Read La Bible en Malgache Genesisy 27 Bible Online

Genesisy 27 - La Bible en Malgache bible

Genesisy 27

¹Rehefa antitra Isaka sady pahina ny masony ka tsy nahita intsony dia niantso an’i Esao lahimatoany izy ka niteny taminy hoe: Anaka! Ary hoy izy taminy: Inty aho!

²Dia hoy izy: Indro, efa antitra aho ka tsy fantatro izay andro hahafatesako.

³Koa ankehitriny, miangavy anao aho, raiso ny fiadianao, dia ny tranon-jana-tsipìkanao sy ny tsipìkanao, ary mankanesa any an-tsaha ka mitondrà haza ho ahy.

⁴Anamboary sakafo matsiro araka ilay tiako iny aho, dia ento atỳ amiko hohaniko mba hitsofako rano anao, dieny tsy mbola maty aho.

⁵Ren’i Rebeka ny tenin’i Isaka tamin’i Esao zanany lahy. Dia lasa nankany an-tsaha i Esao nitady haza hoentiny mody.

⁶Ary niteny tamin’i Jakoba zanany i Rebeka hoe: Indro, reko ny rainao niteny tamin’i Esao rahalahinao hoe:

⁷Itondray haza aho ka anamboary sakafo matsiro hohaniko; dia hitsodrano anao eo anatrehan’NY TOMPO aho, dieny tsy mbola maty.

⁸Koa ankehitriny, anaka, araho ny teniko amin’izay asaiko ataonao:

⁹Mankanesa any amin’ny ondry aman’osy ka akao zanak’osy roa tsara aho hanamboarako sakafo matsiro ho an’ny rainao, araka ilay tiany.

¹⁰Hoentinao any amin’ny rainao hohaniny io mba hitsofany rano anao, dieny tsy mbola maty izy.

¹¹Hoy anefa i Jakoba tamin’i Rebeka reniny: Indro, i Esao rahalahiko dia lehilahy voloina, nefa izaho kosa dia lehilahy malambo hoditra.

¹²Mety hitsapa ahy Ikaky, dia ho toy ny mpisandoka eo imasony aho ka hahatonga ozona amiko izany fa tsy tsodrano!

¹³Hoy reniny taminy: Aoka ho amiko, anaka, ny ozona tokony ho anao, fa araho ihany ny teniko ka mandehana, ento atỳ amiko ny zanak’osy.

¹⁴Dia nandeha izy ka naka izany ary noentiny teo amin’ny reniny; ny reniny kosa nanamboatra sakafo matsiro araka ilay tian’ny rainy.

¹⁵Ary nalain’i Rebeka ny fitafian’i Esao lahimatoany, dia ny tsara indrindra izay notahiriziny tao an-trano, ka natafiny an’i Jakoba zanany faralahy.

¹⁶Nofonosiny ny hoditry ny zanak’osy ny tanany sy ny malambolambo amin’ny vozony.

¹⁷Dia natolony teo an-tanan’i Jakoba zanany ny sakafo matsiro sy ny mofo izay namboariny.

¹⁸Ary nankeo amin’ny rainy i Jakoba ka niteny hoe: Ry Ikaky ô! Dia hoy izy: Inty aho! Iza moa ianao, anaka?

¹⁹Hoy i Jakoba tamin’ny rainy: Izaho no Esao zanakao lahimatoa; efa nanatanteraka izay nasainao nataoko aho. Miangavy anao aho, miarena re, dia mipetraha ka hano ny hazako mba hitsofanao rano ahy.

²⁰Fa hoy Isaka tamin’ny zanany: Nanao ahoana, anaka, no dia nalaky nahazo toy izany ianao? Dia hoy izy: Satria NY TOMPO Andriamanitrao no nampahazo ahy.

²¹Hoy ihany Isaka tamin’i Jakoba: Mba manatòna kely hoe hitsapako anao, anaka, hahafantarako na i Esao zanako tokoa ianao, na tsia.

²²Dia nanatona an’Isaka rainy i Jakoba; ary nitsapa azy izy ka niteny hoe: Ny feo dia feon’i Jakoba fa ny tanana dia tanan’i Esao.

²³Nefa tsy nahafantatra azy izy satria voloina tahaka ny tanan’i Esao rahalahiny ny tanany; dia notsofiny rano izy.

²⁴Ary hoy izy: Ianao tokoa moa no Esao zanako? Dia hoy izy: Izaho no izy.

²⁵Ary hoy kosa Isaka: Arosoy eto anoloako ary izato hazan’ny zanako hihinanako, mba hitsofako rano anao. Dia narosony teo anoloany izany ka nihinana izy; ary nitondrany divay izy dia nisotro.

²⁶Hoy indray Isaka rainy taminy: Mba manatòna kely hoe manoroka ahy, anaka!

