Read LAYIDUKURA YIRALI 11 Bible Online

YIRALI 11 - LAYIDUKURA bible

YIRALI 11

¹O kɔ, u ye sumanikɛfɛn dɔ don ne bolo, a bɔnin tun bɛ bere fɛ. U y'a fɔ ne ye ko: “Wili ka Alabatosoba ni sarakabɔlan suma, Ala batobaga minw bɛ yen, ka olu jati.

²Nga i kana Alabatosoba lukɛnɛ suma, i b'o to yen, bari o yɔrɔ dira siya wɛrɛw ma, olu minw bɛna dugu senuman halaki kalo bi naani ni fila kɔnɔ.

³Nga n bɛna sira di n ka seere fila ma, u bɛna dusukasifani don u kaan na ka waajuli kɛ tile waa kelen ni kɛmɛ fila ni bi wɔɔrɔ kɔnɔ.”

⁴O seere nunu ye olivuyiri fila ye, ani lanpan fila, minw bɛ dugukolo masacɛ nyafɛ.

⁵Ni mɔgɔ dɔ b'a fɛ ka kojugu kɛ u la, tasuma bɛna bɔ u daa la, k'o juguw jɛni. Ayiwa, u nyinibagaw bɛɛ bɛna sa ten.

⁶See b'u ye ka sanji minɛ ka lɔ, waasa sanji kana ben u ka waajuli tuma na. See b'u ye fana ka jii bɛɛ yɛlɛma k'a kɛ joli ye. Ni waati o waati y'u diya, tɔɔrɔ sifa o sifa y'u diya, u bɛ se k'o lase dugukolo mɔgɔw ma.

⁷N'u tilanna u ka seereya la tuma min na, sogo dɔ bɛna bɔ Dingɛjugu kɔnɔ k'u kɛlɛ. A bɛna se u kɔrɔ k'u faga.

⁸U suuw bɛna to sirada la dugu kɔnɔ, u tun ye u ka Matigi gwengwen lɔgɔ kan o yɔrɔ min yɛrɛ la. U b'o dugu nin wele ni miiriya dɔ ye ko Sodɔmu walima Ezipiti.

⁹Sira tɛna sɔrɔ ka di waasa u suuw ka don. Mɔgɔw bɛna u suuw filɛ fɔɔ tile saba ni tilan. Siya bɛɛ bɛna sɔrɔ o filɛlikɛla nunu na, ni jamana bɛɛ.

¹⁰Adamadenw nisɔn bɛna diya u fagako la, fɔɔ u bɛna to k'u ka bololafɛnw didi nyɔgɔn ma, bari kira fila nunu tun y'u tɔɔrɔ kosɛbɛ.

¹¹O kɔ, n y'a ye Ala y'u kunun tile saba ni tilan nunu tɛmɛnin kɔ. O tuma na, siranyaba y'u filɛbagaw minɛ.

¹²U ye kumakan dɔ mɛn ka bɔ sankolo la ko: “Aw ye yɛlɛ yan.” U yɛlɛla sankolo la sankaba dɔ kɔnɔ u juguw nyana.

¹³O waati yɛrɛ la, dugukolo yɛrɛyɛrɛla kosɛbɛ. Dugu nin tilan tannan benna. Mɔgɔ waa wolonwula nii tora o kabako nin na. Minw ma sɔrɔ ka sa, olu jaa tigɛra kosɛbɛ, u tora ka Ala tando.

¹⁴Ayiwa, bɔnɛ filanan tɛmɛna, a sabanan le bɛna na sisan.

¹⁵Mɛlɛkɛ wolonwulanan y'a ka buru fiyɛ, kumakanbabaw bɔra sankolo la ka to k'a fɔ ko: “Sisan, dinyɛ ka masaya kɛra an ka Matigi n'a ka Mɔgɔ wolomanin ta ye. A bɛna to masaya la tuma bɛɛ.”

¹⁶Cɛkɔrɔba mugan ni naani minw siginin bɛ Ala nyafɛ, olu y'u kunbiri gwan ka Ala bato,

¹⁷n'u b'a fɔ ko: “An bɛ barika la i ye Matigi Ala, ni Setigi Ala. E min bɛ yen, ani e min tun bɛ yen, bari e y'i ka sebagayaba yira, k'i ka masaya sigi n'o ye.

¹⁸Mɔgɔw dusu tun dimina. Nga e dimi waati le sera sisan. Suuw kitiwaati sera. E ka kiraw n'i ka mɔgɔw ani minw bɛɛ bɛ siran e nya, barikatan fara barikatigi kan, olu saratuma sera. Mɔgɔjuguw halakituma sera.”

¹⁹O kɔ, Alabatoso dayɛlɛla arijana na, ne ye Ala ka layidu taamasinyɛ kɛsu ye o soo nin kɔnɔ. O tuma na, saan tora ka pɛrɛn, ka manamana, kumakanbabaw bɔra. Sanbɛrɛ tora ka jigi ni fanga ye, dugukolo yɛrɛyɛrɛla.