Read La Bible en Malgache Genesisy 21 Bible Online

Genesisy 21 - La Bible en Malgache bible

Genesisy 21

¹Ary NY TOMPO namangy an’i Saraha araka ilay efa nolazainy. Araka izay rehetra efa noteneniny no nataon’NY TOMPO tamin’i Saraha.

²Dia nanana anaka i Saraha ka niteraka zazalahy tamin’i Abrahama na dia antitra aza izy, tamin’ny fotoana izay nolazain’Andriamanitra taminy.

³Ary ny anaran’ny zanany vao teraka, ilay naterak’i Saraha taminy, dia nataon’i Abrahama hoe Isaka.

⁴Dia noforan’i Abrahama Isaka zanany rehefa valo andro, araka ny didy nomen’Andriamanitra azy.

⁵Zato taona i Abrahama raha niteraka an’Isaka zanany.

⁶Dia hoy i Saraha: Nampihomehezin’Andriamanitra aho; izay rehetra mandre dia hiara-mihomehy amiko.

⁷Hoy koa izy: Iza moa no nanampo hilaza amin’i Abrahama fa hampinono zaza i Saraha? Kanjo niteraka zazalahy taminy ihany aho na dia efa antitra aza izy!

⁸Rehefa lehibe ny zaza dia nosarahina nono. Nanao fanasana lehibe tamin’ny andro nanasarahana nono an’Isaka i Abrahama.

⁹Ary hitan’i Saraha fa nihomehy azy ny zanak’i Hagara ejiptiana, izay naterany tamin’i Abrahama.

¹⁰Dia hoy izy tamin’i Abrahama: Roahy io mpanompovavy io sy ny zanany, fa ny zanak’io mpanompovavy io dia tsy hiray lova amin’Isaka zanako!

¹¹Nahatezitra be an’i Abrahama anefa izany teny izany noho ny amin’ny zanany.

¹²Hoy Andriamanitra tamin’i Abrahama: Aza atao mahatezitra anao ny amin’ny zaza sy ny mpanompovavinao. Fa na inona lazain’i Saraha aminao na inona dia ekeo ny teniny; fa avy amin’Isaka no hisy taranaka hantsoina amin’ny anaranao.

¹³Nefa ny zanak’ilay mpanompovavy koa dia hataoko firenena satria naterakao ihany izy.

¹⁴Dia nifoha vao maraina i Abrahama ka naka mofo sy siny hoditra iray feno rano; nomeny an’i Hagara ireo ka napetrany teo an-tsorony, dia natolony azy koa ny zaza ary nampandehaniny izy mianaka. Lasa nandeha izy ireo ka nirenireny tany an-tany efitr’i Bery-Sheba.

¹⁵Rehefa lany ny rano tao amin’ny siny hoditra dia nariany teo am-pototry ny hazo iray ny zaza.

¹⁶Dia lasa izy nipetraka terỳ lavidavitra tandrifiny, tokony ho tratran’ny zana-tsipìka, fa hoy izy: Aoka mba tsy ho hitako izay hahafatesan’ny zaza! Ary nipetraka tandrifiny izy dia nanandratra ny feony nitomany.

¹⁷Ren’Andriamanitra ny feon’ny zaza ka niantso an’i Hagara avy tany an-danitra ilay Anjelin’Andriamanitra* niteny taminy hoe: Inona izato manjo anao, ry Hagara? Aza matahotra fa efa ren’Andriamanitra ny feon’ny zaza eo amin’izay misy azy.

¹⁸Mitsangàna, areno ny zaza ka hazòny mafy amin’ny tananao; fa hataoko firenena lehibe izy.

¹⁹Dia nampahiratin’Andriamanitra ny mason’i Hagara ka nahita lavaka fantsakana izy; lasa nankeo izy, nameno rano ny siny hoditra ka nampisotro rano ny zaza.

²⁰Ary nomban’Andriamanitra ny zaza ka nitombo; nonina tany an-tany efitra izy ka nony efa lehibe dia tonga mpandefa tsipìka.

²¹Nonina tany an-tany efitra Parana izy ka nakan’ny reniny vady avy tany amin’ny tany Ejipta.

²²Tamin’izany andro izany i Abimeleka sy i Pikola, komandin’ny miaramilany, dia niteny tamin’i Abrahama hoe: Omban’Andriamanitra ianao amin’izay rehetra ataonao.

²³Koa ankehitriny, ianiano amin’Andriamanitra aho fa tsy hamitaka ahy na ny zanako na ny taranako ianao; fa araka ny soa izay nataoko taminao no mba hataonao amiko sy amin’ny tany izay ivahiniananao.

²⁴Dia hoy i Abrahama: Mianiana aho.

²⁵Ary nananatra an’i Abimeleka i Abrahama noho ny lavaka fantsakana iray izay nalain’ny mpanompon’i Abimeleka an-keriny.

²⁶Dia hoy i Abimeleka: Tsy fantatro izay nahavita izany satria tsy mbola nanambara tamiko ianao ary tsy mbola nahare koa aho raha tsy vao izao.

²⁷Ary naka ondry aman’osy i Abrahama ka nomeny an’i Abimeleka; dia nanao fanekena izy roa lahy.

²⁸Nanokana ondrivavy kely fito navahana tamin’ny andiany koa i Abrahama.

²⁹Dia hoy i Abimeleka taminy: Hatao inona ireo ondrivavy fito natokanao ireo?

³⁰Hoy ny navaliny: Mba horaisinao avy amin’ny tanako ireo ondrivavy fito ireo ho vavolombelona amiko fa izaho no nihady io lavaka fantsakana io.

³¹Izany no nanaovana io toerana io hoe Bery-Sheba[18], satria teo no nianianan’izy roa lahy.

³²Dia nanao fanekena tany Bery-Sheba izy roa lahy. Ary niainga i Abimeleka sy i Pikola, komandin’ny miaramilany, ka niverina ho any amin’ny tanin’ny Filistina.

³³Namboly hazo tamarisika tany Bery-Sheba i Abrahama ka tao no niantsoany ny anaran’NY TOMPO, dia Andriamanitra Mandrakizay.

³⁴Ary nivahiny naharitra tany amin’ny tanin’ny Filistina i Abrahama.