Read LAYIDUKURA YIRALI 16 Bible Online

YIRALI 16 - LAYIDUKURA bible

YIRALI 16

¹O kɔ, kumakanba dɔ bɔra Alabatoso kɔnɔ. O kumakan nin tun b'a fɔra mɛlɛkɛ wolonwula nunu ye ko: “Aw ye taa aw ka dagaw kɔnɔnafɛnw yɛlɛma dugukolo kan, o min ye Ala ka dimi ye.”

²Mɛlɛkɛ fɔlɔ nin taar'a ta yɛlɛma dugukolo kan. Sogo nin ka taamasinyɛ tun bɛ mɔgɔ minw bɛɛ kan, olu minw tun b'a jaa bato, jolijugu bɔra olu bɛɛ kan.

³Mɛlɛkɛ filanan y'a ta yɛlɛma kɔgɔji kɔnɔ. Jii kɛra i n'a fɔ u ye mɔgɔ kaan tigɛ a kɔnɔ. Jii kɔnɔ fɛɛnw bɛɛ sara.

⁴Sabanan y'a ta yɛlɛma baaw ni kɔɔw kɔnɔ. U bɛɛ yɛlɛmana ka kɛ joli ye.

⁵Mɛlɛkɛ min bɛ jii kunna, ale ko: “Ele Ala min bɛ yen, ni ele min tun bɛ yen, ele min ka nyi, i ka kiti tilennin lo. I y'a kɛ ten, o bɛnna kosɛbɛ.

⁶U ye i ka mɔgɔw ni kiraw ka joli bɔn, o la, i ye joli di u ma minji ye, o ka kan.”

⁷O kɔ, kumakan dɔ bɔra sarakabɔlan na ko: “Jaati! Matigi Ala, Setigi, i ka kiti tilennin lo, o ka nyi.”

⁸Mɛlɛkɛ naaninan y'a ta yɛlɛma tile kan. Dɔ farala tile fanga kan waasa ka adamadenw jɛni.

⁹Tile y'u tɔɔrɔ kosɛbɛ. O n'a ta bɛɛ, yan ni u ka nimisa ka Ala bonya, u tora k'a nɛni le k'a sɔrɔ see bɛ Ala ye o tɔɔrɔ nunu koo la.

¹⁰Mɛlɛkɛ duurunan y'a ta yɛlɛma Sogo nin ka masasigilan kan. Sogo nin bɛ yɔrɔ o yɔrɔ mara, o bɛɛ nyagamina. Mɔgɔw tora k'u daa cin tɔɔrɔ kojugu bolo.

¹¹U tora ka Ala nɛni k'a tɔgɔjugu fɔ u ka tɔɔrɔ sɔrɔninw bɛɛ kɔsɔn. U ma nimisa ka faran u ka kɛwaliw la dɛ.

¹²Mɛlɛkɛ wɔɔrɔnan y'a ta yɛlɛma Efarati baji kɔnɔ, a jara ka tɛmɛsira di kɔrɔn nyafan masaw ma.

¹³O kɔ, n ye jina saba ye, u bɔnin tun bɛ tɔrisenjan fɛ. Kelen bɔra Sogojugu nin daa la, kelen bɔra Sogo dɔ nin daa la, ani kelen bɔra Sutana ka kira daa la.

¹⁴O jina nunu ye Sutana ta ye minw bɛ kabakow kɛ. U bɛna taa dinyɛ kɔnɔ masaw lajɛn nyɔgɔn kan waasa ka kɛlɛ wili Setigi Ala ka lonba loon na.

¹⁵O la, Matigi ko: “Ni mɔgɔ min tora nyana ani k'a ka fani mara, o tigi bɛna dagamu. Ni taatuma sera, a suturanin ka taa, a kana maloya. Bari ne bɛna na i n'a fɔ soon.”

¹⁶Jina nunu y'u ka kɛlɛbolo lajɛn yɔrɔ dɔ la, min tɔgɔ ko Arimagedɔn eburukan na. [13]

¹⁷O kɔ, mɛlɛkɛ wolonwulanan y'a ta yɛlɛma fɔnyɔ na. Kumakanba dɔ bɔra masasigilan yɔrɔ la Alabatoso kɔnɔ ko: “A bɛɛ dafara sisan.”

¹⁸O tuma na, kumakan cayara, saan tora ka pɛrɛn, ka manamana. Dugukolo yɛrɛyɛrɛla kosɛbɛ, o yɛrɛyɛrɛ nin bɔnyɔgɔnko ma deli ka kɛ ka ye kabini adamaden danna k'a bila dugukolo kan.

¹⁹O ye duguba nin tilan saba. Dugu tɔw bɛɛ cira. Ala hakili ma bɔ Babilɔni duguba nin kɔ. A y'a ka duvɛn jalan nin di Babilɔnikaw ma, u y'a min. A y'u tɔɔrɔ kosɛbɛ k'a mɔnɛ bɔ.

²⁰Dugukolonin minw bɛ kɔgɔji cɛma, olu bɛɛ tununa. Kuluw si ma ye tugu.

²¹Sanbɛrɛ gwiliman gwilimanw daminɛna ka ben mɔgɔw kan, o min gwiliya bɛ kilo bi naani bɔ. Sanbɛrɛ nunu ka tɔɔrɔ kɔsɔn, adamadenw tora ka Ala tɔgɔjugu fɔ, bari o tɔɔrɔ ka bon haali.