Read La Bible en Malgache Genesisy 26 Bible Online

Genesisy 26 - La Bible en Malgache bible

Genesisy 26

¹Ary nisy mosary indray teo amin’ny tany, ankoatra ilay mosary voalohany fony fahavelon’i Abrahama. Ary Isaka dia nankany amin’i Abimeleka, mpanjakan’ny Filistina, tany Gerara.

²Niseho taminy NY TOMPO ka niteny hoe: Aza midina any Ejipta ianao fa mitoera eo amin’ny tany izay holazaiko aminao.

³Mivahinia eto amin’ity tany ity ianao, dia homba anao sy hitahy anao Aho. Fa ianao sy ny taranakao no homeko ireto tany rehetra ireto ka hotanako ny fianianana izay nataoko tamin’i Abrahama rainao.

⁴Hahamaro ny taranakao ho tahaka ny kintana eny amin’ny lanitra Aho ka homeko ny taranakao ireto tany rehetra ireto. Ary amin’ny taranakao no hitahiana ny firenena rehetra ambonin’ny tany,

⁵satria i Abrahama dia nihaino ny feoko ka nitandrina ny didiko sy ny fitsipiko ary ny lalànako izay nasaiko notandremany.

⁶Dia nitoetra tany Gerara Isaka.

⁷Ary nanontany azy ny amin’ny vadiny ny lehilahy tompon-tany ka hoy izy: Anabaviko izy. Fa natahotra izy hilaza hoe Vadiko izy, fandrao hamono azy ny lehilahy tompon-tany noho i Rebeka, satria tsara tarehy Ravehivavy.

⁸Rehefa nitoetra ela teo izy dia nitsirika teo am-baravarankely i Abimeleka, mpanjakan’ny Filistina, ka nahita fa indro, nisangy tamin’i Rebeka vadiny Isaka.

⁹Dia niantso an’Isaka i Abimeleka ka niteny hoe: Hita mihitsy fa vadinao izy, koa nahoana no nolazainao hoe Anabaviko izy? Dia hoy Isaka taminy: Satria hoy aho anakampo hoe: Fandrao ho faty noho ny aminy aho.

¹⁰Hoy i Abimeleka: Inona izao nataonao taminay izao? Saiky nisy nandry tamin’ny vadinao ny olona, dia ho nahatonga heloka taminay ianao!

¹¹Dia nandidy ny vahoaka rehetra i Abimeleka hoe: Izay mikasika an’io lehilahy io na ny vadiny dia hovonoina ho faty!

¹²Ary Isaka dia namafy tamin’izany tany izany ka nahazo zato heny satria notahin’NY TOMPO izy.

¹³Dia tonga nanankarena Ralehilahy ka nitombo harena hatrany ka tena tonga mpanankarena be.

¹⁴Nahangona fananana be izy, dia ondry aman’osy sy omby ary mpanompo maro, hany ka nialona azy ny Filistina.

¹⁵Ary ny lavaka fantsakana rehetra izay nohadin’ny mpanompon’ny rainy fony fahavelon’i Abrahama rainy, dia notampenan’ny Filistina ka nototofany tany avokoa.

¹⁶Ary hoy i Abimeleka tamin’Isaka: Mialà eto aminay fa mahery lavitra noho izahay ianao.

¹⁷Dia niala teo Isaka ka nanorina ny tranolainy tao an-dohasahan’i Gerara ary nonina tao.

¹⁸Nolavahan’Isaka indray ny lavaka fantsakana izay voahady fony fahavelon’i Abrahama rainy, satria notampenan’ny Filistina ireny nony maty i Abrahama. Nomeny anarana araka ny anarana izay nomen’ny rainy azy ihany ireny.

¹⁹Dia mbola nihady lavaka teo amin’ny lohasaha ihany koa ny mpanompon’Isaka ka nahita loharano velona tao.

²⁰Kanjo niady tamin’ny mpiandry ondrin’Isaka ny mpiandry ondry tao Gerara ka niteny hoe: Anay ny rano! Noho izany dia nataon’Isaka hoe Eseka[24], ny anaran’ilay lavaka fantsakana, satria nifandìtra taminy izy ireo.

²¹Nihady lavaka fantsakana hafa indray koa izy, nefa niadiana indray io; koa nataony hoe Sitna[25] ny anarany.

²²Dia nifindra niala teo izy ka nihady lavaka fantsakana hafa indray, fa io kosa tsy mba niadiana; koa ny anarany dia nataony hoe Rehobota[26]; fa hoy izy: Nomen’NY TOMPO toerana malalaka isika ankehitriny, dia hihamaro eto amin’ny tany.

²³Dia niakatra niala teo Isaka ka nankany Bery-Sheba.

²⁴Ary NY TOMPO niseho taminy tamin’iny alina iny ka niteny hoe: Izaho no Andriamanitr’i Abrahama rainao; aza matahotra fa momba anao Aho ka hitahy anao sy hahamaro ny taranakao, noho ny amin’i Abrahama mpanompoko.

²⁵Dia nanorina alitara teo izy ary niantso ny anaran’NY TOMPO sady nanorina ny tranolainy teo koa; dia nihady lavaka fantsakana teo ny mpanompon’Isaka.

²⁶I Abimeleka mbamin’i Ahozata sakaizany sy i Pikola, mpitarika ny miaramilany, dia niala tao Gerara hankany amin’Isaka.

²⁷Nefa hoy Isaka taminy: Nahoana indray ianareo no mankaty amiko, kanefa mankahala ahy ianareo ka nandroaka ahy hiala teo aminareo?

²⁸Dia hoy izy ireo: Hitanay marimarina fa momba anao NY TOMPO, koa hoy izahay: Aoka samy hanao fianianana isika, dia izahay sy ianao, ary aoka izahay hanao fanekena aminao

²⁹fa tsy hanisy ratsy anay ianao, tahaka ny tsy nikasihanay anao akory sy tahaka ny tsy nanaovanay na inona na inona taminao afa-tsy ny soa ihany, satria navelanay handeha soa amantsara ianao. Efa notahin’NY TOMPO ianao ankehitriny.

³⁰Dia nanao fanasana ho azy Isaka ka nihinana sy nisotro izy ireo.

³¹Avy eo dia nifoha vao maraina izy ireo ka nifampianiana. Dia navelan’Isaka handeha izy ireo ka lasa nody soa amantsara.

³²Tamin’izany andro izany dia avy ny mpanompon’Isaka ka nanambara taminy ny amin’ny lavaka fantsakana izay nohadiny sady niteny taminy hoe: Nahita rano izahay!

³³Nataony hoe Sheba ny anaran’io toerana io. Izany no niantsoana ny anaran’ny tanàna hoe Bery-Sheba mandraka androany[27].

³⁴Efapolo taona i Esao raha nampakatra an’i Jodita, zanakavavin’i Bery hetita, sy i Basemata, zanakavavin’i Elona hetita.

³⁵Nangidy tamin’Isaka sy i Rebeka loatra anefa izany.