Read LAYIDUKURA YIRALI 1 Bible Online

YIRALI 1 - LAYIDUKURA bible

YIRALI 1

¹Koo minw ka kan ka kɛ yan ni dɔɔni, Ala ye sira di Yezu Krista ma, a k'olu yira a ka baarakɛlaw la. O la, ale y'a ka mɛlɛkɛ ci Zan fɛ k'o yira a la.

²Ala ye kuma minw fɔ, ani Yezu ye koo minw kɛ, Zan min nyaa lara o bɛɛ kan, ale b'olu le nyafɔra yan.

³Ni sɛbɛ nin kalanbaga, walima a kɔnɔna kirayakuma lamɛnbaga min y'o labato, o tigi ye dubaden ye. Bari o koow kɛwaati surunyana.

⁴Ala ka jamakulu wolonwula[1] minw bɛ Azi mara la, ne Zan bɛ sɛbɛ nin ci aw ma. Ala min bɛ yen, ale tun bɛ yen, ani ale lo bɛna na. Ale ni a ka Nii wolonwula minw bɛ masasigilan nyakɔrɔ, olu ka nɛɛma ni hɛrɛ kɛ aw ye.

⁵Yezu Krista min ye Ala ka seeresɛbɛ ye, n'ale le kɛra suu fɔlɔ ye ka kunun, n'a ye masaw ka Masa ye, ale ka hɛrɛ ni dususuma di aw ma. An koo diyar'a ye, a y'an ka kojuguw yafa a joli bɔnnin sababu la,

⁶k'an kɛ masadenw ye, ni sarakalasebagaw ye, a Faa Ala nyakɔrɔ. O tuma na, see ye ale ta ye, bonya ka la a tɔgɔ kan waati bɛɛ. Amiina.

⁷Ayiwa, a bɛna na sankaba kan. Mɔgɔ bɛɛ bɛn'a ye. Hali minw tun y'a sɔgɔ ni taman ye, u bɛn'a ye. Siyaw bɛɛ bɛna kasi ale kɔsɔn. Ɔnhɔn, a bɛna kɛ ten. Amiina.

⁸Matigi Ala ko ale ye Alifa ni Omega ye,[2] ale min ye Setigi ye, n'a bɛ yen, n'a tun bɛ yen, a fana bɛna na.

⁹An minw kɛra masadenw ye n'an bɛ tɔɔrɔ munyuna Yezu kɔsɔn, ne Zan, aw baden, ne tun bɛ jamanadennin dɔ la kɔgɔji cɛma min tɔgɔ ko Patimɔsi, Ala ka kuma ni Yezu seereya kama.

¹⁰Dimasilon dɔ la, Nii Senuman barika la, ne ye kumakan dɔ mɛn n kɔfɛ, i n'a fɔ buru fiyɛkan.

¹¹A y'a fɔ ko: “I bɛ min yera, o sɛbɛn k'a ci Ala ka jama ma dugu wolonwula nunu kɔnɔ: Efɛzi ni Simirini, ani Pɛrigamu, Tiyatiri, ni Saadi ni Filadɛlifi ani Lawodise.”

¹²Ne ye n nyaa yɛlɛma ko n bɛna kumabaga nin filɛ, ne ye sanu lanpan wolonwula ye.

¹³Fɛɛn dɔ tun bɛ lanpan nunu cɛma, o fɛɛn nin bɔnin tun bɛ adamaden fɛ. Foroca tun b'a kaan na, sanu cɛsirilan tun b'a disi la.

¹⁴A kunsigi tun gwɛra parapara. A nyadenw tun bɛ i n'a fɔ tasuma.

¹⁵A seenw tun bɛ manamana i n'a fɔ u ye zira min ko k'a jɔsi. A kumakan tun bɛ i n'a fɔ jiba woyokan.

¹⁶Lolo wolonwula tun b'a kinibolo la. Murujan dafila diman tun b'a daa la. A nyada tun bɛ manamana i n'a fɔ tile.

¹⁷Ne nyaa lara a kan tuma min na dɔrɔn, ne benn'a kɔrɔ ka kirin. Nga a y'a kinibolo la ne kan k'a fɔ ko: “I kana siran, ne le ye fɔlɔ ye, ne le ye laban ye.

¹⁸Ne Nyanaman lo. N tun sara, nga sisan n bɛ nii na. N tɛna sa tugu abada! Saya ani lahara konnigɛ bɛ ne bolo.

¹⁹Ayiwa, i ye min ye ka tɛmɛ, o sɛbɛn. Min bɛ kɛra sisan, ani min bɛna na kɔfɛ, o fana sɛbɛn.

²⁰I tun ye lolo wolonwula minw ye n bolo, ani sanu lanpan wolonwula nunu kɔrɔ filɛ: Lolo nunu ye Ala ka jamakulu wolonwula nunu ka nyamɔgɔw[3] ye. Lanpan nunu ye u yɛrɛw ye.”