

²Bari ale lo y'a yɛrɛ saraka k'an ka hakɛw yafa. A ma dan an dama ka hakɛw yafako ma dɛ, nga ani dinyɛ mɔgɔw bɛɛ ta lo fana.

³Ayiwa, n'an bɛ Ala ka kuma labato, o la, an b'a lɔn ko an bɛ Ala lɔn.

⁴Ni mɔgɔ min y'a fɔ ko ale bɛ Ala lɔn k'a sɔrɔ a t'a ka kuma labato, o tigi ye galontigɛla le ye, tinyɛ man d'a ye.

⁵Nga ni min b'a ka kuma labato, o tigi b'a yira ko Ala koo ka d'a ye kosɛbɛ daan tɛ min na. O cogo la, an b'a lɔn ko an ye Ala taw ye.

⁶Ni mɔgɔ min y'a fɔ ko a ye Ala ta ye, o tigi ka kan ka Yezu taamacogo ladege.

⁷N terisɛbɛw, ne tɛ cikura sɛbɛnna k'a ci aw ma, nga cii kɔrɔman lo, o min fɔra aw ye kabini a daminɛtuma na. Aw y'o mɛn ka kɔrɔ.

⁸O n'a ta bɛɛ, cikura lo ni ne b'a sɛbɛnna aw ye. Krista y'o yira ko tinyɛ lo, ani aw fana. Bari, dibi bɛ taara, kɛnɛsɛbɛ bɛ bɔra.

⁹Ni mɔgɔ min ko ale kɔnɔ gwɛnin lo k'a sɔrɔ a mɔgɔnyɔgɔn koo man d'a ye, o tigi ye dibi kɔnɔ mɔgɔ le ye halibi.

¹⁰Nga ni mɔgɔ min b'a mɔgɔnyɔgɔn kanu, o tigi gwɛnin lo, a tɛ kɛ sababu ye k'a tɔnyɔgɔn bila kojugu la.[1]

¹¹Ni mɔgɔ min b'a mɔgɔnyɔgɔn kɔniya, o tigi ye dibi kɔnɔ mɔgɔ ye, n'a bɛ taamana o dibi nin kɔnɔ, a t'a kuun tilenyɔrɔ lɔn. Bari a tɛ yeli kɛ.

¹²Ne deenw, n bɛ nin sɛbɛn k'a ci aw ma ko aw ka kojuguw yafanin lo Yezu sababu la.

¹³Ne bɛ nin sɛbɛn k'a ci aw denfaw ma, ko mɔgɔ min bɛ yen kabini fɛɛn si ma dan fɔlɔ, aw b'o lɔn. Ne bɛ nin sɛbɛn k'a ci aw kanbelenw ma ko aw ye see sɔrɔ Fɛnjugu kan.

¹⁴Ne deenw, ne y'a sɛbɛn k'a ci aw ma ko aw bɛ Faa Ala lɔn. Ne y'a sɛbɛn k'a ci aw denfaw ma ko mɔgɔ min bɛ yen kabini fɛɛn si ma dan fɔlɔ, aw b'o lɔn. Ne y'a sɛbɛn k'a ci aw kanbelenw ma, ko fanga b'aw la, Ala ka kuma jiidinin bɛ aw dusu la. Ani ko aw sera Fɛnjugu kɔrɔ.

¹⁵Aw kana dinyɛ n'a kɔnɔnafɛnw koo diya aw yɛrɛ ye. Ni mɔgɔ min bɛ dinyɛ koo diya a yɛrɛ ye, Faa Ala koo tɛ se ka diya o tigi ye.

¹⁶Bari farisogo ka nigɛlakow, nyadenw ka miyɛntɔya, jigimafakojugu, o koo nunu si tɛ bɔ Faa Ala fɛ do, o bɛɛ bɛ bɔ dinyɛ na le.

¹⁷Mɔgɔw bɛ boli dinyɛ n'a kɔnɔnafɛn minw kɔ, olu do ye banta le ye. Nga ni mɔgɔ min bɛ Ala sago kɛ, o tigi ka koo tɛna ban.

¹⁸Ne deenw, dinyɛ labantuma surunyana. Aw y'a mɛn ko Krista jugu ka kan ka na. K'a sɔrɔ a juguw yɛrɛ ka ca bii nin na. An b'a lɔn o le fɛ ko dinyɛ labantuma surunyana.

¹⁹U bɔra anw cɛma le, nga u tun t'an dɔw ye bɛrɛbɛrɛ, ni an dɔw tun lo, u tun bɛ to n'an ye. Nga a kɛra ten waasa a k'a yira ko an dɔ tɛ u ye tinyɛ tinyɛ na.

²⁰Aw kɔni, Nii Senuman y'aw woloma ka jigi aw kan. O kama, aw bɛɛ bɛ koo bɛɛ lɔn.

²¹A ma kɛ ko aw tɛ tinyɛ lɔn, k'o le y'a to ne ye sɛbɛ nin ci aw ma, ne y'a ci aw ma bari aw bɛ tinyɛ lɔn. Aw b'a lɔn ko galon ni tinyɛ tɛ kelen ye.

²²Mɔgɔ min b'a fɔ ko Yezu tɛ Ala ka mɔgɔ wolomani ye, o tigi le ye galontigɛla ye. Krista jugu le bɛ ban Faa Ala n'a Dencɛ la.

²³Ni mɔgɔ min banna Ala Dencɛ la, o tigi tɛ Faa Ala fɛ fana. Ni min sɔnna a ma, o tigi bɛ Faa Ala fɛ fana.

²⁴Aw kɔni, min fɔra fɔlɔ la n'aw y'o mɛn, aw k'o mara ka nya aw dusu la. Aw y'o min mɛn kabini fɔlɔ la, n'o tora aw dusu la, Faa Ala n'a Dencɛ bɛna to n'aw ye.

²⁵Krista y'a daa di an ma koo min na, o ye hɛrɛ banbali koo ye.

²⁶Mɔgɔ minw b'a fɛ k'aw lafili, ne bɛ sɛbɛ nin cira aw ma olu ka koo la.

²⁷N'o tɛ aw kɔni, aw ye Krista ka Nii Senuman min sɔrɔ, o b'aw fɛ. Aw bɛ koo lɔn, kalankun t'aw la. Nii Senuman b'aw kalan koo bɛɛ la. A b'aw kalan ni min ye, galon si t'o la. Aw ye la o la nyanaman ka nɔrɔ Krista la.

²⁸Ayiwa, ne deenw, aw ye nɔrɔ ka nya Krista la waasa a bɛna kɔsegi loon min na, o k'a sɔrɔ ni jigi b'an fɛ, an kana maloya sɔrɔ.

²⁹Aw b'a lɔn ko Krista ka koo tilennin lo. Ayiwa, aw k'a lɔn fana ko ni mɔgɔ o mɔgɔ bɛ kotilennin kɛ, k'o tigi ye Ala deen ye.