Read LAYIDUKURA ZAN SABANAN 1 Bible Online

ZAN SABANAN 1 - LAYIDUKURA bible

ZAN SABANAN 1

¹Ne min kɛra cɛkɔrɔba ye, ne bɛ bataki nin ci ele Gayusi ma. I koo ka di ne ye tinyɛ na.

²Ne terinyuman, ne b'a fɛ i ka to kɛnɛya la, i ka koo bɛɛ ka sabati i n'a fɔ i bɛ taa nya Ala koo la cogo min na.

³An balima dɔw nana i ka taamacogo lakali ne ye. U ko i taamacogo bɛnnin bɛ. O ye ne nisɔndiya kosɛbɛ.

⁴Ni n y'a mɛn ko ne deenw taamacogo bɛnnin lo ni Ala ka tinyɛ ye, o le ka di ne ye ka tɛmɛ fɛɛn bɛɛ kan.

⁵N teri, ko i bɛ mɔgɔnyumanya yira an balimaw na kosɛbɛ, o minw ye lonanw ye.

⁶Kanuya min b'i dusu la, u y'o lakali Ala ka jama nyana. Ayiwa, taa n'i ka dɛmɛ ye nyafɛ, o ka kɛ Ala sago la, waasa u ka se k'u ka taama kɛ.

⁷Bari u bɔra Krista le tɔgɔ la. O le y'a to u ma sɔn ka Ala lɔnbaliw ka dɛmɛ foyi minɛ.

⁸O la, an ka kan k'o mɔgɔ nunu nyɔgɔn minɛ ka nya, waasa an niin ka don u tinyɛ baara koo la.

⁹N ye dakurunya damani sɛbɛn ka ci Ala ka jama ma, nga Diyotɛrɛfu min ko ale ye koo bɛɛ nyamɔgɔ ye aw fɛ yen tɛ sɔn o kɔnɔna kuma ma.

¹⁰O kama, ni n nana aw fɛ yen tuma min na, a bɛ min kɛra an na, a ka kumajugu kɔni, n bɛna o bɛɛ lakali. A tɛ danna o fana ma. A bɛ to ka ban k'an balimaw lonanw ladon. Ni mɔgɔ minw ko u b'u ladon fana, a tɛ sɔn, a bɛ tila ka olu niin bɔ Ala ka jama na.

¹¹N terinyuman, i kana mɔgɔ ka kojugu ladege fɔɔ konyuman. Mɔgɔ min bɛ konyuman kɛ, o tigi ye Ala ta ye. Nga kojugukɛla kɔni t'a ye.

¹²Demetiriyusi kɔni, mɔgɔ bɛɛ b'ale tɔgɔnyuman fɔra. U do bɛ tinyɛ le fɔra. Anw fana b'a tɔgɔnyuman fɔ. I b'a lɔn ko an bɛ min fɔ, ko tinyɛ lo.

¹³Kuma caaman bɛ n fɛ k'a fɔ i ye. Nga n t'a fɛ ka sɛbɛnnikɛnan ta o kama.

¹⁴Bari ne yɛrɛ b'a fɛ k'i ye yan ni dɔɔni ka kuma nyɔgɔn fɛ.

¹⁵Ala ka hɛrɛ kɛ i ye. I teriw b'i fo. An ka foli lase an teriw kelen kelen bɛɛ ma fana.