Read La Bible en Malgache Genesisy 13 Bible Online

Genesisy 13 - La Bible en Malgache bible

Genesisy 13

¹Ary niakatra niala tany Ejipta ho any Negeva i Abrama, dia izy sy ny vadiny mbamin’ny fananany rehetra. Ary niaraka taminy koa i Lota.

²Ary nanana harena be i Abrama, dia omby aman’ondry sy volafotsy ary volamena.

³Ary mbola nandeha ihany izy ka nifindrafindra, hatrany Negeva ka hatrany Betela izay niorenan’ny tranolainy tamin’ny voalohany, teo anelanelan’i Betela sy i Ay,

⁴teo amin’ny tany izay nisy ilay alitara nataony tamin’ny voalohany; ary niantso ny anaran’NY TOMPO teo i Abrama.

⁵Ary i Lota koa, izay niara-nandeha tamin’i Abrama, dia mba nanana ondry sy omby ary tranolay.

⁶Ary tsy omby azy roa lahy hiarahany monina ny tany satria be loatra ny fananany avy ka tsy afaka niara-monina intsony izy ireo.

⁷Dia niady ny mpiandry ombin’i Abrama sy ny mpiandry ombin’i Lota. Ny Kananita sy ny Perizita no nonina tao Kanana tamin’izany fotoana izany.

⁸Ary hoy i Abrama tamin’i Lota: Aoka re mba tsy hisy ady amiko sy aminao, na amin’ny mpiandry ombiko sy ny mpiandry ombinao, fa mpihavana isika.

⁹Moa tsy eo anoloanao va ny tany rehetra? Miangavy anao aho, aoka hisara-dalana isika: Raha mianavaratra ianao dia hianatsimo aho, fa raha mianatsimo kosa ianao dia hianavaratra aho.

¹⁰Dia nanopy ny masony i Lota ka nitazana ny tany rehetra teny amoron’i Jordana hatrany akaikin’i Zoara fa azon-drano avokoa izy ireo, tahaka ny sahan’NY TOMPO sy tahaka ny tany Ejipta. Talohan’ny nandravan’NY TOMPO an’i Sodoma sy i Gomora izany.

¹¹Dia nifidy ny tany rehetra teo amoron’i Jordana i Lota ary niainga niantsinanana; toy izany no nisarahan’izy roa lahy.

¹²I Abrama dia nonina tao amin’ny tany Kanana, fa i Lota kosa dia nonina tany amin’ireo tanàna amin’ny faritra manamorona an’i Jordana ka namindrafindra ny tobiny hatrany Sodoma.

¹³Ary ny mponina tao Sodoma dia tena ratsy fanahy sady tena mpanota teo imason’NY TOMPO.

¹⁴Taorianan’ny nisarahan’i Lota tamin’i Abrama dia niteny taminy NY TOMPO hoe: Atopazy avy eto amin’ity toerana misy anao ity ny masonao ka mitazàna mianavaratra sy mianatsimo, ary miantsinanana sy miankandrefana,

¹⁵fa ny tany rehetra izay tazanao dia homeko anao sy ny taranakao mandrakizay.

¹⁶Hataoko maro tahaka ny vovo-tany ny taranakao; koa raha misy olona mahaisa ny vovo-tany dia ho azo isaina koa ny taranakao.

¹⁷Mitsangàna ianao ka mandehana mitety ny tany amin’ny lavany sy ny sakany fa homeko anao izany.

¹⁸Ary namindrafindra ny tobiny i Abrama dia nandeha ka nonina teo amin’ireo hazo terebinta*n’i Mamre izay any Hebrona. Teo izy no nanorina alitara ho an’NY TOMPO.