Read La Bible en Malgache Genesisy 12 Bible Online

Genesisy 12 - La Bible en Malgache bible

Genesisy 12

¹Ary hoy NY TOMPO tamin’i Abrama: Mandehana miala amin’ny taninao sy ny havanao ary ny tranon’ny rainao hankany amin’ny tany izay hasehoko anao.

²Hahatonga anao ho firenena lehibe Aho sady hitahy anao sy hahalehibe ny anaranao; ho fitahiana tokoa ianao.

³Hitahy izay manisy soa anao Aho, fa hanozona izay manozona anao. Aminao no hitahiana ny firenena rehetra ambonin’ny tany.

⁴Dia nandeha i Abrama, araka izay nolazain’NY TOMPO taminy, ary mba niaraka taminy koa i Lota. Efa dimy amby fitopolo taona i Abrama raha niala tao Harana.

⁵Ary i Abrama dia nitondra an’i Saray vadiny sy i Lota zana-drahalahiny mbamin’ny fananan’izy rehetra izay noharìny sy ny olona izay azony tao Harana. Niainga izy ireo hankany amin’ny tany Kanana, dia tonga tany amin’ny tany Kanana.

⁶Ary i Abrama dia nitety ny tany hatrany Sekema, hatreo amin’ny hazo terebinta*n’i More. Ny Kananita no tao amin’ny tany Kanana tamin’izany fotoana izany.

⁷Ary NY TOMPO niseho tamin’i Abrama ka niteny hoe: Ny taranakao no homeko ity tany ity. Dia teo izy no nanorina alitara ho an’NY TOMPO izay niseho taminy.

⁸Ary nifindra niala teo hankany amin’ny tendrombohitra atsinanan’i Betela izy ka nanorina ny tranolainy teo anelanelan’i Betela teo andrefany ary i Ay teo atsinanany. Nanorina alitara ho an’NY TOMPO teo koa izy ka niantso ny anaran’NY TOMPO.

⁹Dia niainga indray i Abrama ka nandroso niandalana ho any Negeva.

¹⁰Ary nisy mosary teo amin’ny tany; dia nidina nankany Ejipta i Abrama mba hivahiny any fa mafy ny mosary teo amin’ny tany.

¹¹Rehefa akaiky ho tonga tany Ejipta izy dia hoy izy tamin’i Saray vadiny: Indro, fantatro fa vehivavy tsara tarehy ianao,

¹²koa raha hitan’ny Ejiptiana dia hataony hoe vadiny io! Dia hovonoiny aho fa ianao kosa dia hovelominy.

¹³Miangavy anao aho, lazao fa anabaviko ianao mba hanisiany soa ahy noho ny aminao ka ho velona aho noho ny aminao.

¹⁴Rehefa tonga tany Ejipta i Abrama dia hitan’ny Ejiptiana fa tsara tarehy tokoa Ravehivavy.

¹⁵Nahita azy koa ireo tandapan’i Farao ka nidera azy tamin’i Farao; dia noentina tao an-tranon’i Farao izy.

¹⁶Ary nasian’i Farao soa i Abrama noho ny amin’i Saray; nahazo ondry, omby, borikilahy, mpanompolahy, mpanompovavy, borikivavy ary rameva izy.

¹⁷Nasian’NY TOMPO areti-mandoza anefa i Farao sy ny ankohonany noho ny amin’i Saray, vadin’i Abrama.

¹⁸Dia nampaka an’i Abrama i Farao ka niteny hoe: Inona izao nataonao tamiko izao? Nahoana no tsy nambaranao tamiko fa vadinao izy?

¹⁹Nahoana ianao no nilaza hoe: Anabaviko izy? Nefa noho izay no nakako azy ho vady. Koa ankehitriny, indro ny vadinao, ento any izy dia mandehana!

²⁰Dia nanome baiko ireo mpanompony i Farao handefa an’i Abrama sy ny vadiny mbamin’ny fananany rehetra.