Read LAYIDUKURA YIRALI 2 Bible Online

YIRALI 2 - LAYIDUKURA bible

YIRALI 2

¹“Sɛbɛ ci Ala ka jama nyamɔgɔ[4] ma Efɛzi ko: Lolo wolonwula nunu bɛ min kinibolo la, n'a bɛ taamana sanu lanpan wolonwula nunu cɛma, ale ko:

²Ne b'aw taama cogo lɔn. Aw bɛ baara min kɛra, ani aw munyunin lo cogo min na, ne b'o bɛɛ lɔn. Ne y'a lɔn ko aw tɛ sɔn mɔgɔjuguw ka koo la. Minw k'olu ye cidenw ye k'a sɔrɔ cidenw tɛ, aw ye olu kɔrɔbɔ, k'a ye ko galontigɛlaw lo.

³Aw tɔɔrɔla ne kɔsɔn nga aw munyuna, aw m'aw fari faga.

⁴O n'a ta bɛɛ, ne b'aw jalaki. Bari aw tun bɛ ne kanu cogo min na fɔlɔ, aw tɛ ne kanu ten tugu.

⁵Aw tun bɛ cogo min na fɔlɔfɔlɔ la, n'aw yɛlɛmana, aw ye miiri o la kosɛbɛ ka nimisa, k'aw ka fɔlɔfɔlɔ kɛwaliw nyɔgɔn kɛ. N'aw m'o kɛ, ne bɛna na aw kama, k'aw ka lanpan ta ka bɔ a nɔɔ na.

⁶Nga koo kelen b'aw la, o ka di ne ye. Nikola kɔmɔgɔw koo ka go ne ye cogo min na, u koo ka go aw fana ye ten.

⁷“Nii Senuman bɛ min fɔra Ala ka jama ye, ni min b'a fɛ ka faamuli kɛ, o tigi k'a tulo malɔ a fɛ ka nya. “Ni min munyuna ka see sɔrɔ, Ala ka arijanayiri min bɛ nii don mɔgɔ la, ne b'o deen dɔ d'a tigi ma k'a dumu.

⁸“Sɛbɛ ci Ala ka jama nyamɔgɔ[5] ma Simirini ko: “Min ye Fɔlɔ ni Laban ye, min tun sara ka kunun, ale ko:

⁹Ne b'aw ka tɔɔrɔ n'aw ka faantanya lɔn. Nga n b'a fɔ ko aw ye nafolotigiw ye. Minw k'olu ye Zuwifuw ye k'a sɔrɔ Zuwifuw tɛ, olu bɛ tɔgɔcɛn min lara aw kan, ne b'o lɔnna. Olu kɛnin bɛ Sutana kɔmɔgɔw le ye.

¹⁰Tɔɔrɔ min bɛna aw sɔrɔ, aw kana siran o nya. Ayiwa, aw cɛma, mɔgɔ damani bɛna kaso kɛ Sutana sababu la. A bɛna o kɛ k'aw kɔrɔbɔ. Aw bɛna tɔɔrɔ tile tan kɔnɔ. Aw ka jija fɔɔ ka taa se saya ma, n'o kɛra, aw bɛna sini hɛrɛ sɔrɔ ne barika la.

¹¹“Nii Senuman bɛ min fɔra Ala ka jama ye, ni min b'a fɛ ka faamuli kɛ, o tigi k'a tulo malɔ a fɛ ka nya. “Ni min munyuna ka see sɔrɔ, o tigi tɛna sini tɔɔrɔ sɔrɔ, o min ye saya filanan ye.

¹²“Sɛbɛ ci Ala ka jama nyamɔgɔ[6] ma Pɛrigamu ko: “Murujan dafila diman bɛ min fɛ, ale ko:

¹³Aw bɛ dugu min na, ne y'a lɔn ko Sutana ka masasigilan bɛ o yɔrɔ la. O n'a ta bɛɛ, aw nɔrɔnin bɛ ne la, aw ma tigɛ ne la. U ye ne ka seerenyuman Antipasi faga aw fɛ yen loon min na, hali o waati la, aw m'aw jigi bɔ ne kan k'aw to Sutana ka sigiyɔrɔ nin na.

