Read La Bible en Malgache Genesisy 15 Bible Online

Genesisy 15 - La Bible en Malgache bible

Genesisy 15

¹Rehefa afaka izany dia tonga tamin’i Abrama tamin’ny fahitana ny tenin’NY TOMPO hoe: Aza matahotra, ry Abrama! Izaho no ampinganao, ary ho lehibe indrindra ny valim-pitianao.

²Ary hoy i Abrama: Andriamanitra TOMPO ô, inona no homenao ahy? Izaho ity efa mandroso fahanterana nefa tsy manan-janaka, koa ny ho mpandova ny fananako dia ilay Eliezera avy any Damaskosy.

³Hoy koa i Abrama: Indro aho tsy nomenao fara handimby ahy ka indro, ny iray amin’ny ato an-tranoko no handova ahy.

⁴Ary indro, tonga taminy ny tenin’NY TOMPO hoe: Tsy handova anao izy, fa izay haterakao ihany no handova anao.

⁵Dia nitondra azy nankeo ivelan’ny tranolay Izy ka niteny hoe: Jereo ange ny lanitra ka isao ireo kintana raha mahaisa azy ianao. Dia hoy Izy taminy: Ho tahaka ireo ny taranakao.

⁶Ary nino NY TOMPO izy, koa nisainy ho fahamarinany izany.

⁷Ary hoy Izy taminy: Izaho no TOMPO izay nitondra anao niala avy tany Oran’ny Kaldeana mba hanomezako anao ity tany ity ho lovanao.

⁸Dia hoy i Abrama: Andriamanitra TOMPO ô, ahoana no hahafantarako fa handova ity tany ity aho?

⁹Fa hoy Izy taminy: Itondray ombivavy kely izay telo taona Aho, osivavy izay telo taona, ondrilahy izay telo taona ary domohina sy zana-boromailala.

¹⁰Dia noentiny teo Aminy izany rehetra izany; nosasahiny ireny ka nampifanandrifiny avy ny tapany, fa ny vorona kosa dia tsy mba nosasahiny.

¹¹Ary nisy vorona mpiremby nidina teo amin’ny fatin’ireo, fa noroahin’i Abrama ireo.

¹²Rehefa hilentika ny masoandro dia sondrian-tory i Abrama; ary indro, nisy haizimbe mahatahotra tonga taminy.

¹³Ary hoy NY TOMPO tamin’i Abrama: Aoka ho fantatrao marina fa ho vahiny any amin’ny tany izay tsy azy ny taranakao, ary hanompo ny olona any ka hampahoriny efajato taona izy.

¹⁴Fa izany firenena izany kosa, izay hotompoiny, dia hotsaraiko; ary rehefa afaka izany dia hiala avy any mitondra fananana be dia be ny taranakao.

¹⁵Nefa ianao kosa ho any amin’ny razanao amin’ny fiadanana; ho tratra antitra indrindra ianao vao hodimandry.

¹⁶Fa amin’ny andron’ny zafiafy dia hiverina atỳ izy ireo; satria mbola tsy feno ny heloky ny Amorita hatramin’izao.

¹⁷Ary rehefa maty ny masoandro ka maizina be ny andro dia indro, nisy fatana fandoroana mivoa-tsetroka niaraka tamin’ny fanilo mirehitra, nandeha namakivaky teo anelanelan’ireo zavatra voasasaka ireo.

¹⁸Tamin’izany andro izany no nanaovan’NY TOMPO fanekena tamin’i Abrama hoe: Ny taranakao no nomeko ity tany ity, hatrany amin’ny onin’i Ejipta ka hatrany amin’ny ony lehibe, dia ny ony Eofrata,

¹⁹dia ny Kenita, ny Kenizita, ny Kadmonita,

²⁰ny Hetita, ny Perizita, ny Refaìta,

²¹ny Amorita, ny Kananita, ny Girgasita ary ny Jebosita.