Read La Bible en Malgache Genesisy 11 Bible Online

Genesisy 11 - La Bible en Malgache bible

Genesisy 11

¹Ny tany manontolo dia nampiasa fiteny tokana sy voambolana mitovy.

²Ary raha niainga avy any atsinanana ny olona dia nahita lohasaha tany amin’ny tany Sinara ka nonina tao.

³Dia nifampiresaka izy ireo hoe: Andeha isika hanao biriky dia hodorana tsara. Ary nataony solom-bato ny biriky, ary nataony solon-drihitra ny godorao.

⁴Sady hoy izy: Andeha isika hanorina tanàna sy tilikambo ka hahatakatra ny lanitra ny tampony, dia hanao izay hahazoantsika laza mba tsy hielezantsika eny ambonin’ny tany rehetra!

⁵Dia nidina NY TOMPO hijery ny tanàna sy ny tilikambo izay nataon’ny zanak’olombelona.

⁶Ary hoy NY TOMPO: Indro, firenena tokana ny olona, sady iray fiteny izy rehetra, ary ity vao fiandohan’ny hataony. Koa ankehitriny dia tsy misy azo sakanana izay kasainy hatao na inona na inona.

⁷Aoka Isika hidina ka eny no hampisavorovoroantsika ny fiteniny mba tsy hifankahalala teny izy ireo.

⁸Avy tao no nampielezan’NY TOMPO azy ireo manerana ny tany manontolo; dia nitsahatra tsy nanorina ilay tanàna intsony izy.

⁹Koa izany no nanaovana ny anarany hoe Babela[11] satria tao NY TOMPO no nampisavorovoro ny fitenin’ny tany rehetra, ary avy tao no nampielezan’NY TOMPO ny olona ho eny ambonin’ny tany rehetra.

¹⁰Ireto no taranak’i Sema: Zato taona i Sema raha niteraka an’i Arpaksada, roa taona taorianan’ny safodrano.

¹¹Ny andro niainan’i Sema taorianan’ny niterahany an’i Arpaksada dia dimanjato taona; niteraka zazalahy sy zazavavy izy.

¹²Dimy amby telopolo taona i Arpaksada raha niteraka an’i Sela.

¹³Ny andro niainan’i Arpaksada taorianan’ny niterahany an’i Sela dia telo sy efajato taona; niteraka zazalahy sy zazavavy izy.

¹⁴Telopolo taona i Sela raha niteraka an’i Ebera.

¹⁵Ny andro niainan’i Sela taorianan’ny niterahany an’i Ebera dia telo sy efajato taona; niteraka zazalahy sy zazavavy izy.

¹⁶Efatra amby telopolo taona i Ebera raha niteraka an’i Pelega.

¹⁷Ny andro niainan’i Ebera taorianan’ny niterahany an’i Pelega dia telopolo sy efajato taona; niteraka zazalahy sy zazavavy izy.

¹⁸Telopolo taona i Pelega raha niteraka an’i Reo.

¹⁹Ny andro niainan’i Pelega taorianan’ny niterahany an’i Reo dia sivy sy roanjato taona; niteraka zazalahy sy zazavavy izy.

²⁰Roa amby telopolo taona i Reo raha niteraka an’i Seroga.

²¹Ny andro niainan’i Reo taorianan’ny niterahany an’i Seroga dia fito sy roanjato taona; niteraka zazalahy sy zazavavy izy.

²²Telopolo taona i Seroga raha niteraka an’i Nahora.

²³Ny andro niainan’i Seroga taorianan’ny niterahany an’i Nahora dia roanjato taona; niteraka zazalahy sy zazavavy izy.

²⁴Sivy amby roapolo taona i Nahora raha niteraka an’i Tera.

²⁵Ny andro niainan’i Nahora taorianan’ny niterahany an’i Tera dia sivy amby folo amby zato taona; niteraka zazalahy sy zazavavy izy.

²⁶Fitopolo taona i Tera raha niteraka an’i Abrama sy i Nahora ary i Harana.

²⁷Ary izao no taranak’i Tera: I Tera dia niteraka an’i Abrama sy i Nahora ary i Harana. I Harana dia niteraka an’i Lota.

²⁸Mbola velona i Tera rainy tamin’ny nahafatesan’i Harana tao amin’ny tany nahaterahany, tao Oran’ny Kaldeana.

²⁹Samy naka vady i Abrama sy i Nahora; ny anaran’ny vadin’i Abrama dia Saray, ary ny anaran’ny vadin’i Nahora dia Milka, zanakavavin’i Harana, rain’i Milka sy rain’Iska.

³⁰Ary momba i Saray; tsy nanan-janaka izy.

³¹Ary i Tera dia nitondra an’i Abrama zanany sy i Lota zafiny, zanak’i Harana, ary i Saray vinantovaviny, vadin’i Abrama zanany. Niara-niala taminy tao Oran’ny Kaldeana hankany amin’ny tany Kanana ireo. Tonga tao Harana izy ireo ka nonina tao.

³²Dimy sy roanjato taona ny andro niainan’i Tera raha maty tao Harana izy.