Read LAYIDUKURA YIRALI 15 Bible Online

YIRALI 15 - LAYIDUKURA bible

YIRALI 15

¹O kɔ, n ye kabakoba dɔ wɛrɛ ye arijana na. O tun ye mɛlɛkɛ wolonwula ye, balawutigiw lo. O le ye tɔɔrɔ laban ye, bari Ala bɛn'a ka mɔnɛ laban bɔ n'o le ye.

²O kɔ, n ye fɛɛn dɔ ye min bɔnin bɛ baji fɛ, a nyaa tun ka nyi kosɛbɛ, a kɛra i n'a fɔ takami nyagaminin tun b'a la. Mɔgɔ minw ye see sɔrɔ Sogo nin kan, n'u ma sɔn k'a jaa bato, n'a tɔgɔ taamasinyɛ ma sɔrɔ ka ci u la, olu lɔnin tun b'o baji nin kan ni Ala ka kolonjow b'u bolo,

³n'u bɛ Ala ka baaraden Musa ni Sagaden ka dɔnkili la ko: “Matigi Ala ni Setigi Ala! E ka koo kɛtaw nyɔgɔn tɛ! I ka koo latigɛninw tilennin lo, u bɛɛ ye tinyɛ ye, siyaw ka masa!

⁴Jon le tɛna siran i nya, Matigi? Jon le tɛna i tɔgɔ bonya? I kelen le ka nyi. Siyaw bɛɛ bɛna na e bato, bari e y'i ka tilenninya yira kɛnɛ kan.”

⁵O tɛmɛnin kɔ, Ala ka layidu taamasinyɛ kɛsu tun bɛ Alabatoso min kɔnɔ arijana na, o daa yɛlɛla.

⁶Mɛlɛkɛ wolonwula minw tun ye balawutigiw ye, olu bɔra yen. Fani gwɛman parapara tun b'u kaan na, n'u bɛ manamana. Sanu cɛsirilanw tun b'u cɛɛ la.

⁷Nimanfɛn naani nunu dɔ ye sanudaga wolonwula di mɛlɛkɛ nunu ma. Ala min bɛ yen tuma bɛɛ, ale bɛna tɔɔrɔ min lase a ka dimi kɔsɔn, o daga nunu fanin b'o le la.

⁸O tuma na, Alabatoso fara sisi la, o min ye Ala ka nɔɔrɔ n'a ka setigiya taamasinyɛ ye. Mɔgɔ si tun tɛ se ka don soo nin kɔnɔ ni mɛlɛkɛ wolonwula nunu ka tɔɔrɔ ma tɛmɛ.