¹⁴O n'a ta bɛɛ, ne b'aw jalaki koo dɔw la. Bari aw cɛma, dɔw nɔrɔnin bɛ Balamu ka kalan na, ale min tun bɛ Balaki kɔnɔnasu waasa a ka Isirayɛlidenw nigɛ k'u bila josɔnsogo nyimi na, ani ka kakalaya kɛ.

¹⁵Dɔw b'aw cɛma fana minw sɔnna Nikola kɔmɔgɔw ka kalan ma.

¹⁶Ayiwa, o tuma na, aw ye nimisa ka faran aw ka kojuguw la. N'o tɛ, n bɛ na aw fɛ sisan. Murujan min bɛ n daa la, n bɛna o kɛ k'u kɛlɛ.

¹⁷“Nii Senuman bɛ min fɔra Ala ka jama ye, ni min b'a fɛ ka faamuli kɛ, o tigi k'a tulo malɔ a fɛ ka nya. “Ni min munyuna ka see sɔrɔ, ne bɛna maanɛ dogonin dɔ di o tigi ma, ka kabakuru gwɛman dɔ d'a ma fana, tɔgɔ dɔ b'o kan, mɔgɔ si tɛ o tɔgɔkura min lɔn n'o kabakuru sɔrɔbaga tɛ.”

¹⁸“Sɛbɛ ci Ala ka jama nyamɔgɔ[7] ma Tiyatiri ko: “Ala Dencɛ, o min nyadenw bɛ i n'a fɔ tasuma, n'a seenw bɛ i n'a fɔ zira konin, ale ko:

¹⁹Aw bɛ min kɛra, ne b'o lɔn. Ne koo ka d'aw ye cogo min na, ani aw jigi bɛ ne kan cogo min na, ne b'o lɔn, n'aw ka baara kɛcogo, ani aw ka munyuli, ne b'o bɛɛ lɔn. Aw bɛ baara min kɛ sisan, o ka ca ni fɔlɔta ye.

²⁰O bɛɛ n'a ta, ne b'aw jalaki, bari aw bɛ Zezabɛli ka kɛwaliw diyara a la. O muso nin ko ale ye kira ye, k'a sɔrɔ kira tɛ. A b'a la ka n ka mɔgɔw lafili n'a ka kalan ye, k'u bila kojugukɛ ni josɔnsogo nyimi na.

²¹N y'a to fɔlɔ waasa a k'a sɔɔn yɛlɛma. Nga a do t'a fɛ k'a ka kakalaya dabila.

²²Ayiwa, n bɛn'a kɛ a bɛ la bana bolo ka tɔɔrɔ. A ni minw jɛnna ka kakalaya kɛ, n bɛna tɔɔrɔba lase olu fana ma, fɔɔ ni u y'u ka kakalaya dabila.

²³N bɛna saya lase a deenw ma, o la Ala ka jama bɛɛ bɛn'a lɔn ko ne le bɛ mɔgɔ bɛɛ kɔnɔnako n'u ka ;naniyaw lɔn. N bɛna aw kelen kelen bɛɛ sara ka kɛnyɛ n'aw ka kɛwaliw ye.

²⁴“Aw tɔw, aw minw bɛ Tiyatiri n'aw ma sɔn ka kɛ a kɔmɔgɔw ye, aw minw ma Sutana ka gundo nyini k'a lɔn, aw kɔni, n tɛna koo wɛrɛ la aw kan.

²⁵Nga aw y'aw jigi la ne kan cogo min na, aw k'aw yɛrɛ minɛ ka nya ten fɔɔ ne ka kɔsegi ka na.

²⁶Ni min y'a yɛrɛ minɛ ka nya, ka ne ka fɔtaw bɛɛ kɛ fɔɔ ka se u daan na, ne bɛna siya wɛrɛw ka kuntigiya di o tigi ma.

²⁷A bɛna u mara ni nigɛbere ye k'u ci, i n'a fɔ mɔgɔ bɛ daga ci cogo min na.

²⁸Ne yɛrɛ y'o fanga nin sɔrɔ n Faa fɛ ten. Loloba min bɛ bɔ dugugwɛdafɛ, ne bɛna o d'a ma fana.

²⁹“Nii Senuman bɛ min fɔra Ala ka jama ye, ni min b'a fɛ ka faamuli kɛ, o tigi k'a tulo malɔ a fɛ ka nya.