Read La Bible en Malgache Genesisy 20 Bible Online

Genesisy 20 - La Bible en Malgache bible

Genesisy 20

¹Dia nifindra niala teo i Abrahama ka nankany Negeva, ary nitoetra teo anelanelan’i Kadesy sy Sora izy, avy eo dia nivahiny tao Gerara.

²Ny filazan’i Abrahama an’i Saraha vadiny dia hoe: Anabaviko izy. Koa nandefa iraka haka an’i Saraha i Abimeleka, mpanjakan’i Gerara.

³Fa Andriamanitra nankeo amin’i Abimeleka tamin’ny nofy nony alina ka niteny taminy hoe: Indro, ho faty ianao noho ny vehivavy izay nalainao, fa vadin’olona io.

⁴Tsy mbola nanakaiky azy anefa i Abimeleka ka hoy izy: Tompo ô, hovonoinao koa va izay firenena marina?

⁵Tsy Ralehilahy va no nilaza tamiko hoe: Anabaviko izy? Ary Ravehivavy koa dia nilaza hoe: Anadahiko izy. Koa tamin’ny fahatsoran’ny foko sy ny fahadiovan’ny tanako no nanaovako izao.

⁶Ary hoy Andriamanitra taminy, tamin’ny nofy: Eny ary, fantatro ihany fa tamin’ny fahatsoran’ny fonao no nanaovanao izany; ary Izaho koa dia niaro anao mba tsy hanota Amiko. Koa izay no tsy namelako anao hikasika azy.

⁷Koa ankehitriny, avereno ny vadin-dRalehilahy, fa mpaminany izy ka hifona ho anao, dia ho velona ianao. Fa raha tsy averinao izy, aoka ho fantatrao fa ho faty tokoa ianao, dia ianao mbamin’izay rehetra mety ho anao.

⁸Dia nifoha vao maraina i Abimeleka ka niantso ny mpanompony tsy an-kanavaka ary nanambara izany rehetra izany teo anatrehan’ireo, dia raiki-tahotra indrindra ny olona.

⁹Dia nampaka an’i Abrahama i Abimeleka ka niteny taminy hoe: Inona izao nataonao taminay izao, ary inona no ratsy nataoko taminao, no dia nahatonga heloka lehibe tamiko sy tamin’ny fanjakako ianao? Zavatra izay tsy fanao no nataonao tamiko.

¹⁰Hoy koa i Abimeleka tamin’i Abrahama: Inona no nokasainao ka nanaovanao izao zavatra izao?

¹¹Dia hoy i Abrahama: Satria hoy aho hoe: Tsy misy fahatahorana an’Andriamanitra na dia kely aza amin’ity tany ity ka hovonoin’ny olona aho noho ny amin’ny vadiko.

¹²Nefa anabaviko ihany tokoa izy, satria zanakavavin’ny raiko fa tsy mba zanakavavin’ny reniko; dia nanambady azy aho.

¹³Ary raha nampifindrafindra ahy hiala tamin’ny tranon’ny raiko Andriamanitra dia hoy aho tamin’ny vadiko: Izao no soa hataonao amiko any amin’izay tany rehetra halehantsika, dia ny filazanao ahy hoe: Anadahiko izy.

¹⁴Ary naka ondry, omby, mpanompolahy ary mpanompovavy, i Abimeleka ka nomeny an’i Abrahama ireny sady naveriny taminy i Saraha vadiny.

¹⁵Hoy koa i Abimeleka: Indro, eo anoloanao ny taniko; mitoera eo amin’izay tianao.

¹⁶Ary hoy kosa izy tamin’i Saraha: Indro, efa nomeko sekela volafotsy arivo ny anadahinao; indro, ho tampi-maso noho ny aminao izany, dia amin’izay rehetra miaraka aminao ka hahazo rariny eo anatrehan’ny olona rehetra ianao.

¹⁷Ary nifona tamin’Andriamanitra i Abrahama; ary Andriamanitra nahasitrana an’i Abimeleka sy ny vadiny mbamin’ireo mpanompovaviny, dia niteraka izy ireo.

¹⁸Fa NY TOMPO nahamomba tanteraka ny vehivavy rehetra tamin’ny ankohonan’i Abimeleka noho ny amin’i Saraha, vadin’i Abrahama.