Read LAYIDUKURA YIRALI 19 Bible Online

YIRALI 19 - LAYIDUKURA bible

YIRALI 19

¹O kɔ, ne ye jamaba dɔ kumakan mɛn arijana na ko: “Aleluya! Sebagaya ye an ka Ala ta ye! Adamadenw kisiko y'a ka baara ye! Bonya y'a ta ye. [15]

²A ka kiti tigɛcogo tilennin lo ani a ka kan! A ye kakalamuso nin halaki, ale min tun bɛ mɔgɔw bɛɛ bila kakalaya la dugukolo kan. A ye Ala ka baarakɛla minw faga, Ala ye o le juru sara a la ten.”

³U tilara k'a fɔ tugu ko: “Aleluya! Kakalamuso nin sisi bɛna to ka bɔ tuma bɛɛ.”

⁴Cɛkɔrɔba mugan ni naani nunu, ani nimanfɛn naani nunu tora k'u kunbiri gwan duguma ka Ala bato k'a siginin to a ka masasigilan kan, k'a fɔ ko: “Jaati! Aleluya! Amiina!”

⁵O kɔ, kumakan dɔ bɔra masasigilan yɔrɔ la ko: “Aw minw bɛ siran Ala nya, barikatan fara barikatigi kan, aw ye Ala tando.”

⁶O tuma na, ne ye kumakanba dɔ mɛn, i n'a fɔ jamaba kumakan, walima jiba woyokan, walima saan pɛrɛnkan. O kumakan nin ko: “Aleluya! Bari an Matigi, Setigi Ala sigira a ka masasigilan kan. [16]

⁷An ka nisɔndiya, ka nyanagwɛ! An ka barika la a ye bari Sagaden ka kɔnyɔya sera. A ka kɔnyɔmuso labɛnna,

⁸sira dir'a ma ko a ka dakamana fani don, fani min bɛ manamana.” O dakamana fani ye mɔgɔ senumanw ka kɛwaliw le ye.

⁹Mɛlɛkɛ y'a fɔ n ye ko: “A sɛbɛn ko: ‘Mɔgɔ minw welela Sagaden ka kɔnyɔya dumuni na, olu dagamuna.’ ” O kɔ, a ko n ma: “Nin ye Ala yɛrɛ ka kuma ye.”

¹⁰Ayiwa, ne birila a kɔrɔ ko n b'a bato, nga a y'a fɔ ne ye ko: “Ayi! Kana o kɛ, bari ne fana ye Ala ka baarakɛla le ye i n'a fɔ e n'i tɔnyɔgɔnw, minw ye Yezu ka kuma minɛ ka nya. I ka kan ka Ala le bato.” Yezu ye tinyɛko min fɔ, kiraw tun ye o sɔrɔ Nii Senuman barika la.

¹¹O tuma na ne ye arijana daa yɛlɛnin ye, ka mɔgɔ dɔ siginin ye soo gwɛman dɔ kan. O tigi tɔgɔ ko Mɔgɔtilennin, ani Tinyɛ Tigi. A bɛ kiti tigɛ. A bɛ kɛlɛ kɛ ni tilenninya ye.

¹²A nyadenw tun bɛ i n'a fɔ takami, masafugulan caaman tun b'a kuun na. Tɔgɔ dɔ tun sɛbɛnnin b'a kan mɔgɔ si tun tɛ se ka min kalan fɔɔ ale kelen.

¹³Fani min tun b'a kaan na, o tun donna joli la. A tɔgɔ ko Ala ka Kuma.

¹⁴Arijana mɔgɔw ka kɛlɛbolo tugunin tun b'a kɔ, n'u bɛ soo gwɛmanw kan, dakamana fani gwɛman parapara tun b'u kaan na.

¹⁵Murujan dadiman dɔ tun b'ale daa la. O ye adamadenw halakifɛn ye. Ale le bɛna siyaw kolo ni nigɛbere y'a bolo, ka duvɛn dilandaga dɔn o min ye Setigi Ala ka dimi ye.

¹⁶Tɔgɔ dɔ tun b'a ka fani n'a woto kan ko: “Masaw ka Masa, ni matigiw ka Matigi.”

¹⁷O tuma na, ne ye mɛlɛkɛ dɔ lɔnin ye tile kan. A y'a kaan kɔrɔ ta k'a fɔ dugaw ye ko: “Aw ye nyɔgɔn lajɛn ka na Ala ka dumuniba la.

¹⁸Aw ye na masaw sogo dumu, ni sɔlidasi kuntigiw, ni fangatigiw, ani sotigiw, n'u ka soow dumu. Aw ye na adamadenw sogo dumu: jɔɔnw ni hɔrɔnw, barikatanw ni barikatigiw, u bɛɛ.”

¹⁹O tuma na, n ye Sogo nin, ani dugukolo kan masaw ani u ka kɛlɛbolo bɛɛ ye, u lajɛnnin tun lo. U k'u bɛ taa sotigi n'a ka kɛlɛbolo kama.

²⁰Nga u ye Sogo nin kɛlɛ k'a minɛ, ka Sutana ka kira minɛ. Ale min tun bɛ to ka kabakow kɛ a nyana ka mɔgɔw lafili ka di Sogo nin ma, k'a kɛ Sogo nin ka taamasinyɛ bilara mɔgɔw kan, n'u y'u bato. U ye Sogo nin, ani Sutana ka kira minɛ k'u fili jahanama na. Kiribi le mananin bɛ yen.

²¹Murujan min bɛ sotigi nin daa la, a y'o kɛ ka kɛlɛden tɔw bɛɛ faga. Dugaw y'u suuw dumu ka fa.