Read La Bible en Malgache Genesisy 23 Bible Online

Genesisy 23 - La Bible en Malgache bible

Genesisy 23

¹Ny andro niainan’i Saraha dia fito amby roapolo amby zato taona; izany no taona niainan’i Saraha.

²Ary maty tao Kiriata-Arba na Hebrona, tany amin’ny tany Kanana, i Saraha. Dia tonga i Abrahama hisaona an’i Saraha sy hitomany azy.

³Ary nitsangana niala avy teo anilan’ny fatin’ny vadiny i Abrahama dia niteny tamin’ireo taranak’i Heta hoe:

⁴Vahiny sy mpivahiny eto aminareo aho; omeo tany fandevenana eto aminareo aho mba handevenako ny fatin’ny vadiko izay nandao ahy.

⁵Dia namaly an’i Abrahama ireo taranak’i Heta hoe:

⁶Mihainoa anay, tompokolahy: Andrian-dehibe eto aminay ianao; koa izay tsara indrindra amin’ny fasanay no andeveno ny fatin’ny vadinao; tsy misy aminay tsy hanome ny fasany ho anao mba handevenanao ny fatin’ny vadinao.

⁷Dia nitsangana i Abrahama ka niankohoka teo anatrehan’ireo taranak’i Heta tompon-tany,

⁸ary hoy izy tamin’ireo: Raha sitrakareo ary ny handevenako ny fatin’ny vadiko izay nandao ahy dia mihainoa ahy, koa iangavio kely i Efrona, zanak’i Zohara,

⁹mba homeny ahy ilay zohiny ao Makpela, dia ilay eo amin’ny sisin’ny sahany; koa amin’izay vola tokony ho vidiny no aoka hanomezany azy ho ahy eto aminareo ho tany fandevenana.

¹⁰Ary i Efrona dia niara-nipetraka tamin’ireo taranak’i Heta. Namaly an’i Abrahama i Efrona hetita teo anatrehan’ireo taranak’i Heta, dia izay rehetra niditra teo am-bavahadin’ny tanànany, ka niteny hoe:

¹¹Tsia, tompokolahy fa mihainoa ahy! Ny saha dia omeko anao ary ny zohy izay ao anatiny koa dia omeko anao. Eto imason’ny zanaky ny fireneko no anomezako azy ho anao; aleveno ny fatin’ny vadinao.

¹²Dia niankohoka teo anatrehan’ireo tompon-tany i Abrahama

¹³ka niteny tamin’i Efrona teo anatrehan’ireo tompon-tany hoe: Raha mba hihaino ahy ihany anefa ianao dia homeko ny vidin’ny saha; raiso avy amiko izany dia haleviko ao ny fatin’ny vadiko.

¹⁴Fa hoy ny navalin’i Efrona an’i Abrahama:

¹⁵Tompokolahy, mihainoa ahy! Raha izay tany tokony ho lafo sekela volafotsy efajato io, inona anefa moa izany amintsika roa lahy, fa aleveno ny fatin’ny vadinao.

¹⁶Neken’i Abrahama ny tenin’i Efrona ka nolanjainy ho azy teo anatrehan’ireo taranak’i Heta ny vola izay voalazany, dia sekela volafotsy efajato araka ny sandany eo amin’ny mpivarotra.

¹⁷Araka izany, ny sahan’i Efrona, izay teo Makpela, tandrifin’i Mamre, dia ny saha sy ny zohy izay tao anatiny mbamin’ny hazo rehetra izay tao amin’ny saha, izay teo amin’ny sisiny rehetra manodidina,

¹⁸dia natao varo-maty tamin’i Abrahama ho fananany, teo imason’ireo taranak’i Heta, dia izay rehetra niditra teo am-bavahadin’ny tanànany.

¹⁹Rehefa vita izany dia nandevina an’i Saraha vadiny tao amin’ny zohy tao amin’ny saha Makpela tandrifin’i Mamre na Hebrona, ao amin’ny tany Kanana, i Abrahama.

²⁰Koa ny saha mbamin’ny zohy izay ao anatiny dia nataon’ireo taranak’i Heta varo-maty tamin’i Abrahama ho tany fandevenana.