Read LAYIDUKURA ZAN FILANAN 1 Bible Online

ZAN FILANAN 1 - LAYIDUKURA bible

ZAN FILANAN 1

¹Muso,[1] Ala ye e min woloma, ne min kɛra cɛkɔrɔba ye, ne bɛ bataki nin ci ele n'i deenw ma. Aw koo ka di ne ye tinyɛ na. A ma kɛ i n'a fɔ aw koo ka di ne dama ye dɛ, mɔgɔ o mɔgɔ bɛ tinyɛ lɔn, aw koo ka di olu bɛɛ ye.

²Tinyɛ kama, aw koo ka d'an ye, tinyɛ do b'an kɔnɔ, a bɛna to an kɔnɔ tuma bɛɛ.

³Faa Ala n'a Dencɛ Yezu Krista ka makari an na, ka nɛɛma ni hɛrɛ kɛ anw ye tinyɛ ni kanuya kɔsɔn.

⁴Faa Ala ye cii min d'an ma, ne y'i ka deen dɔw ye, minw bɛ taamana tinyɛ sira kan ka kɛnyɛ n'o ye. O ye ne nisɔn diya kosɛbɛ.

⁵Ayiwa Muso, sisan ne b'a nyini e fɛ ko an ka nyɔgɔn kanu. O tɛ cikura ye ni ne b'o fɔra i ye. Nga kɔrɔman lo, an y'o min sɔrɔ kabini a daminɛ tuma na.

⁶N'an bɛ Ala ka ciiw labato, an bɛ kanuya sira taama. Aw y'o cii le mɛn kabini a daminɛ tuma na, ko aw ka nyɔgɔn kanu.

⁷Bari galontigɛla caaman bɛ dinyɛ na sisan. U b'a fɔ ko Yezu Krista tun tɛ mɔgɔ yɛrɛ yɛrɛ ye. Min bɛ ban ten, o le ye galontigɛla ni Krista jugu ye.

⁸Haya! Aw k'aw yɛrɛ kɔlɔsi waasa aw ka baara kana kɛ fu ye. Nga aw ka se k'a nafa sɔrɔ.

⁹Mɔgɔ o mɔgɔ tɛ Krista ka kuma labato, fɔɔ ka to ka koo wɛrɛ le kɛ, Ala tɛ o tigi fɛ. Mɔgɔ min b'a ka kuma labato, Faa Ala n'a Dencɛ b'o tigi fɛ.

¹⁰Ni mɔgɔ min nana aw fɛ n'a ka kalan ni Krista ta tɛ kelen ye, aw kana sɔn o tigi ka don aw ka soo kɔnɔ. Aw kan'a fo yɛrɛ.

¹¹Ni mɔgɔ min y'a fo, o tigi niin bɛ don a ka kɛwali jugumanw na.

¹²Kuma caaman bɛ n fɛ k'a fɔ aw ye. Nga n t'a fɛ k'o kɛ bataki ye. Bari ne yɛrɛ b'a fɛ ka na bɔ aw fɛ yen k'o fɔ aw ye ni n daa ye, waasa an ka nisɔndiya kosɛbɛ.

¹³Ala y'i Dɔgɔmuso min woloma fana, ale deenw b'i fo.