Read LAYIDUKURA YIRALI 8 Bible Online

YIRALI 8 - LAYIDUKURA bible

YIRALI 8

¹Sagaden ye taamasinyɛ wolonwulanan bɔ tuma min na, arijana bɛɛ sumana, fɔɔ ka taa se lɛrɛ tilancɛ nyɔgɔn ma.

²Ne ye mɛlɛkɛ wolonwula ye minw bɛ lɔ Ala nyafɛ, buru fiyɛta wolonwula dira u ma.

³Mɛlɛkɛ wɛrɛ nana lɔ sarakabɔyɔrɔ gɛrɛfɛ. Wusulandaga sanulaman tun b'ale bolo. U ye wusulan caaman d'a ma, waasa a k'o ni Ala ka jama ka daliliw jɛn k'u kɛ saraka ye sarakabɔyɔrɔ sanulaman kan, o min bɛ masasigilan nyafɛ.

⁴Mɛlɛkɛ ye wusulan min jɛni, o sisi wilila ni Ala ka jama ka daliliw ye Ala nyakɔrɔ.

⁵O kɔ, mɛlɛkɛ ye wusulandaga nin fa takami na sarakabɔyɔrɔ kan, k'a fili ka jigi dugukolo kan. Saan daminɛna ka pɛrɛn, ka manamana, mankan cayara, dugukolo yɛrɛyɛrɛla.

⁶Buruw tun bɛ mɛlɛkɛ wolonwula minw bolo, u y'u yɛrɛw labɛn waasa k'u fiyɛ.

⁷Fɔlɔ nin y'a ta fiyɛ, sanbɛrɛ ni takami, ni joli nyagaminin bɔra ka bɔn dugukolo kan. Dugukolo tilan sabanan jɛnina, yiriw tilan sabanan fana jɛnina, ani binkɛnɛ bɛɛ.

⁸Filanan nin y'a ta fiyɛ. O tuma na, fɛɛn dɔ min bɛ i n'a fɔ kulu belebeleba tasumalaman bɔra ka jigi kɔgɔji kɔnɔ. Kɔgɔji tilan sabanan yɛlɛmana ka kɛ joli ye.

⁹Jii kɔnɔ fɛɛnw tilan sabanan jɛnina, kurunw tilan sabanan halakira.

¹⁰Mɛlɛkɛ sabanan y'a ta fiyɛ, lolo belebeleba dɔ benna baji kɔnɔ ani jii bɔyɔrɔw kan k'u tilan sabanan minɛ. O lolo nin tun bɛ i n'a fɔ tasuma.

¹¹A tɔgɔ tun ko Kunanya. Jii bɛɛ tilan sabanan kunanyara. Jii ka kunanya kojugu fɛ, mɔgɔ caaman sara.

¹²Naaninan y'a ta fiyɛ, tile tilan sabanan dibira, ni kalo, ani lolow. O la, yeelen bɛrɛ tun tɛ yen tilefɛ, suu dibira kosɛbɛ.

¹³O tuma na, ne tun bɛ filɛli kɛra, ne ye sɛgɛn dɔ tɛmɛtɔ pɛrɛnkan mɛn fɔɔ sankolo la. A tun b'a fɔra ko: “Mɛlɛkɛ saba minw tora, olu bɛna buru minw fiyɛ sisan, ebe! Ebe! Bɔnɛ ye dinyɛ mɔgɔw ta ye, o buru nunu fiyɛli kama.”