Read LAYIDUKURA YIRALI 5 Bible Online

YIRALI 5 - LAYIDUKURA bible

YIRALI 5

¹O tuma na, min siginin bɛ masasigilan kan, ne ye sɛbɛ melekenin dɔ ye ale kinibolo la. A nyaa n'a kɔɔ bɛɛ sɛbɛnnin tun lo. A datugunin tun bɛ ni taamasinyɛ wolonwula ye.

²O kɔ, ne ye mɛlɛkɛ setigi dɔ ye, ale y'a kaan kɔrɔ ta k'a fɔ ko: “Ka taamasinyɛ nunu walaka ka sɔrɔ ka sɛbɛ nin dayɛlɛ, jon ka kan n'o ye?”

³Mɔgɔ ma sɔrɔ yɔrɔ si la min bɛ se ka sɛbɛ nin yɛlɛ k'a filɛ. Sankolo la, dugukolo kan, dugukolo jukɔrɔ, a ma sɔrɔ.

⁴Ne kasira kosɛbɛ, bari mɔgɔ si ma sɔrɔ min bɛ se ka sɛbɛ nin yɛlɛ ani k'a filɛ.

⁵Cɛkɔrɔba nunu kelen y'a kaan to ne ma ko: “I kana kasi. Zuda kɔmɔgɔw ka waraba, Dawuda ka dencɛ nin kɛ! Ale le ye see sɔrɔ. O la, a bɛ se ka sɛbɛ nin yɛlɛ.”

⁶O tuma na, ne ye Sagaden dɔ ye, a wilila ka lɔ. Nimanfɛn naani nunu ni cɛkɔrɔbaw tun kɛnin bɛ k'a lamini. A kɛra i n'a fɔ a tun fagara. Gɔɔn wolonwula tun b'a la, ani nyaden wolonwula, o minw ye Ala ka Nii wolonwula ye n'a bɛ to k'u minw ci dinyɛ faan bɛɛ la.

⁷Min tun siginin bɛ masasigilan kan, Sagaden gwɛrɛla ka sɛbɛ nin minɛ ale fɛ.

⁸A y'a minɛ minkɛ, nimanfɛn naani nunu, ani cɛkɔrɔba mugan ni naani nunu bɛɛ y'u kunbiri gwan a kɔrɔ. Kolonjo, ani sanudagaw tun b'u bɛɛ bolo minw fanin tun bɛ wusulan na. O fɛɛn nunu tun ye Ala ka mɔgɔnyumanw ka daliliw taamasinyɛ ye.

⁹U tun bɛ dɔnkilikura dɔ lara ko: “E ni wale, ele le bɛ se ka sɛbɛ nin minɛ k'a taamasinyɛ nunu walaka. Bari u tun y'i faga. I joli min tun bɔnna, o kɛra sababu ye i ye mɔgɔ dɔw kunmabɔ k'u kɛ Ala taw ye ka bɔ siyaw bɛɛ cɛma, ani jamanaw bɛɛ la.

¹⁰E y'u kɛ masaw ni sarakalasebagaw ye dugukolo kan Ala nyakɔrɔ.”

¹¹Ne tun bɛ filɛli kɛra halibi, ne ye mɛlɛkɛ caaman kaan mɛn, u tun ka ca haali, fɔɔ u tɛ se ka jati ka daa lɔn. U lɔnin tun bɛ ka masasigilan ni nimanfɛnw ni cɛkɔrɔba nunu lamini.

¹²U tun bɛ to k'u kaan kɔrɔ ta k'a fɔ ko: “U tun ye Sagaden min faga, ale ka kan ni setigiya ye, nafolotigiya, ani lɔnniya, ni fanga ni kunkɔrɔta ni bonya, ani tandoli y'a ta ye!”

¹³Sankolo kɔnɔ fɛɛnw, ni dugukolo kan taw, ni dugukolo jukɔrɔ taw, ni jii kɔnɔ fɛɛnw, danfɛnw mumɛ bɛɛ y'a daminɛ ka dɔnkili la ko: “Min siginin bɛ masasigilan kan, ale ni Sagaden tɔgɔ ka tando. Nɔɔrɔ ni bonya, ani setigiya ka kɛ u ta ye tuma bɛɛ!”

¹⁴Nimanfɛn naani nunu bɛ to k'u laminɛ ko: “Amiina!” Cɛkɔrɔba nunu bɛ to k'u kunbiri gwan k'u bato.