Read La Bible en Malgache Genesisy 22 Bible Online

Genesisy 22 - La Bible en Malgache bible

Genesisy 22

¹Taorianan’izany dia nizaha toetra an’i Abrahama Andriamanitra. Hoy Izy taminy: Ry Abrahama ô! Dia hoy i Abrahama: Inty aho.

²Ary hoy Andriamanitra: Ento ny zanakao, ny lahitokanao, izay tianao, dia Isaka, ka mankanesa any amin’ny tany Moria[19], ary any no hanoloranao azy ho fanatitra dorana manontolo, ao amin’ny tendrombohitra iray izay holazaiko aminao.

³Dia nifoha vao maraina i Abrahama, nanisy lasely ny borikiny ka nitondra ny mpanompony roa lahy sy Isaka zanany niaraka taminy. Namaky ny hazo harehitra amin’ny fanatitra dorana manontolo izy, dia niainga ka nankany amin’ny tany izay nolazain’Andriamanitra taminy.

⁴Nony tamin’ny andro fahatelo, raha nanopy ny masony i Abrahama, dia nahatazana ilay tany terỳ lavitra erỳ.

⁵Hoy i Abrahama tamin’ny zatovony: Mijanòna eto amin’ny boriky ianareo, fa izaho sy ny zazalahy dia handeha hankerỳ mba hivavaka, avy eo hiverina eto aminareo indray.

⁶Dia nalain’i Abrahama ny hazo harehitra amin’ny fanatitra dorana manontolo ka natataony an’Isaka zanany, fa izy kosa no nitondra ny afo sy ny antsy teny an-tanany. Dia niara-nandeha izy mianaka.

⁷Ary hoy Isaka tamin’i Abrahama rainy hoe: Dada ô! Dia hoy izy: Inty aho, anaka! Ary hoy ny zanany: Indreto ny afo sy ny kitay, fa aiza kosa izay ondry hatao fanatitra dorana manontolo?

⁸Hoy i Abrahama: Anaka, Andriamanitra no hahita izay ondry hatao fanatitra dorana manontolo! Dia niara-nanohy ny diany ihany izy mianaka.

⁹Rehefa tonga teo amin’ny tany izay nolazain’Andriamanitra taminy izy mianaka dia nanorina ny alitara teo i Abrahama ka nandahatra ny kitay. Dia namatotra an’Isaka zanany izy ka nametraka azy teo amin’ny alitara teo ambonin’ny kitay.

¹⁰Ary nanatsotra ny tanany i Abrahama ka nandray ny antsy mba hamonoany ny zanany.

¹¹Fa niantso azy avy any an-danitra ilay Anjelin’NY TOMPO* ka niteny hoe: Ry Abrahama ô, ry Abrahama ô! Dia namaly kosa izy hoe: Inty aho!

¹²Hoy ilay Anjely: Aza manatsotra ny tananao amin’ny zaza ary aza maninona azy akory ianao; hitako izao fa matahotra an’Andriamanitra ianao ka tsy narovanao tamiko ny zanakao, dia ny lahitokanao.

¹³Ary niherika nijery i Abrahama ka indro, nisy ondrilahy teo aorianany, voasarangotry ny kirihitra ny tandrony; dia lasa naka ilay ondrilahy i Abrahama ary nanolotra azy ho fanatitra dorana manontolo ho solon’ny zanany.

¹⁴Ary ny anaran’izany tany izany dia nataon’i Abrahama hoe NY TOMPO no hahita[20]; izany no ilazana mandraka ankehitriny hoe: Any an-tendrombohitra no hisehoan’NY TOMPO.

¹⁵Niantso an’i Abrahama fanindroany avy any an-danitra ilay Anjelin’NY TOMPO

¹⁶ka niteny hoe: Ny tenako no nianianako, hoy NY TOMPO: Satria izany zavatra izany no nataonao ka tsy niaro ny zanakao, ilay lahitokanao, ianao,

¹⁷dia hitahy anao tokoa Aho ary hahamaro dia hahamaro ny taranakao ho tahaka ny kintana eny amin’ny lanitra sy ho tahaka ny fasika eny amoron-dranomasina, ary hahazo ny vavahadin’ny fahavalony ny taranakao.

¹⁸Amin’ny taranakao no hitahiana ny firenena rehetra ambonin’ny tany, satria nanaiky ny teniko ianao.

¹⁹Niverina nankeny amin’ireo mpanompony i Abrahama, dia niainga izy ireo ka niaraka nankany Bery-Sheba. Ary i Abrahama dia nonina tany Bery-Sheba.

²⁰Taorianan’izany dia nisy nanambara tamin’i Abrahama hoe: Indro, niteraka zazalahy tamin’i Nahora rahalahinao koa i Milka,

²¹dia i Oza lahimatoany, i Boza lahiaivo, i Kemoela, rain’i Arama,

²²i Kaseda, i Hazò, i Pildasy, i Jidlafa ary i Betoela.

²³Ary i Betoela dia niteraka an’i Rebeka. Ireo valo ireo no naterak’i Milka tamin’i Nahora, rahalahin’i Abrahama.

²⁴Ary ny vady tsindranony koa, izay atao hoe Reoma, dia niteraka an’i Teba, i Gahama, i Tahasy ary i Maaka.