Read La Bible en Malgache Genesisy 17 Bible Online

Genesisy 17 - La Bible en Malgache bible

Genesisy 17

¹Rehefa sivy amby sivifolo taona i Abrama dia nisehoan’NY TOMPO izy ka nitenenany hoe: Izaho no Andriamanitra Tsitoha. Mandehana eo anatrehako ary aoka ho tsy misy tsiny ianao.

²Fa Izaho hanao ny fanekeko ho Amiko sy ho aminao ary hahamaro anao indrindra.

³Dia niankohoka i Abrama; ary Andriamanitra niteny taminy hoe:

⁴Raha ny Amiko dia indro, aminao ny fanekeko ka ho tonga rain’ny firenena maro ianao.

⁵Ary ny anaranao dia tsy hatao hoe Abrama[14] intsony fa hatao hoe Abrahama[15], satria nataoko rain’ny firenena maro ianao.

⁶Hahamaro ny taranakao indrindra Aho ka hataoko firenena maro ianao; hisy mpanjaka maro hiseho avy aminao.

⁷Haoriko ny fanekeko ho Amiko sy ho aminao mbamin’ny taranakao any aoriananao hatramin’ny taranaka fara aman-dimby, ho fanekena mandrakizay, mba ho Andriamanitrao sy ny taranakao mandimby anao Aho.

⁸Homeko anao sy ny taranakao any aoriananao ny tany fivahiniananao, dia ny tany Kanana rehetra, ho fananana mandrakizay. Ary ho Andriamaniny Aho.

⁹Hoy ihany Andriamanitra tamin’i Abrahama: Fa ny aminao kosa dia hitandrina ny fanekeko ianao, dia ianao sy ny taranakao mandimby anao hatramin’ny taranaka fara aman-dimby.

¹⁰Izao no fanekeko ho Amiko sy ho aminareo sy ny taranakao mandimby anao, izay hotandremanareo: Hoforana ny lehilahy rehetra eo aminareo.

¹¹Hoforana ianareo; ho famantarana ny fanekena ho Amiko sy ho aminareo izany.

¹²Ny zazalahy teraka havaloana eo aminareo no hoforana, dia ny lehilahy rehetra amin’ny taranakareo fara aman-dimby: Na ny mpanompo izay teraka tao an-tranonao, na izay novidinao vola tamin’ny hafa firenena ka tsy avy amin’ny taranakao.

¹³Tsy maintsy hoforana ny mpanomponao izay teraka tao an-tranonao sy izay novidinao vola; ny fanekeko dia ho ao amin’ny nofonareo ho fanekena mandrakizay.

¹⁴Fa ny lehilahy tsy mifora dia hofongorana tsy ho amin’ny fireneny, satria nivadika tamin’ny fanekeko izy.

¹⁵Dia hoy Andriamanitra tamin’i Abrahama: Ny amin’i Saray vadinao dia tsy mba hataonao hoe Saray intsony ny anarany fa Saraha[16] no ho anarany.

¹⁶Hitahy azy Aho ka hampanana azy zanakalahy ho anao; eny, hitahy azy Aho ka ho tonga firenena maro izy; ary hisy mpanjakan’ny firenena maro avy aminy.

¹⁷Dia niankohoka i Abrahama ary nihomehy sady niteny anakampo hoe: Efa zato taona va aho dia mbola hiteraka ihany? Ary i Saraha izay efa sivifolo taona va mbola hiteraka ihany koa?

¹⁸Ary hoy i Abrahama tamin’Andriamanitra: Enga anie ka Ismaela no ho velona eo anatrehanao!

¹⁹Ary hoy Andriamanitra: Tsia! Fa i Saraha vadinao no hiteraka zazalahy aminao; ary ny anarany dia hataonao hoe Isaka. Haoriko aminy ny fanekeko ho fanekena mandrakizay ho an’ny taranany mandimby azy.

²⁰Ary ny amin’Ismaela dia efa nihaino anao Aho. Indro, hitahy azy Aho ka hahamaro ny taranany sy hampitombo azy indrindra; hiteraka andriana roa amby folo izy satria notendreko ho firenena lehibe.

²¹Nefa ny fanekeko dia haoriko amin’Isaka izay haterak’i Saraha aminao amin’ny herintaona toy izao.

²²Rehefa vita ny teny nataon’Andriamanitra taminy dia niakatra Izy ka niala teo amin’i Abrahama.

²³Koa nalain’i Abrahama Ismaela zanany sy ny mpanompony rehetra izay teraka tao an-tranony, niaraka tamin’ireo rehetra izay novidiny vola, dia ny lehilahy rehetra tao an-tranony, koa noforany tamin’iny andro iny ihany, araka izay nolazain’Andriamanitra taminy.

²⁴Sivy amby sivifolo taona i Abrahama fony izy noforana.

²⁵Telo amby folo taona Ismaela zanany fony izy noforana.

²⁶Tamin’iny andro iny ihany no namorana an’i Abrahama sy Ismaela zanany.

²⁷Ary ny lehilahy rehetra tao an-tranony, dia ny mpanompony izay teraka tao an-tranony, niaraka tamin’ireo izay novidiny vola tamin’ny hafa firenena; eny, samy niara-noforana taminy avokoa ireo.