Read La Bible en Malgache Genesisy 14 Bible Online

Genesisy 14 - La Bible en Malgache bible

Genesisy 14

¹Tamin’ny andron’i Amrafela, mpanjakan’i Sinara, i Arioka, mpanjakan’i Elasara, i Kedorlaomera, mpanjakan’i Elama, ary i Tidala, mpanjakan’ny Goima,

²dia nandeha izy ireo ka nanafika an’i Bera, mpanjakan’i Sodoma, i Birsa, mpanjakan’i Gomora, i Sinaba, mpanjakan’i Adma, i Semebera, mpanjakan’i Zeboima, ary ny mpanjakan’i Bela, dia i Zoara izany.

³Ireo rehetra ireo dia nifamotoana ka nivory tao an-dohasahan’i Sidima dia ny Ranomasina Maty izany.

⁴Nanompo an’i Kedorlaomera roa amby folo taona ireo, fa tamin’ny taona fahatelo amby folo kosa izy ireo dia nikomy.

⁵Tamin’ny taona fahefatra amby folo dia tonga i Kedorlaomera sy ireo mpanjaka niaraka taminy ka namely ny Refaita tany Astarota-Karnaima, ny Zozima tany Hama, ny Emima tany Save-Kiriataima,

⁶ary ny Horita tany an-tendrombohitra Seìra hatrany El-Parana, izay eny anilan’ny tany efitra.

⁷Dia niverina indray izy ireo ka nankany Eny-Mispata, dia Kadesy izany, ary namely ny tany rehetra izay an’ny Amalekita sady namely ny Amorita, izay nonina tany Hazazona-Tamara.

⁸Dia niainga ny mpanjakan’i Sodoma, ny mpanjakan’i Gomora, ny mpanjakan’i Adma, ny mpanjakan’i Zeboima ary ny mpanjakan’i Bela, dia i Zoara izany, ka nilahatra hiady amin’ireo izay tao an-dohasahan’i Sidima,

⁹dia tamin’i Kedorlaomera, mpanjakan’i Elama, sy i Tidala, mpanjakan’i Goima, ary i Amrafela, mpanjakan’i Sinara, sy i Arioka, mpanjakan’i Elasara; mpanjaka efatra izany no niady tamin’ny mpanjaka dimy.

¹⁰Ny lohasahan’i Sidima dia feno lavaka godorao; koa rehefa nandositra ny mpanjakan’i Sodoma sy ny mpanjakan’i Gomora dia latsaka tao, ary ny sisa dia nandositra tany an-tendrombohitra.

¹¹Nobaboin’izy ireo ny fananana sy ny hanina rehetra tao Sodoma sy Gomora, dia lasa izy ireo nandeha.

¹²Nobaboin’ireo niaraka tamin’ny fananany koa i Lota zana-drahalahin’i Abrama, dia lasa izy ireo nandeha. I Lota moa dia nonina tao Sodoma.

¹³Nisy iray anefa afa-nandositra ka tonga nanambara izany tamin’i Abrama hebreo, izay nonina teo amin’ireo hazo terebinta*n’i Mamre amorita, rahalahin’i Eskola sy i Anera, satria ireo dia olona vita fanekena tamin’i Abrama.

¹⁴Ary raha nahare i Abrama fa lasan-ko babo ny havany dia nitondra mpanompo valo amby folo sy telonjato izay teraka tao an-tranony sady efa nahay niady izy ka nanenjika azy hatrany Dana.

¹⁵Dia nifampizara ho antokotokony izy sy ireo mpanompony nony alina ka namely azy ireo ary nanenjika azy hatrany Hoba, izay any avaratr’i Damaskosy.

¹⁶Voaveriny ny fananana rehetra, ary i Lota havany sy ny fananany dia nampodiny koa niaraka tamin’ny vehivavy sy ny vahoaka.

¹⁷Dia niainga ny mpanjakan’i Sodoma hitsena an’i Abrama teo an-dohasaha Save, na ny Lohasahan’ny mpanjaka, rehefa niverina avy nandresy an’i Kedorlaomera sy ireo mpanjaka niaraka taminy izy.

¹⁸Ary tamy i Melkizedeka, mpanjakan’i Salema, nitondra mofo sy divay; izy io dia mpisoron’Andriamanitra Avo Indrindra.

¹⁹Dia nitsodrano an’i Abrama izy ka niteny hoe: Hotahin’Andriamanitra Avo Indrindra anie i Abrama, dia Andriamanitra izay nahary ny lanitra sy ny tany!

²⁰Isaorana anie Andriamanitra Avo Indrindra, izay nanolotra ny fahavalonao teo an-tananao! Dia nomen’i Abrama azy ny ampahafolon’ny zavatra rehetra.

²¹Ary hoy ny mpanjakan’i Sodoma tamin’i Abrama: Omeo ahy ny olona fa ny fananana ento ho anao.

²²Fa hoy i Abrama tamin’ny mpanjakan’i Sodoma: Efa nanangana ny tanako tamin’NY TOMPO, Andriamanitra Avo Indrindra, izay nahary ny lanitra sy ny tany, aho

²³fa tsy handray na taretra na fehin-kapa aza amin’izay rehetra mety ho anao, fandrao dia hataonao hoe: Izaho no nampanankarena an’i Abrama!

²⁴Eny, tsy handray aho afa-tsy izay nohanin’ireo zatovo sy ny anjaran’ny olona izay niaraka tamiko, dia i Anera sy i Eskola ary i Mamre; koa aoka horaisin’ireo ny anjarany.