Read La Bible en Malgache Genesisy 25 Bible Online

Genesisy 25 - La Bible en Malgache bible

Genesisy 25

¹Nampaka-bady indray i Abrahama ka Ketora no anaran’izy io.

²Izy dia niteraka an’i Zimrana, i Joksana, i Medana, i Midiana, i Jisbaka ary i Soaha tamin’i Abrahama.

³Ary i Joksana dia niteraka an’i Sheba sy i Dedana. Ary ny zanakalahin’i Dedana dia i Asorima sy i Letosima ary i Leomima.

⁴Ary ny zanakalahin’i Midiana dia i Efaha, i Efera, i Hanoka, i Abida ary i Eldaha. Ireo rehetra ireo no taranak’i Ketora.

⁵Dia natolotr’i Abrahama an’Isaka izay rehetra nananany.

⁶Nefa samy notolorany fanomezana avy ireo zanak’i Abrahama tamin’ireo vady tsindranony hafa ka nampandehaniny hiala amin’Isaka zanany hiantsinanana ho any amin’ny tany atsinanana dieny mbola velona izy.

⁷Dimy amby fitopolo amby zato taona ny andro niainan’i Abrahama.

⁸Dia niala aina i Abrahama ka maty, rehefa fotsy volo tsara sady lahiantitra ela niainana; dia nangonina any amin’ny razany izy.

⁹Nalevin’Isaka sy Ismaela zanany tao amin’ilay zohy ao Makpela izy; tao amin’ny sahan’i Efrona, zanak’i Zohara hetita, izay tandrifin’i Mamre izany.

¹⁰Io ilay saha izay novidin’i Abrahama tamin’ireo taranak’i Heta. Tao no nandevenana an’i Abrahama sy i Saraha vadiny.

¹¹Taorianan’ny nahafatesan’i Abrahama dia notahin’Andriamanitra Isaka zanany. Ary nonina teo akaikin’i Bera-Lahay-Roỳ Isaka.

¹²Ireto no taranak’Ismaela, zanakalahin’i Abrahama izay naterak’i Hagara, ilay Ejiptiana, mpanompovavin’i Saraha, tamin’i Abrahama.

¹³Ireto avy no anaran’ny zanakalahin’Ismaela, araka ny anarany sy araka ny taranany: I Nebaiota, lahimatoan’i Ismaela, i Kedara, i Adbela, i Mibsama,

¹⁴i Misma, i Doma, i Masa,

¹⁵i Hadada, i Tema, i Jetora, i Nafisy ary i Kedema.

¹⁶Ireo no zanakalahin’Ismaela, ary ireo no anarany, araka ny vohiny sy ny tobiny, dia andriana roa amby folo araka ny fireneny avy.

¹⁷Fito amby telopolo amby zato taona ny andro niainan’Ismaela; dia niala aina izy ka maty ary nangonina any amin’ny razany.

¹⁸Ary ny taranany dia nonina hatrany Havila ka hatrany Sora izay tandrifin’i Ejipta amin’ny lalana mankany Asiria; nifanandrify tamin’ny rahalahiny rehetra no nitoerany.

¹⁹Ireto no taranak’Isaka, zanakalahin’i Abrahama:

²⁰I Abrahama dia niteraka an’Isaka. Efapolo taona Isaka raha nampakatra an’i Rebeka, zanakavavin’i Betoela arameana, avy tany Padana-Arama, sady anabavin’i Labana arameana.

²¹Ary Isaka dia nangataka tamin’NY TOMPO ho an’ny vadiny, satria momba izy, dia nohenoin’NY TOMPO ny fangatahany ka nanana anaka i Rebeka vadiny.

²²Ary nifanosika ny zaza kambana tao an-kibony, dia hoy i Rebeka: Raha izany, nahoana re no dia toy izao aho? Sady lasa nanontany NY TOMPO izy.

²³Hoy NY TOMPO taminy: Firenena roa no ao an-kibonao, ary vahoaka roa toko no hisaraka hatrany an-kibonao; ny vahoaka iray toko dia hahery noho ny iray, koa ny zokiny dia hanompo ny zandriny.

²⁴Nony tonga ny andro hahaterahany, indreo nisy zaza kambana tao an-kibony.

²⁵Dia teraka ny voalohany ka mena; tahaka ny akanjo volom-biby ny tenany manontolo ka nataony hoe Esao[21] ny anarany.

²⁶Taorianan’izay dia teraka koa ny rahalahiny, ary ny tanany nihazona ny voditongotr’i Esao, dia nataony hoe Jakoba[22] ny anarany. Enimpolo taona Isaka raha niteraka azy mirahalahy ireo.

²⁷Dia nitombo ireo zaza ireo. I Esao dia lehilahy nahay nihaza, mpandehandeha any an-tsaha, fa i Jakoba kosa dia lehilahy tso-piaina sady mpitoetra an-tranolay.

²⁸Ary Isaka dia tia an’i Esao satria nankafy ny hazany izy; fa i Rebeka kosa dia tia an’i Jakoba.

²⁹Indray andro, raha nahandro sakafo i Jakoba, dia tonga avy tany an-tsaha i Esao ka reraka.

³⁰Hoy i Esao tamin’i Jakoba: Mba omeo amin’io mena io aho hohaniko, dia io mena io, fa reraka aho. Izany no nanaovana ny anarany hoe Edoma[23].

³¹Hoy anefa ny navalin’i Jakoba azy: Amidio amiko ary aloha ny fizokianao.

³²Hoy kosa i Esao: Indro, ho faty ihany aho; koa misy antony inona amiko izay fizokiana?

³³Hoy i Jakoba: Mianiàna amiko ary aloha. Dia nianiana taminy izy ka namidiny tamin’i Jakoba ny fizokiany.

³⁴Ary nanome mofo sy voanemba masaka an’i Esao i Jakoba. Dia nihinana sy nisotro izy ary niainga ka lasa nandeha. Izany no nanamavoan’i Esao ny fizokiany.