²⁷Dia nanatona izy ka nanoroka azy. Ary nandre ny fofon’ny fitafiany Isaka dia nitsodrano azy hoe: E! Ny fofon’ny zanako dia tahaka ny fofon’ny saha izay notahin’NY TOMPO.

²⁸Hanomezan’Andriamanitra anao anie ny andon’ny lanitra sy ny tsiron’ny tany ary vary sy ranom-boaloboka betsaka!

²⁹Hanompo anao anie ny firenena maro ary hiankohoka eo anatrehanao ny firenena samihafa! Ho tompo amin’ny rahalahinao anie ianao ary aoka hiankohoka eo anatrehanao ny zanaky ny reninao! Ho voaozona anie izay rehetra manozona anao ary hohasoavina anie izay manisy soa anao!

³⁰Rehefa vita ny fitsofan-drano nataon’Isaka an’i Jakoba ka vao nidify teo anatrehan’Isaka rainy izy dia niditra kosa i Esao rahalahiny avy nihaza.

³¹Izy koa dia efa nanamboatra sakafo matsiro ka nitondra izany teo amin’ny rainy. Dia hoy izy tamin’ny rainy: Aoka hiarina ny raiko ka hihinana amin’ny hazan’ny zanany mba hitsofanao rano ahy!

³²Fa hoy Isaka rainy taminy: Fa iza indray moa ianao? Hoy izy: Izaho no i Esao zanakao lahimatoa!

³³Toran-kovitra be Isaka ka niteny hoe: Iza ary ilay naka haza ka nitondra izany teto amiko teo? Nihinana tamin’izany rehetra izany aho fony tsy mbola tonga ianao ka efa notsofiko rano izy; eny, hotahina tokoa izy!

³⁴Raha vao ren’i Esao ny tenin’ny rainy dia niantsoantso mafy dia mafy izy sady niteny taminy hoe: Mba tsofy rano re aho, eny, izaho koa, ry Ikaky ô!

³⁵Hoy rainy: Tonga teo ny rahalahinao nisandoka ka nahalasa ny tsodranonao.

³⁶Dia hoy i Esao: Moa tsy Jakoba va no anarany[28]? Efa namingana ahy indroa izy izao: Ny fizokiako dia nalainy; ary indro, ankehitriny, lasany koa ny tsodranoko! Hoy ihany izy: Tsy mba nahatahiry tsodrano ho ahy va ianao?

³⁷Namaly Isaka ka niteny tamin’i Esao hoe: Indro, efa nataoko ho tomponao izy, fa ny rahalahiny rehetra dia nataoko ho mpanompony; vary sy ranom-boaloboka no namelomako azy; koa inona indray no azoko atao aminao, anaka?

³⁸Hoy i Esao tamin’ny rainy: Tsy manana afa-tsy tsodrano tokana va ianao, ry Ikaky? Mba tsofy rano re aho, izaho koa, ry Ikaky ô! Sady nidradradradra nitomany i Esao.

³⁹Nefa namaly azy Isaka rainy hoe: Indro, ho lavitry ny tsiron’ny tany ny fonenanao, ary ho lavitry ny andon’ny lanitra avy any ambony.

⁴⁰Ny sabatrao no hivelomanao, ary ny rahalahinao no hotompoinao; kanefa, raha tonga amin’izay andro hahafahanao, dia hotapahinao ny ziogany hiala amin’ny vozonao.

⁴¹Ary nankahala an’i Jakoba i Esao noho ny tsodrano izay nomen’ny rainy azy. Dia hoy i Esao anakampo: Efa antomotra ny andro hisaonana an’Ikaky ka hovonoiko i Jakoba rahalahiko.

⁴²Nisy nanambara tamin’i Rebeka izany tenin’i Esao zanany lahimatoa izany, koa nandefa iraka haka an’i Jakoba zanany faralahy izy hiteny aminy hoe: Indro, mikasa hamaly faty anao i Esao rahalahinao ka hamono anao.

⁴³Koa ankehitriny, anaka, araho ny teniko: Mandehana mandositra ho any Harana, any amin’i Labana anadahiko.

⁴⁴Mitoera andro vitsivitsy any aminy mandra-pahafaka ny fahatezeran’ny rahalahinao;

⁴⁵eny, rehefa afaka ny fahatezeran’ny rahalahinao aminao ka hadinony izay nataonao taminy, dia handefa iraka hampaka anao any aho. Fa hataoko ahoana no ho famoy anareo mirahalahy indray andro?

⁴⁶Ary hoy i Rebeka tamin’Isaka: Tsy te ho velona aho noho ireny zanakavavin’ny Hetita ireny. Koa raha maka vady amin’ny zanakavavin’ny Hetita, tahaka ireto zazavavy tompon-tany ireto i Jakoba, dia inona indray no anton’ny hahavelomako?