Read LAYIDUKURA YIRALI 3 Bible Online

YIRALI 3 - LAYIDUKURA bible

YIRALI 3

¹“Sɛbɛ ci Ala ka jama nyamɔgɔ ma Saadi ko: “Ala ka Nii wolonwula ni lolo wolonwula bɛ min fɛ, ale ko: Ne b'aw ka kɛwaliw lɔn. U b'a miiri ko aw nyanaman lo, k'a sɔrɔ aw ye suuw ye Ala nyana. [8]

²Aw k'aw yɛrɛ minɛ, waasa barika dɔɔni min b'aw la, o fana kana nagasi. Bari aw ka kɛwaliw si ma ne ka Ala nyaa fa.

³Aw ye kuma min mɛn ka sɔn a ma, aw k'aw hakili jigi o la, k'aw sɔɔn yɛlɛma k'o kuma nin minɛ ka nya dɛ! N'o tɛ, ne bɛna na bari aw la i n'a fɔ soon, aw tɛna ne natuma lɔn.

⁴Mɔgɔ damani kɔni b'aw fɛ Saadi minw ma nɔgɔ. Olu bɛna fani gwɛmanw don ka n bila sira, bari u ka kan n'o ye.

⁵Ayiwa, ni min munyuna ka see sɔrɔ, o tigi fana bɛna fani gwɛman don ten. Mɔgɔ nyanamanw tɔgɔw bɛ sɛbɛ min kɔnɔ, n tɛna o tigi tɔgɔ jɔsi ka bɔ o kɔnɔ. Nga n bɛna sɔn k'a yira n Faa n'a ka mɛlɛkɛw la, k'o tigi ye ne ta ye.

⁶“Nii Senuman bɛ min fɔra Ala ka jama ye, ni min b'a fɛ ka faamuli kɛ, o tigi k'a tulo malɔ a fɛ ka nya.

⁷“Sɛbɛ ci Ala ka jama nyamɔgɔ[9] ma Filadɛlifi ko: “Dawuda ka konnigɛ bɛ min bolo, ale ye Senuman ye tigitigi, ale min bɛ daa yɛlɛ ni mɔgɔ si tɛ se k'a tugu, n'a y'a tugu, mɔgɔ si tɛ se k'a yɛlɛ, ale ko:

⁸Ne b'aw ka kɛwaliw lɔn. Ayiwa, ne ye daa dɔ yɛlɛ aw nya, mɔgɔ si tɛ se ka min tugu. Fanga bɛrɛ t'aw la, nga aw ye ne ka kuma labato, aw ma bɔ ne kɔ.

⁹Ayiwa, n bɛna Sutana batobagaw karaba aw ye, olu minw k'u ye Zuwifuw ye k'a sɔrɔ Zuwifuw tɛ, galontigɛlaw lo. N bɛna u wajibiya ka na u kunbiri gwan aw kɔrɔ. O la, u bɛn'a lɔn ko aw koo ka di ne ye.

¹⁰Aw banbana ka ne ka kuma labato. O la, ne fana bɛna aw kɔlɔsi tɔɔrɔ tuma na, o min bɛna don dinyɛ mumɛ bɛɛ kɔnɔ ka mɔgɔw kɔrɔbɔ.

¹¹N bɛ na yan ni dɔɔni. Aw ye jija k'aw yɛrɛ kɔlɔsi waasa mɔgɔ si kana na aw ka sesɔrɔjala bɔsi aw la.

¹²Ni min munyuna ka see sɔrɔ, n bɛn'a kɛ o tigi bɛ to n ka Ala batoso kɔnɔ i n'a fɔ tuloman. A bɛna to yen kudayi. Ne bɛna n ka Ala n'a ka dugu tɔgɔ sɛbɛn a kan, o dugu min ye Zeruzalɛmu kura ye min bɛna jigi ka bɔ Ala fɛ arijana na. Ne bɛna n tɔgɔkura fana sɛbɛn a kan.

¹³“Nii Senuman bɛ min fɔra Ala ka jama ye, ni min b'a fɛ ka faamuli kɛ, o tigi k'a tulo malɔ a fɛ ka nya.

¹⁴“Sɛbɛ ci Ala ka jama nyamɔgɔ ma Lawodise ko: [10] “Min tɔgɔ ko Amiina, ale min ye Seere tilennin tigitigi ye, ani Ala ka danfɛnw bɛɛ bɔra ale la, a ko:

¹⁵Ne b'aw ka kɛwaliw lɔn. Aw ma suma i n'a fɔ jisuma, aw gwannin tɛ i n'a fɔ jigwannin. N'aw tun kɛra nunu fila dɔ ye, o tun ka fisa.

¹⁶Aw gwannin tɛ, aw sumanin tɛ fana, fɔɔ walawalanin, o tuma na ne bɛna aw fɔɔnɔ dɛ!

¹⁷Aw b'a miiri ko aw ye fɛntigiw ye, ko fɛɛn bɛɛ b'aw fɛ, ko aw wasara, k'a sɔrɔ aw m'a lɔn ko aw ye dɛsɛbagatɔw ye, ni makaritɔw, ni faantanw, ni finyɛntɔw ani fɛɛrɛtɔw ye.

¹⁸Ayiwa, ne b'aw ladi. Aw ye na sanu yɛrɛ yɛrɛ san ne fɛ, fɛɛn min b'a to aw bɛ kɛ fɛntigiw ye. Aw ye na fanigwɛ san k'aw ka maloya bɔ, ani ka nyadimifura minɛ ne fɛ k'aw yɛrɛ furakɛ waasa aw ka yeli kɛ.

¹⁹Minw koo ka di ne ye, ne bɛ olu ladi k'u kolo. Ayiwa, aw ye jija, ka nimisa ka faran aw ka kojugu la.

²⁰Ne lɔnin bɛ aw ka daaw la ka daa kɔkɔ. Ni min ye n kaan mɛn ka daa yɛlɛ, ne bɛ don o tigi fɛ, an bɛ dumuni kɛ nyɔgɔn fɛ.

²¹Ni min munyuna ka see sɔrɔ, o tigi bɛna sigi ni ne ye n ka masaya la, i n'a fɔ ne ye see sɔrɔ ka sigi ni n Faa ye a ka masaya la cogo min na.

²²“Nii Senuman bɛ min fɔra Ala ka jama ye, ni min b'a fɛ ka faamuli kɛ, o tigi k'a tulo malɔ a fɛ ka nya.”