Read LAYIDUKURA ZAN FƆLƆ 5 Bible Online

ZAN FƆLƆ 5 - LAYIDUKURA bible

ZAN FƆLƆ 5

¹Ni mɔgɔ o mɔgɔ lara a la ko Yezu le ye Ala ka mɔgɔ wolomani ye, o tigi ye Ala deen ye. Mɔgɔ o mɔgɔ bɛ denfa kanu, o tigi b'a deen fana kanu.

²N'an bɛ Ala kanu k'a ka ciiw labato, o tuma na an b'a lɔn ko an b'a deenw kanu.

³K'a fɔ ko Ala koo ka d'i ye, o bɛ bɔ a ka ciiw labato cogo la. A ka ciiw labatoli fana man gwɛlɛ,

⁴bari mɔgɔ min ye Ala deen ye ka ban, o tigi sera dinyɛ kɔrɔ. Jigi min b'an fɛ, o le b'a to an bɛ se dinyɛ kɔrɔ.

⁵Mɔgɔ min lanin b'a la ko Yezu ye Ala Dencɛ ye, o tigi le sera dinyɛ kɔrɔ.

⁶Yezu Krista nana jii ni joli barika la. A batizera, a joli bɔnna. A ma kɛ i n'a fɔ a batizera dɔrɔn dɛ! A batizera, a fana sara. Ayiwa, Nii Senuman le b'o tinyɛ yira an na, bari ale ye tinyɛtigi ye.

⁷Seere saba le b'o tinyɛ nin yira:

⁸Nii Senuman, jii ani joli. O seere nunu bɛ fɛɛn kelen le fɔ.

⁹N'an bɛ sɔn adamaden ka seereya ma, Ala ka seereya ka fisa ni adamaden ta ye. Ala y'a yira an na ko ale y'a Deen seere ye.

¹⁰Ni mɔgɔ min lara Ala Dencɛ la, Ala ye seereya min kɛ a koo la, o tigi b'o seereya nin mara a dusu la. Nga ni min ma la Ala la, o tigi ye Ala kɛ galontigɛla ye. Bari Ala ye seereya min kɛ a Dencɛ koo la, o tigi ma la o la.

¹¹O seereya nin filɛ: ko Ala ye hɛrɛ banbali di an ma, o min kɛra an ta ye a Dencɛ sababu la.

¹²Ala Dencɛ bɛ mɔgɔ min fɛ, o tigi bɛ n'o hɛrɛ nin ye. Nga ni Ala Dencɛ tɛ mɔgɔ min fɛ, o tigi tɛ n'a ye.

¹³N ye nin sɛbɛn k'a ci aw ma, aw minw lanin bɛ Ala Dencɛ la, waasa aw k'a lɔn ko hɛrɛ banbali y'aw ta ye.

¹⁴Ayiwa, n'an ye fɛɛn o fɛɛn dali Ala fɛ, n'o kɛra a sago ye, an jigi b'a la ko a bɛ mɛnni kɛ an fɛ.

¹⁵An lanin b'a la ko Ala b'an ka dalili lamɛn, an lanin b'a la fana ko an ye fɛɛn min dali, ko an y'o sɔrɔ ka ban.

¹⁶Ayiwa, kojugu min tɛ mɔgɔ faga, ni dɔ y'a ye ko a balima dɔ y'o kɛ, a ka Ala dali o tigi nin ye. Ala bɛn'a kisi o saya nin ma, n'o y'a sɔrɔ n'o kojugu nin t'a faga. Kojugu kelen le bɛ yen min bɛ mɔgɔ faga, n m'a fɔ ko aw ka dalili kɛ o kɛbagaw ye dɛ!

¹⁷Tilenbaliyako bɛɛ ye kojugu ye. Nga kojuguw bɛɛ tɛ mɔgɔ faga.

¹⁸An b'a lɔn ko mɔgɔ o mɔgɔ ye Ala deen ye, o tigi tɛ to kojugu la, bari Ala Deen b'a tanga. Sutana fanga tɛ se a kɔrɔ.

¹⁹Anw y'a lɔn ko anw ye Ala deenw ye. Nga dinyɛ kɔnɔ fɛɛn tɔw bɛɛ bɛ Sutana ka sago kɔrɔ.

²⁰Anw y'a lɔn fana ko Ala Dencɛ nana dinyɛ na ka hakili di an ma waasa an ka Tinyɛtigi lɔn, ale min ye Ala yɛrɛ yɛrɛ ye. Anw ni Ala yɛrɛ yɛrɛ bɛ nyɔgɔn fɛ a Dencɛ Yezu Krista barika la, ale lo ye Ala ye tigitigi min bɛ hɛrɛ banbali di.

²¹Ne deenw, aw k'aw yɛrɛ kɔlɔsi joko ma.